Read Kissi Kalatea 1 Bible Online

Kalatea 1 - Kissi bible

Kalatea 1

¹Ya kiilaa Pol, o kiilale ndɔlen le fula vanaciee o ba loo, o vanaciee vim too, kɛ o Yeesu Krista nda Hala Fuɲaa tindi ndu Yeesu fulaa vanvílɛ́iya tɛɛn-ndo vem-ndo,

²a puapilɛa naa n co latulu-a, n co vanaa laalannda Kalasii sɛbɔɔ ho sɛvallo.

³Màá la sɔla kɛndɛi a kɔlɲuloo fulaa Hala Fuɲa naa a Maalii Yeesu Krista o ba!

⁴Maalii Yeesu yɔngu yoomu ndɔɔ le naa ciindiaa le hakila naalan, mó soli naa o ceen vɔɔndo ho nin, maa mɛɛ hɛnan Hala Fuɲa naa-o co yɛ.

⁵Biiloo co le ndu Hala le fɛɛn a fɛɛn! Amiina!

⁶Kɔndɔfillo co ya taw le keleŋa niaa keleŋa Hala veelu niaa o kɛndɛi Krista-e bɛngu-o kɔɔlan mulul, mì la yɔngun Yoongu kɛndɛ celen-ndo.

⁷O co dɔ́ɔ́ mì Yoongu kɛndɛ celen va le, kɛ vanaa pum a co niaa hɔlla hiŋndo nuaa ni, a yeema le Yoongu Kɛndɛ Krista-o mingio o hɔlaa vɔɔnda-aa.

⁸Nduyɛ, te vana celen, te kon te naa pila, te kon te mɛlɛkanɔ fula o halataala-o hun dimul niaa pɛ yoongu celen, o co ɲɛ pilɛ a o naa n tiiyal niaa-o loo, mɛɛ màá dangaa va vana kon coo fɔ́!

⁹N dimúl nin niaa ndi paandu, nduyɛ i co ndi haw miinguu dimi: te vanndo tiiyal niaa pɛ yoongu co ɲɛ pilɛ a o niaa tuei nin-ndo loo, màá dangaa va vana kon coo!

¹⁰Mò va maa candɔɔla vanndacieea ya co nuwviaa ni baa Hala ya candɔɔ? Mò va maa le hɛnan vanndacieea tosaa ya co kindinndo ni? Te yáà yeema pɛ le hɛnan vanndacieea tosaa, yáà venin vana baala Krista-o le.

¹¹I co niaa ndi dimul puapilɛa nia: Yoongu Kɛndɛ ya dimi-o fula vanaciee o ba le,

¹²kani i sɔla ndu vanaciee o ba le, i tui ndu vanaciee o sondo le, kɛ Yeesu Krista cɔm ya ndu ni.

¹³Kani la tuei tɔ́ɔ́ la ɲɛ ya tosa lɔ́ɔ́ kon-ndo, telen ya va o kaannde Yuifia-o: i va vanaa Hala-a yɛlen tollo a labɛɛla kpeekpei, mí va kindinndo le nda puusiaa.

¹⁴O kaannde yuifia ya va len nden, yáà hiow vanaa bɔɔ-bɔɔ o lambi nuu a o vanaa naa n co súú pilɔɔ-a tɛɛn, kani yáà hiow diallon fulaa le kelaa o naamula fuɲaa naa mamaa coo ni.

¹⁵Kɛ telen ɲɔɔ hɛnan vana hɛli ya lɔ́ɔ́ yáà vilun ndɔ loo-o, mó veelu ya a kɛndɛi ndɔɛi,

¹⁶mó ca maa o co fisa mò cɔm ya Po ndɔɔ, haliko mi dimi sɔɛi ndɔɛi vanaa co N'Yuifi le-a tɛɛn, fɔ́ɔ́fɔ̀, i ɲuna vanaciee le,

¹⁷i hel Yerusalɛm o vanaa yɔŋnun kiilaa ya tase-a lo le, kɛ mí kɔa Arabii. O kon kɔɔli, mí muungu vɛlɛ Damas.

¹⁸Vɔsila yaa o kon kɔɔli ya hel niko Yerusalɛm ni, mí kɔ síná Sefas. Mí tosa palɛi tɔ́ a iŋuɛɛnu o ndu lo.

¹⁹Kɛ o kiilaa tɔ̀a kpow nin, i ci vana-vana celen faŋanndo Nsaki, pɔmbɔɔ Maalii kɔɔli le.

²⁰I ya co niaa hee dimullo-e, toɲaa i co ni, Hala o hɔl, o co lacòò le ya co niaa dimullo le.

²¹O kon kɔɔli, mí kɔa o lɛŋnde Siri len a o lɛŋnde Silici len nin.

²²Kɛ vanaa laalaŋaa co o tàndá Yuda-o nin-nda ndáà ci vɔ ya bɛɛ le.

²³Tueyɔɔ sii ndáà tuei ni aa: «Vana va naa lɔ́ɔ́ kon yɛlen tollo-o mulin sunsun sɔɛi Hala-i ndóò yeema le tɛɛmbuuo-e yondaa.»

²⁴Má va Hala biiloo a ya o kɔɔ.