Read Kissi 2Korɛntea 9 Bible Online

2Korɛntea 9 - Kissi bible

2Korɛntea 9

¹Hali mì sɛval niaa sɛbɛ le malaa biyɔɔ le vanaa diandaa Yuda yoo le.

²Kani i sínà mɛɛ niaa nɔ yeemɛi le yɔngoo yɛ. I co yongaa sɔɛi a niaa o kɔɔ vanaa laalannda o hɔl Maseduan. I cii nda dimul maa cɔn nin lapɔm, niaa vanaa laalannda Akaii, la co a bɛɛndiannda le malaa yɔngoo. Nduyɛ, le yɔngɔn niaa kon, mí vanaa bɔɔ-bɔɔ nda tɛɛn a sɔla yeemɛi le malaa yɔngoo.

³Kɛ, i co puapilɛa haa vomɔɔ haliko yonga naa n kelu kon a niaa o kɔɔ o dɛnɔɔ ho nin-ndo yɔŋnun fúú le, haliko mi la va a bɛɛndiannda mɛɛ ya dimi yɛ.

⁴Te vanaa fula Maseduan-nda liila pɛ naa, mà kɔ komal niaa a bɛɛndiannda le, mɛɛ siɛmbulan la biinin naa taw le laalan naa n laalan niaa-o, vana cɔm ndɛnin siɛmbula biinin niaa pila lan te.

⁵Lelan ya yiyan ni maa o bɛnda mì tɛɛlun puapilɛa naa, mà hiow pɔɔ naa laci, haliko mi la bɛɛndian le ɲɛm-kéan niaa yii kpemaa le yɔngoo-on. O kon, n komalnin niaa a bɛɛndiannda a ɲɛm-kéan mun. Kon cɔmnin ni maa niaa pila cɛl le lan yɔngoo ni, o co a kɔl tambɛi le.

⁶La yiyan maa vana saŋ pɛ ɲɛ-pɔmbɔ, ndu koawnin ɲɛ-pɔmbɔ. Vana saŋ pɛ taw, ndu koawnin taw.

⁷Lelan, vana-vana yɔngu mɛɛ o kelun o kɔl-lɛ, o va a imɔnɔ le, te kon te maa baŋɔɔ le nda baŋ ndu le, kani Hala kaola vana yɔngu a ɲaaloo-o.

⁸Hala tiwba mò kuilul niaa dɛnnda kɛndɛla súú-súù ka, haliko mi la tiwnun o dɛnndan kpow nin a o telenndan kpow nin, o kon mì ɲɛ lo vɛlɛ niaa o ba taw le dɛnnda kɛndɛlan kpow tosaa.

⁹Maa mɛɛ o co o sɛvaa yɛ aa: «O ke vanaa bala fondoa a kɔl ndɔɔ kpede, dɛnɛ sandaa ndɔɔ co le fɛɛn a fɛɛn.»

¹⁰Hala, o yɔ̀ngu vana saŋaa yɛiye mò yɔngu ndu vɛlɛ ɲɛdiaa le dioo-o yɔngunin niaa yɛiye le saŋɔɔ, mò kui ndu. O kon kɔɔli, mò kui kɔmnde dɛnɛ sandaa niaa.

¹¹Hala siinguunin niaa vanaa ɲɛ-sɔlaa o nɛi oo nɛi coo, haliko mi la tiwba vannda kɛndɛi tosallo telen oo telen. O kon te n ke nda pɛ mala niaa yɔngu-o, vanaa bɔɔ-bɔɔ a melnin Hala balika le mala kon.

¹²Kani baala niaa co kon tosaa le vannda ɲɔɔn kew-vo, o co ko balahavɛila vanaa diandaa daama le o nɛŋi le, kɛ o co tosaa mì vanaa bɔɔ-bɔɔ a va Hala balikaa mello.

¹³Le mɛɛ niaa co baala kɛndɔɔ ho tosaa yɛ, vannda biilunin Hala le sɔɔn niaa bii mì la va cɔmndo maa la co kelaa o Yoongu kɛndɛ Krista-o coo-o. A melnin vɛlɛ ndu balika le bala niaa co mɔɔsiaa nɛɛ pilɛ, mì la va ɲɔɔn pɔvianndo-on, a le tùú niaa co vanaa celen kew-vo.

¹⁴Yeemɛi biinin nda o lakɔl le niaa, mà piɛi Hala le kɛndɛi bɛndui o tosal niaa-e.

¹⁵N melnun Hala balika le kɛndɛi ndɔɛi bɛndui sulan he a ɲɛ-ɲɛ lei.