Read Kissi 2Korɛntea 13 Bible Online

2Korɛntea 13 - Kissi bible

2Korɛntea 13

¹Kɔla yàándɔlan ya co laan ni, le niaa yilɔɔ. O dɛnɛ oo dɛnɛ nin, fɔ mì seiya a ŋiɔn te kon te a yaa a timbi seilen malan sɔɛi ndɔɛi i dimin.

²Lɔ́ɔ́ ya kɔɛ kɔla diinndɔlan-ndo, mí sila vanaa tosa dɛnnda lahakilan-nda a vanaa celen o sɔɔn mun coo. Hau vɛlɛ bɛɛ, i co bɛɛ niaa tɛɛn te, kɛ i co mun pɔɔ sondo mingi. Nduyɛ lɔ́ɔ́ ya muungunin o niaa lo lon-ndo, i hɛlinin vana-vana le.

³Kani la co tɔɔmaseloo nuwviaa ya o n'dial le sinaa te Krista co sɔɛi ya nin ni. Krista vi n'dial niaa o hɔl te, kɛ o co kpaaya ndɔɔ cɔmndo niaa nin.

⁴I co toɲa, maa lɔ́ɔ́ nda baŋ ndu o yɔm singafilaa coo-o, oo nɔ mayoomu le. Kɛ sisa, o co yoomu o kpaaya Hala-o bɛngu. Lende koni naa bɛɛ n co ni, n nɔ mayoomu le, kɛ n co yoomu o ndu nin o kpaaya Hala-o bɛngu.

⁵Niaa pila yaasiaa vɔ kɔlta niaalan ɲɛkɛndɛi, le sinaa te la nɔ pɛ laalanndo. Niaa pila solin kɔlɔ. Vɛ̀ɛ̀ la co sínà le maa Yeesu Krista co niaa nin? Te la cee kɔlɔ solin te, fɔ le kon.

⁶Kɛ, i laalan maa la sinà nin maa n bumba le.

⁷Sunsun, n co Hala piɛi yɔŋii niaa tosa dɛnɛ vɔɔndo. O co yeemɛi naa le i co ken te, le cɔmndo maa n tiw dɛnɛ ba le, kɛ yeemɛi nɛi i co ni mì n ce niaa dɛnɛ kɛndɔɔ tosaa, vana cɔ bɛɛ maa n bumba.

⁸Kani n tiwba ɲɛ-ɲɛ tosà le toɲa Hala-o simullo le, le toɲaa tosaa daama naa n nɔ kpaayaa ni.

⁹Te n nɔ mayoomu le, n naŋ kɔl, kɛ niaa niaa la nɔ yoomuan, nduyɛ o naa n yeema o piɛile naalen nin-ndo co ni, mì la peelun.

¹⁰I co niaa sɛbɔɔ ho sɛval a hɔlta kalalan, haliko lɔ́ɔ́ ya kɔanin o niaa lo-o, i soaa o niaa lo a hɔlta kala le kpaaya Mɛlɛka ke ya-o le. Kani kpaaya kon, le kunda niaa hivio laci o co ni, kɛ o co le ndu tɛɛmbuu le.

¹¹Sisa yɛ puapilɛa nia, la lɔl kɛndɛ! La handu kɔltan o baala kɛndɔɔ coo, mì la lueinan yoomuan vellaa-velle, mì la va o kɔlɲuloo nin. O kon Hala nɔ kaolaa a kɔlɲuloo o ba-o vanin niaa ikɛi.

¹²La yilan a kɔɔmianndo vellaa-velle. Vanaa diandaa kpow a yil niaa.

¹³Màá kɛndɛi Maalii Yeesu Krista-e, kaola Hala-o a diom pilɔɔ o Kɔl-Diandaa nin va niaa tɛɛn!