Read Kissi Kalatea 2 Bible Online

Kalatea 2 - Kissi bible

Kalatea 2

¹Vɔsilan tɔ́ a lahiɔɔlu hiovɔɔ o kon kɔɔli, mí muungu vɛlɛ Yerusalɛm naa Barnabas, mí Tite bɛɛ kɔa ya kɔɔli.

²Ɲɛ cɔmnun ya-o yɔngu ya kɔlan ni. Mí kɔ cɔm vanaa lebɛɛ-a pum Yoongu Kɛndɛ ya va vanaa co N'Yuifi le-a tiiyallo-o o sɔɔnsɔɔnndo nin, yɔŋii baala ya va tosaa-o, te kon te o yáà tosa nin-ndo ndóò yɔŋnun fúú.

³Kɛlɛkenɔɔ Tite yáà kɔɛ kon kɔɔli-o va ni, kɛ a beŋ bɛɛ ndu le tooma diyɔɔ le.

⁴Kɛ a kon kpede, vanaa pum a va naa tɛɛn o kunda vanaa laalannda nin, ndáà yeema le ndu toomaa diyɔɔ. Nduyɛ, fɛɛlɔɔ kínɛí vanáà luɛi naa kan tɛɛn-nda a va toofia kon ni, le sinaa mɛɛ naa n co hɔ́ɔ́yɛi naa n sɔla o Yeesu Krista nin-nde vilio yɛ, o kon mì ndáà mingi naa o cɛle tɔŋndo bɛngu.

⁵Kɛ le telen bingi bɛɛ n tosal nda lamamɔɔ mì n cɛl te, haliko mi toɲa co o Yoongu kɛndɔɔ nin-ndo lo o mandaa niaa tɛɛn.

⁶Kɛ vanaa vannda a va cɔu maa vanaa lebɛɛ-a, i co bɛɛ isɔɔ a mɛɛ nda va yɛ o kɔɔ le! Kani Hala hiyan vannda le-a beŋ ya ɲɛ-ɲɛ le.

⁷Kɛ nduyɛ, má ca maa Hala vem ya le vanaa co N'Yuifi le-a Yoongu kɛndɔɔ tiiyallo, maa mɛɛ o vem Piɛr o Yuifia lo yɛ.

⁸Kani Hala tosa mí Piɛr siŋnun kiilaa le Yuifia-o, ndu koni tosa vɛlɛ ni, mí siŋnun kiilaa le vanaa co N'Yuifi le-a.

⁹Telen Nsaki, Sefas a Nsaŋ, a co sungbuma vanaa laalannda-a sínà maa baala Hala ke ya-o co kon ni-o, má yil naa a laba naa Barnabas, le naa cɔmndo maa n co diom pilɛ naa ndaa, haliko mi naa n va kɔlan o vanaa co N'Yuifi le-a lo, o kon mí nda va kɔlan o Yuifia lo.

¹⁰I nda dimul naa kínɛí-ye co ni maa naa n pɔɛɛnun vanaa bala fondoa le, nduyɛ i pɔɛɛnun lɔ́ɔ́-lɔ́ɔ̀ le ken tosaa le.

¹¹Kɛ telen Sefas hin Antiɔs-o, mí simul ndu, kani ndóò nɔ dí le.

¹²Bau lɔ́ɔ́ pá mi vanaa Nsaki vem-nda hun, o va dioo latulu nda vanaa co N'Yuifi le-a. Kɛ ndáà hunɔɔ, mó yifan, kani siòònde i va ndu a vanaa ndáà nɔ kɔltan o sɔɔn tooman coo-a.

¹³Mí Yuifia tɔ̀a bɛɛ a del Sefas nda Barnabas kɔɔli o muulɔn nda kon nin.

¹⁴Yáà cɔu lende maa a co dɛnndan tosa mɛɛ toɲa co o Yoongu kɛndɔɔ nin-ndo co yɛ le, mí dimul Sefas vannda kpow o hɔl aa: «Nɔm co Yuifnɔɔ-o, te nɔm tosa pɛ dɛnndan maa vana súú celen, le kɔlɔ yɛɛ n co yɛ niko vanaa co N'Yuifi le-a dimullo le tosaa maa N'Yuifi?»

¹⁵Naa naa, Yuifia naa n co kabi o violɔnndo ni, n co vanaa súúla celen te, a sínà tɔŋ Hala-o le-a.

¹⁶Kɛ nduyɛ, n sínà ndi válán maa o co le dɛnnda tɔŋndan biyɔɔ le vanacieo va vana sandaa le, kɛ le laalan o laalan Yeesu Krista-o. Naa bɛɛ n laalan Yeesu Krista, haliko mi n siŋnun vanaa sandaa le laalan naa laalan Krista-o, kɛ o co le dɛnnda naa n co tosaa o tɔŋndo biyɔɔ nin-ndan te, kani vana-vana sɔlanin sandei le tɔŋnda o co biyɔɔ lan te.

¹⁷Kɛ te o va pɛ mì n va kindi-kindinndo mì Krista siinguu naa vanaa sandaa, bau naa bɛɛ vanaa lahakia naa n va ni, mò va maa Krista tosa ni mì n luɛi o hakio nin? Ɛ-ɛ, o co lende le.

¹⁸Kani te i mingi pɛ ɲɛla ya puusiaa nin-ndan tangul, mɛɛ vana tɛɛmbuuaa tɔŋndo ya co ni.

¹⁹Kani a ba tɔŋndo o kɔɔ, vana vílɛ́i koni ya co nin nuaa ni, haliko mi va yoomu le Hala.

²⁰I sɔla piɔ́mndo naa Krista latulu o yɔm singafilaa coo, lelan o co lɛ ya le co yoomu le, Krista co nin yoomoo ya nin ni. Sunsun, ceen ni ivanacieeyaa, i co ndu vilio a laalanndo o Po Hala-o nin, o kaola ya, mó yɔngu yoomu ndɔɔ le ya-o.

²¹I kɛɛ le kɛndɛi Hala-e kɛɔ. Kani te tɔŋndo siinguu vana vana sandaa ni, mɛɛ fondo fúú koni Krista vi ni.