Read Kissi 2Korɛntea 2 Bible Online

2Korɛntea 2 - Kissi bible

2Korɛntea 2

¹Lelan, i cii tùú, i co muungu o niaa lo le, yɔŋii ya tɛɛmbuu niaa vɛlɛ kɔltan.

²Kani te i tɛɛmbuu pɛ niaa kɔltan, ɔ́ɔ̀ vanaa yɔngunin ya ɲaaloo o kɔl-la? Fɔ niaa vanaa ya tɛɛmbuu kan kɔltan-nda.

³Le hee ya sɛval niaa mɛɛ ya tosa nuaa yɛ ni, yáà yeema mì yáà kɔɛ o niaa lo, mì yáà tambu kɔl a vanáà yɔngunin ya ɲaaloo o kɔl-la le. Nduyɛ, i laalan maa te i dɔwnun pɛ ɲaale, niaa bɛɛ la dɔwnun ɲaale.

⁴Lende koni, a kɔl tambɛiyo taw a á siòònde ya sɛval niaa ni, mɛmɛan ma va ya o hɔl taw-taw. Nduyɛ o co le niaa lakɔl tɛɛmbuu le, kɛ haliko mi la sínà kaola bɛndu ya kaola niaa-o.

⁵Te vana pum tosa pɛ dɛnɛ tɛɛmbuu vana kɔllo-o, o co ya le o tɛɛmbuu kɔl te, kɛ niaa kpow o tɛɛmbuu kɔl lende ni. Te i hiw yɛ ba le, mɛɛ vanaa pum niaa tɛɛn o tɛɛmbuu kɔl lende ni.

⁶Sanga niaa vanaa bɔɔ-bɔɔ tuisi vana kon coo-o tiw.

⁷Lelan, sunsun, o bɛnda mì la mal ndu haki, mì la luei ndu yoomuan yɔŋii vana kon tambu kɔllo háá mò ŋɔɔcan.

⁸Nduyɛ, i co niaa tɛɛlɔn, la cɔm ndu maa la kaola ndu.

⁹Le hee ya sɛval niaa ni maa yáà yeema mì yáà tɔɔndan niaa, mì yáà sina te la co pɛ a bɛɛndiannda lɔ́ɔ́-lɔ́ɔ̀ le silala nilan biyɔɔ.

¹⁰Te la mal pɛ vanndo haki le tɛɛmbuu o tɛɛmbuu-o, ya bɛɛ i mal ndu haki. Kani o kɛ́-kɛ̀ ya mal pɛ haki, i mal ndu haki le niaa Krista o hɔl,

¹¹yɔŋii Setana hui naa. Nduyɛ, n sínà yeemɛi ndɔɛi.

¹²Lɔ́ɔ́ ya tiiya Troas le vannda Yoongu kɛndɛ Krista-o tiiyallo-o, mí Maalii kumbil-la dioo vakpa le baalaa tosaa.

¹³Kɛ nduyɛ, i va buulanndo taw, kani i komal Tite puapilɛ nuu lon te. Le hee, mí congun yungoo Troas, mí kɔa Maseduan.

¹⁴Kɛ n melnun Hala balika, kani o co cɛlɔɔ mì n va dɛnndan tiwvo ba lɔ́ɔ́-lɔ́ɔ̀ o diola Krista lan. O co vɛlɛ tosaa mì n va sɔɛi Krista-e vannda cɔmndo nɛɛ-nɛɛ ka maa mɛɛ lasikɔlɔ cun kɛndɔɔ tiw ba-ba fee nuaa yɛ.

¹⁵Kani n co macoaa maa lasikɔlɔ cun kɛndɛ Krista-o le Hala. Lasikɔlɔ kon co le vanaa co kɔlan o cindaa nin-nda a le vanaa co kɔlan o lou nin-nda.

¹⁶Le vanaa co kɔlan o lou nin-nda yɛ, cun yɔngu vana piɔ́mndo sɔlaa-o co nda diyɔɔ. A co kɔlan o nɛi cindaa coo-a nda, cun yɔngu vana yoomoo-o co nda yoomoo yɔngoo. Nɛ̀ɛ́ tiw yɛ ba mò tosa dɛnɔɔ ho?

¹⁷N co maa vanaa pum te, a co yulalen tosaa a sɔɛi Hala-e a. Kɛ naa naa, le tùú Hala vem naa-o naa n co sɔɛi a toɲaa ndu Hala o hɔl o Krista nin ni.