Read Kissi Kalatea 4 Bible Online

Kalatea 4 - Kissi bible

Kalatea 4

¹Ɲɛ ya yiyan-ndo co hoo ni: te vana bɛnda le kɛ́ɔ cuaa-o co vɔ pɛ cuaambɔ, hiyan ve ndu tɛɛn nda cɛɔ o nɛi oo nɛi coo le, o va bɛɛ maa le ndu ɲɔɔn kpow n co ni.

²Mɛɛ mò biwnun vanaa o co o bɛngu coo-a háá mì telen fuɲa ndɔ kelu-o tiiya.

³Lende koni, telen naa bɛɛ n va cuaambɔa-o, n va a biyaa o cɛle dɛnnda ceendo bɛngu.

⁴Kɛ telenndo tiiyaa, mí Hala viam Po ndɔɔ, o vanalanɔɔ velu-o, o velun o tɔŋndo bɛngu-o,

⁵haliko mo baŋa naa vanaa va o tɔŋndo bɛngu-a, mí n siŋnun cuavaa Hala-a, a bɛnda le kɛ́ɔ cuaa-a.

⁶Le mɛɛ niaa co cuavaa vialaa yɛ Hala luei Kɔl Po ndɔɔ naa o lakɔl ni, ndu co naa vomɔɔ Hala veeloo ni aa: «Pua!»

⁷Lelan, a co lɛ cɛ le, kɛ cua vialaa. Te o va yɛ pɛ maa cua vialaa n co ni, mɛɛ a bɛnda mà sɔla kɛ Hala-o.

⁸Paandu, telen niáà síná vɔ Hala loo, la va o cɛle ɲɛm niáà cɔu maa n'hala-on bɛngu, nduyɛ n co Hala le.

⁹Kɛ sunsun, la sínà Hala, o co yɛ niaa le sínà Hala le, ndu sínà niaa ni. Le yɛɛ niaa co yɛ vɛlɛ sɔɔn fondon nɔ mun tɔnɔ lon hɔlla mulullo? La yeema mì la muungu vɛlɛ mun o ba bɛngu?

¹⁰La co tɔŋnda ipalalan, tɔŋnda n'paangulan, tɔŋnda telenndan a la vɔsilan biyɔɔ.

¹¹Siòònde co ya, te o co sanga fondo fúú le ya sanga sangaa ho le niaa le!

¹²A yandi puapilɛa nia, la tosa dɛnndan maa ya, kani ya bɛɛ maa niaa ya co ni.

¹³La tɛɛmbuu a ya le. La sinà maa le tùú ya va a naa-o ya tiiyal niaa Yoongu kɛndɔɔ tiiyal tasoo ni.

¹⁴Dialun nun mun hɛnan bɛɛ vana tofa le, kɛ a kon kpede, la kɛɛ ya le, la faaŋian ya le. Mí la bii ya maa mɛlɛkanɔ Hala, maa Yeesu Krista.

¹⁵Kuɛɛ nɛ kɔlkɛndɛ bɛndu niáà nɔ lɔ́ɔ́ kon-ndo hiow yɛ? Kani i co lesei. Te ndíì nɔla pɛ tosan, la va hɔltan kaalian mì niáà yɔngu ya lan.

¹⁶Mò va maa le toɲa ya co niaa dimullo-o ya siŋnun yaamɔɔ niaa ni?

¹⁷Vanaa pum a co dialun fulan a niaa, kɛ a nɔ yiyannda kɛndɛ a niaa le. A yeema mà faŋa niaa naa kɔɔli, haliko mi la mulin nda o ibuŋ a yiyannda niaalan kpede.

¹⁸O naŋ mì vana fula diallon le dɛnɛ kɛndɔɔ tosaa o telenndan nin kpow, o va ko telen ya co niaa tɛɛn-ndo daama le.

¹⁹Cuavaa nia, i co o sanga bɛndoo nin le niaa, maa sanga vialaa, háá mì sɔɛi Yeesu-e i luɛi niaa nin,

²⁰i yeema mì i va vɔ niaa tɛɛn, mì i soo o niaa lo mɛɛ celen, kani i hawba a niaa.

²¹Niaa yeema haa le vaa o tɔŋndo bɛngu-a, la dimul-lɔ ya hau, vɛ̀ɛ̀ la co tueyɔɔ ɲɛ tɔŋndo co dimio-o le?

²²Kani o co o sɛvaa maa Abraham ndóò nɔ poaa nda ŋiɔn, o velu o pilɛ nda lanɔ cɛɔ, mó vialu o pilɔɔ nda lanɔ va o ba ndɔɔ coo-o.

²³Kɛ po nda velu nda lanɔ cɛɔ-vo ndu, a yeemɛi n'faluei ndu velun ni. O nda velu nda lanɔ va o ba ndɔɔ coo-o va hɔ́ɔ́ kpemaa ni.

²⁴Sɔɛi ken i nɔ vɛlɛ kɔlɔ celen: laandua ŋiɔŋaa kan, nda co kpemala tiɔnndan ni. O pilɛ, o fula o pembei Sinai-yo, ndu le cɛlen o vialu ni: Akar co kon ni.

²⁵Akar, ndu co pembei Sinai co Arabii-e ni, pembii pilɛi ken koni co vɛlɛ Yerusalɛm vaalio ho ni, kani o cɛlen nin o co a cuavaa ndɔa ni.

²⁶Kɛ Yerusalɛm co coocoo-o, ndu co o ba ndɔɔ coo, ndu co kala naa ni.

²⁷Kani o co o sɛvaa aa: «Dɔwnun ɲaale, nɔm vilu hoo loo. Yonda a kɔlkɛndɔɔ, mà deŋi, nɔm dembe vialaa nɛi hoo loo! Kani cuavaa vanalanɔ nda mal-lo hiow vaa sɛ́lɛ́ a cuavaa vanalanɔ loo pɔnɔ ndɔ-o».

²⁸Niaa puapilɛa nia, cuavaa kpemaa niaa co maa Isaak ni.

²⁹Kɛ mɛɛ i tosan lɔ́ɔ́ kon, mí o velun o yeemɛi n'faluei nin-ndo va o velun a kpengii Kɔl Hala-e-o cɔlɔbaa yɛ, lende koni i co sunsun ni.

³⁰Kɛ vɛ̀ɛ̀ Sɛbɛ Hala-o ndu dimi yɛ? Aa: «Tow cɛɔ ho nda po ndɔɔ, kani po cɛɔ muuliannin kɛ́ɔ cuaa nda po lanɔ co o ba ndɔɔ coo-o le!»

³¹Lelan puapilɛa nia, n co cuavaa lanɔ cɛ le, kɛ cuavaa lanɔ co o ba ndɔɔ coo-o.