Read Kissi 2Korɛntea 7 Bible Online

2Korɛntea 7 - Kissi bible

2Korɛntea 7

¹Caaŋaa nia ya kaola taw-va, le tùú kpemalan-ndan la co le naa-o, fɔ mì naa pila n dindin le dɛnnda kɛ́-kɛ̀ nɔɔliaa dialun nan a yiyan naa. Mì n peelun dindin naa a siòòŋii Hala-e.

²La kumbil naa kɔlta niaalan, kani n tosal vana-vana dɛnɛ vɔɔn te, n tɛɛmbuu vɔ vana-vana le, n soli vana-vana tɔnɔ o n'dial te.

³O co le niaa yaala le ya co niaa sɔɔn mun dimul te. I dimúl nin niaa paandu maa n kaola niaa taw, n va yoomu, n vu.

⁴I laalan niaa taw, nduyɛ i nɔla mì kelu yongaa a niaa o kɔɔ. I co ɲɔɔloo sɔlaa o sangalan nin kpow, i co a kɔlkɛndɛ bɛndoo.

⁵Kani telen naa n tiiya Maseduan-ndo, n sɔla pɛngi le: sɛɛngianndan la va ba-ba fee, siòònde va naa.

⁶Kɛ mí Hala, vana ɲɔɔlu vanaa co o mɔnɛi nin-nda-o ɲɔɔlu naa telen Tite hin-ndo.

⁷O co le hunɔɔ ndɔɔ daama le, kɛ le ɲɔɔlu o sɔla niaa o ba-o. Mó cɔm naa mɛɛ niaa nɔ yeemɛi le ya cɔu yɛ, mɛɛ niaa co o mɔnɛi nin yɛ a mɛɛ niaa co a bɛɛndiannda le ya yɛ. Lelan sunsun, i co a ɲaaloo taw.

⁸Hali i tɛɛmbuu bɛɛ niaa kɔltan o sɛbɛ ya sɛval niaa-o nin, i buulan lelan te. Lɔ́ɔ́ ya ce maa sɛbɛ kalaa tɛɛmbuu niaa kɔltan-ndo koni ya va buulanndo ni. Kɛ le telen bingi koni.

⁹Kɛ sunsun, i co a ɲaaloo, o co le tùú niaa tambu kɔltan-ndo le, kɛ le tùú kɔl tambɛi niaa tosa mí la mangala niinu niaa-o. Kɔl tambɛi niaa sɔla kon-ndo, Mɛlɛka cɛl ni maa i yɔŋnun lende. Lelan o nɛi oo nɛi coo, n tɛɛmbuu ɲɛ-ɲɛ a niaa le.

¹⁰Kani kɔl tambɛi Mɛlɛka cɛ̀l ho mò komal vana-o, ndu tosà ni mì vana kon mangala kela ndɔɔ, ɛɛ nduyɛ mò sɔla cindaa. Lelan, vana tembu kɔl a ndu le. Kɛ kɔl tambɛi ceendo ho ndu, piɔ́mndo o yɔngu vana sɔlaa ni.

¹¹Kɔl tambɛi Hala cɛl hoo mó komal niaa-o, la tofa vɔ sɔɔn kɛndɛn o tosa o ceennda niaalan nin-ndon: la cɔm yiyan kɛndɛ niaa nɔ-o, mí la keleŋa cɛvɔn! Mɔnɛi bii niaa taw, mí siòòŋii bɛnduei bii niaa, mí yeemɛi bii niaa vɛlɛ le ya cɔu, mí la dɔawnun ɲaale ɲɛkɛndɛi, mí la sɔla sangaa le dɛnɛ sandaa. O nɛi oo nɛi coo, mí la cɔm maa la tosa ɲɛ-ɲɛ vɔɔn o dɛnɔɔ ho nin te.

¹²Lelan, te la ce pɛ mì sɛval niaa sɛbɔɔ ho, o co le vana tɛɛmbuu dɛnɔɔ ho-o le, o co vɛlɛ le vana nda tosal dɛnɔɔ hoo-o le, kɛ haliko mi dialun fulan niaa nɔ le naa o niaalo-on n cɔmnun vakpa Hala o hɔl.

¹³Lelan naa n sɔla ɲɔɔloo o dɛnndan ndan kpow nin ni. Handɔɔ o kon coo, mí ɲɔɔ hɛnan naa taw le ɲaale Tite dɔwnun a niaa, mó komal naa a kɔlkɛsiaa le biyɔɔ kɛndɛ niaa kpow bii ndu-o.

¹⁴I lisan bɛɛ ɲɛ-pɔmbɔ ndu o hɔl a niaa o kɔɔ, siɛmbula bii ya le. Maa mɛɛ naa n dimul niaa dɛnndan kpow a toɲaa-e, mí lisan naa n lisan Tite o hɔl-lo siŋnun toɲaa.

¹⁵Te o yiyan pɛ mɛɛ niaa kpow bii sɔɔn yɛ a mɛɛ niaa biilu ndu a siòònde a á ɲiiyaa yɛ, kaola o nɔ o kɔl le niaa-o cɔɔlun taw.

¹⁶I co a ɲaaloo, kani i laalan niaa o dɛnndan kpow nin.