Read Kissi 2Korɛntea 5 Bible Online

2Korɛntea 5 - Kissi bible

2Korɛntea 5

¹Kani n sínà maa te cɛi-kola-toandaa naa n co nin o ceendo ho coo-o tambu pɛ, n nɔ cɛiyo o halataala, o Hala toosiaa le fɛɛn a fɛɛn-ndo, o vanaciee beŋ too.

²N co somisominndo o telenndo ho o cɛi-kola-toandaa naa n co hoo nin ceen nanu-o nin. Yeemɛi co naa taw, mì n luɛi o calta naala co o halataala lan nin.

³Nduyɛ a cɛinin naa volɔɔlan, o venin kɔɔle fondo le.

⁴Kani te n co vɔ pɛ o cɛi-kola-toandaa ceendo ho nin, mɛɛ mì n va sangaa maa mɛɛ vana sanga o volɔɔ lusulaa bɛngu nuaa yɛ. I co toɲa maa n yeema mì n faŋan ndu lekɔɔ le, kɛ n yeema mì n cuɛinun volɔɔ fula o halataala-o, haliko mi yoomoo mangala dialun co hunɔɔ vu-on.

⁵Nduyɛ vana bɛɛndiaa naa le dɛnɛ kon-ndo, ndu co Hala ni. O yɔngu naa Kɔl-Diandaa maa ilandu le ɲɛm kɛndɛn naa hun sɔlanin-ndon.

⁶Lelan, yoomuan ma co naa o n'dial lɔ́ɔ́-lɔ́ɔ̀, n sínà vɛlɛ maa te n co vɔ pɛ o dialun ivanacieeyan nin, mɛɛ Mɛlɛka naa n co levil lende ni.

⁷A laalanndo naa n co kelaa ni, o co le ɲɛm naa n co cɔw-von te.

⁸Dialun fulan co naa taw, nduyɛ n nɔ yeemɛi mi n mɛi dialun naa n nɔ mun ceen nanu-on, mì n kɔɛnnun o Mɛlɛka lo.

⁹Kɛ ɲɛ tase naa n yeema-o co ni, mì hɛnan Mɛlɛka, n va o dialun ivanacieeyan mun nin, n va lenin te.

¹⁰Kani naa kpow, mɛɛ mì n kɔ sim kpendekele o fonda kialaa n'yama Krista-o, haliko mo kelu naa iyama a pilɛn-pilɛnnda, mì n sɔla o vana-vana nɔ le sɔlaa-o, o va o kɛndɛ, o va o vɔɔn, mɛɛ naa n kela o ceendo coo yɛ.

¹¹Lelan, n sínà ɲɛ co siòòŋii Mɛlɛka-e nɔu-vo, n co kindinndo le vannda kɔltan mangalaa. Hala sínà naa ɲɛkɛndɛi. Nduyɛ, i laalan maa niaa bɛɛ, kɔlta niaalan bɛɛ la sínà kon.

¹²O co sɔɛi nɛi naa pila le naa n hin niaa vɛlɛ cɔm, haliko mi la bii naa biyɔɔ kɛndɛ le, kɛ le niaa fɛɛlɔɔ yɔngoo haliko mi la kelu yongaa a naa o kɔɔ, o kon la tiwnin ba mi la mulul vanaa tofa haa vanndo hɔlla, kɛ a sínà ɲɛ co ndu o kɔl-lo le-a.

¹³Te vanaa seemɛiya naa n co lekɛ́ndɛi ni, mɛɛ le Hala naa n seema lende ni. Kɛ te o va yɛ pɛ maa vanaa sim bolle-a naa n co ni, mɛɛ le niaa naa n co lende ni.

¹⁴Kani kaola Yeesu-o hiow naa mayoomu, bau n sínà pɛɛngu maa vana pilɛ kpé sɔla piɔ́mndo le vannda kpow ni. Lelan, piɔ́m o sɔla kon-ndo, vannda kpow a vi vu kon lende ni.

¹⁵Nduyɛ le vanndacieea kpow o vi vu kon ni, haliko vanaa co yoomua va lɛ yoomu le nda pila le, kɛ le vana vi mó tendul le nda-o.

¹⁶Lelan, n tofan ndɛ vanndo o nɛi ivanacieea coo le. Kani o tasendɔ, o nɛi ivanacieea coo ko naa n va Krista tofaa ni. Sunsun yɛ, o co lɛ o nɛi kon coo le naa n co ndu cɔu le.

¹⁷Te vanndo va pɛ o Krista nin, vana kon siŋnun vana sɛnɛi. Vanacieeyɛi ndɔɛi paanduei i hiow, vanacieeyɛi sɛnɛiye muungu.

¹⁸Hala pila o ba kon kpow fula ni, o mingi naa diom pilɛ naa ndaa o Krista nin, mó ke vɛlɛ naa vallo le diom pilɔɔ mingio ndu Hala a vannda tɛɛn-ndo.

¹⁹Kani Hala va o Krista nin, mó mingi diom pilɔɔ ndu a vanndacieea tɛɛn, o cɔm tɛɛmbuula ndalan te. Mó viam naa vali mingiaa diom pilɛ kon tosaa.

²⁰Lelan, naa co hɔlte Krista len ni, maa mɛɛ Hala pila oo lueinin niaa yoomuan yɛ. Lelan, n co niaa tɛɛlɔn o diola Krista lan, la cɛl mi diom pilɔɔ muungu Hala a niaa tɛɛn.

²¹Krista ndóò nɔ haki le, kɛ nduyɛ, mí Hala handu ndu hakila naalan coo, haliko mi n siŋnun vanaa sandaa Hala o hɔl.