Read Kissi Kalatea 3 Bible Online

Kalatea 3 - Kissi bible

Kalatea 3

¹Éé niaa Kalatea diɔmnda ha! Nɛɛ mangala yɛ dɔ́ɔ́ niaa kɔltan niŋ nuaa? Nduyɛ niaa o hɔl kpendekele naa n cɔm niaa sɔɛi Yeesu Krista nda baŋ o yɔm singafilaa coo-e ni.

²La mulul-lɔ ya sɔɛi ya co niaa hee ɲuna-e: Mò va maa le tɔŋnda niaa co biyɔɔ lan niaa sɔla Kɔl-Diandaa ni baa le Yoongu Kɛndɛ niaa tuei mí la laalan-ndo?

³La tosa bɔɔ diɔmii bɛndu! Niaa kandu dɛnɛ kɔllo ɲɛkɛndɛi-ya, vɛ́ mɛɛloo a dɛnnda n'falulan?

⁴Vɛ̀ɛ̀ mì o kɛ́-kɛ̀ niaa tosa hoo ndu yɔŋnun fúú? O bɛnda mò yɔŋnun fúú le.

⁵Hala ke niaa Kɔl ndɔɔ mò va dɛnnda kaamaalan tosaa niaa tɛɛn. Mò va maa le mɛɛ niaa co tɔŋndan biyɔɔ yɛ o tosal niaa ken ni baa le mɛɛ niaa tuei mì la laalan Yoongu kɛndɔɔ yɛ?

⁶Lelan o dimin ni aa: «Mí Abraham laalan Hala, le laalan ndɔ kon, mí Hala ca ndu vana sandaa.»

⁷La sínà ken maa vanaa nɔ laalanndo-a, nda co cuavaa Abraham-nda ni.

⁸Mí Sɛbɛ Hala-o dimi ndi paandu maa le laalanndo Hala ce vanaa co N'Yuifi le-a vanaa sandaa ni. Mí Yoongu kɛndɛ kon dimulun sindɛ Abraham aa: «Hala dɔawnin vanaa-mangalaa-isɔɔa kpede duaa o nɔm nin.»

⁹Lelan, vanaa laalannda sɔlanin duaa mɛɛ Abraham sɔla duaa le laalanndo yɛ.

¹⁰Kani vanaa-vanaa tiindan tɔŋndan biyɔɔ, nda co o dangaa bɛngu, kani o co o sɛvaa aa: «Dangaa co le vana biinin sɔɔn co n sɛvaa o tɔŋndo nin kpede mò kɛɛ le kelaa lecoo-o.»

¹¹Vana-vana Hala ci vana sandaa le tɔŋnda o co biyɔɔ lan te, kani o sɛvan aa: «Vana sandaa vanin yoomu le laalan ndɔɔ.»

¹²Nduyɛ o co o laalanndo nin te tɔŋndo fula le, kɛ mó dimi aa: «Vana bii pɛ tɔŋnda nilan mò kela lecoo, ndu sɔla cindaa o lan nin.»

¹³Krista soli naa o danga tɔŋndo bɛngu, le tùú danga naa muungu ndu coo-o, kani o co o sɛvaa aa: «Dangaa co le vana-vana nda baŋ pɛ o yɔmndo coo.»

¹⁴Ken i tosan haliko mi vanaa co N'Yuifi le-a, kɛ má laalan Yeesu Krista-a sɔla duaa Abraham-ndo, o kon mí n sɔla Kɔl Hala dimi le vanaa ndɔa keo-vo.

¹⁵Puapilɛa nia, n cuannun-ndɔ tɔɔmaseloo o naamula naalan nin, te vanndo va pɛ vuo, mò bɛɛndiaa sɛbɛ leseiyo ɲɛkɛndɛi, vana-vana nɔ dí mò faŋa ɲɛ pum, te kon te mò handu ɲɛ pum lecoo o sɛbɛ vaa lende nin te.

¹⁶Lende koni kpemala Hala yiilu Abraham a polale ndɔlen-ndan la co ni. I dimin te aa: «Le cuavaa ndɔa imamaa», vana ca ko aa le vanaa co sɛ́lɛ́-a ni, kɛ maa le vanndo ndu pilɛ kpé, aa: «Le polale nɔmnden, Krista pɛɛn!»

¹⁷Ɲɛ ya yeema le dimio-o co ni maa, sɛbɛ lesei Hala pila cii toosiaa ɲɛkɛndɛi-yo nɔla tambei le tɔŋ mɛɛlu hunɔɔ o vɔsilan kɛmɛ lehiɔɔlu a beleyaa kɔɔli-o le, te ken i tosan pɛ mɛɛ kpema Hala-o nɔ kpaaya le.

¹⁸Kani te o tɔŋndo nin kɛ́ɔ ndóò fula ni, ndóò fula lɛnin o kpemaa nin te, nduyɛ o kpema Hala yiilu Abraham-ndo nin o tosal ndu kɛndɛi ni.

¹⁹Mi le yɛɛ nɛ tɔŋndo ndu co yɛ niko? Le tɛɛmbuula vanndacieea o handun ni, háá mi polale kpemaa ndóò yiinun-nden léè tiiya. Mɛlɛkaa dimul vana tɛɛngaa ndu ni.

²⁰Nduyɛ vana tɛɛngaa kon co ndu pilɛ le, Hala yɛ, ndu pilɛ kpé co ni.

²¹Mò va maa cɔlɔbaa tɔŋndo co kpema Hala-o ni? O co lende le. Te tɔŋndo ndóò yɔngu pɛ vana yoomoo, mɛɛ o va tosa mí Hala ndóò ce vanaa co ndu biyɔɔ-a vanaa sandaa.

²²Kɛ mí Sɛbɛ Hala-o cɔm naa maa o kpaaya hakio bɛngu ceendo kpede co ni. Ken yɔŋ ni, mí kpema Hala yii kon-ndo peelun le vanaa laalannda, le laalan nda laalan Yeesu Krista-o.

²³Lɔ́ɔ́ pá mí telen laalanndo hun tiiya, maa vanaa kaaso náà n va a biyaa o tɔŋndo bɛngu ni. Mɛɛ mì náà n cum telen Hala va naa laalanndo cɔm-ndo.

²⁴Lelan, tɔŋndo va naa hɔlten ni, háá mi Krista ndóò hin, haliko mi Hala ndóò ce naa vanaa sandaa le laalanndo.

²⁵Laalanndo hin niko, tɔŋndo nɔ lɛ naa lehɔl coo le.

²⁶Kani mɛɛ niaa co kpede, cuavaa Hala-a niaa co le laalan niaa laalan Yeesu Krista-o ni.

²⁷Niaa kɛ́-kɛ̀ sɔla yinɔɔ o Krista nin, la cuu siŋnɔn velan ndɔɔ.

²⁸Yuifnɔ co lɛ le, Krɛkinɔ co lɛ le, cɛ co lɛ le, vana co o ba ndɔ coo co lɛ le, vanapɔnɔ co lɛ le, vanalanɔ co lɛ le, kani mɛɛ niaa co kpede, ɲɛ pilɔɔ kpé niaa co o Yeesu Krista nin ni.

²⁹Te o va yɛ pɛ maa le Krista niaa co ni, mɛɛ niaa co polale Abraham-nden ni, niaa co vanaa cuanin kɛ Hala yii kpemaa-o ni.