Read Kissi 2Korɛntea 3 Bible Online

2Korɛntea 3 - Kissi bible

2Korɛntea 3

¹Bàà le sɔɛi nɛi naa pilɛi vannda cɔmndo haliko ma caa naa biyɔɔ naa n co kindinndo ni? Te kon te vɛ̀ɛ̀ makoo naa n nɔ maa vanaa pum le niaa sɛbɛlan yoo a naa pila o kɔɔ mà caa naa biyɔɔ, te kon te le niaa sɛbɛla vaa lende ɲunaa naa n co kindinndo ni?

²Niaa pila co sɛbɛlan le naa ni, la co lasɛvaa naa o lakɔl-tan, la vanndacieea kpow tiwba sinaa mà dimi lan.

³La co cɔmndo maa sɛbɛ fula Krista o ba-o niaa co ni, o fula o baala naa nin-ndo pɛɛn. O sɛvan a malankili le, kɛ a Kɔl-Diandaa Hala nɔ yoomoo o ba-o. O sɛvan o powta yɛ́ndɛ́lan coo le, kɛ vanndacieea o lakɔl.

⁴N nɔ kɔlkɛsiaa kon Hala o ba o Krista nin.

⁵N tiwva mi dimi le maa naa pila co vallo ho tosaa ni, kɛ Hala o ba o co fulaa ni.

⁶Kani ndu siinguu naa vanaa baalaa kpema sɛnɛiya ni. O co le tɔŋ sɛvanndo le, kɛ le Kɔl-Diandaa. Kani sɛbɛ sɛvaa ndu, diyɔɔ o dii ni, kɛ Kɔl-Diandaa ndu, yoomoo o yɔngu vana ni.

⁷Sɔɔn tɔŋun mun n va n sɛvaa o powta yɛ́ndɛ́lan coo, Moise va baala tɔŋ kon tosaa, tɔŋ yɔngu kon vana piɔ́mndo sɔlaa-o pɛɛn. Mí hɔlaa ndɔa a deŋi deŋio pila, cuavaa Israɛlla a tiwba ndu tofaa le biilu va kon hiownɔn-ndo le. Nduyɛ, le telen bingi koni biilu kon va ni. Te tɔŋ dii kon vana-o deŋi pɛ deŋi vaa lende,

⁸vɛ̀ɛ̀ baala Kɔl-Diandaa co tosaa-o hiwnin biilu kon ɲamaa le!

⁹Te vali yɔngu vanndacieea piɔ́mndo sɔlaa-o sɔla pɛ biiloo, vɛ̀ɛ̀ biilu vali dɛnɛ sandaa ndu hiwnin kon vaa o bɔɔ le?

¹⁰N tiwba mì n dimi maa biilu va diondɔɔ paandu-o co ɲɛ-ɲɛ a hoo sunsun te, kani o hiow ndu bɔɔ.

¹¹Nduyɛ, te ɲɛ co hiownɔn-ndo sɔla pɛ biiloo, vɛ̀ɛ̀ ɲɛ co le fɛɛn a fɛɛn-ndo hiwnin kon biiloo sɔlaa le?

¹²Le tùú naa n tiindan kon-ndo naa n nɔ kɔlkɛsiaa ɲɛkɛndɛi ni.

¹³N co tosa maa Moise le, kani ndu mó kuumbun kola vaan-vaando o hɔl yɔŋii Israɛlla ndáà cɔ biilu hiawnan kon.

¹⁴Kɛ mí dɛnɛ sinaa ndaa laasian. Kani háá paalen nden hau, a va pɛ kpema paandoo dimio, kola vaan-vaan pilɛ kon co lon. O feŋan te, kani o Yeesu Krista nin kínɛí kola kon nɔla mò faŋan ni.

¹⁵Háá paale hau len nden, Israɛlla va pɛ sɛbɛ Moise-o dimio, kola vaan-vaan kon kumbu nda yiyanndan.

¹⁶Kɛ vana muli pɛ hɔlla o Mɛlɛka lo, kola vaan-vaan kon faŋan.

¹⁷Nduyɛ, Kɔl-Diandaa co Mɛlɛka ni. Nɛɛ Kɔl Mɛlɛka-o co pɛ, lon hɔ́ɔ́yɛi co ni.

¹⁸Lelan, naa kola vaan-vaan co o hɔl te-a kpow, biilu Mɛlɛka-o naa n co maa tofan ni. Nduyɛ, Mɛlɛka, o co Kɔl-Hala-o cii naa mangala le vaa velan ndɔɔ, n co hiovɔɔ laci tuŋ a biiloo sɔlaa. Vali Kɔl-Hala-o co tosaa-o co kon ni.