Read Kissi Kalatea 5 Bible Online

Kalatea 5 - Kissi bible

Kalatea 5

¹Le hɔ́ɔ́yɛi Krista mingi naa hɔ́ɔ́a ni. Lelan la sim yili, la luei lɛ bollen o cɛlen nin te.

²Ya Pol, i co niaa dimul: te la cɛl pɛ le toomaa diyɔɔ, mɛɛ Krista nɛŋinin niaa mako kɛ́-kɛ̀ le.

³I co vɛlɛ ndi cɔɔlu dimi le vanpiaandua kɛ́-kɛ̀ co yɔngɔnndo le toomaa diyɔɔ: mɛɛ mà bii niko sɔɔn tɔŋndo dimi-on kpow.

⁴Niaa sɛyan a Krista-a, niaa co sandei nuwviaa o tɔŋndan biyɔɔ nin-nda, mbɔ̀ la fola kɛndɛi Hala-e fɔ́!

⁵Naa yɛ, n laalan maa siŋnunnin vanaa sandaa o balika Hala Kɔl-Diandaa bɛngu, ken naa n co cumndo a tiindanndo ni.

⁶Kani le vana co o Yeesu Krista nin-ndo, o co falenyɛi te kon te kɔ̀ndélen te o ca ɲɛ sɔvɛ le, kɛ laalan viam vana dɛnndan tosaa a kaolaa-o.

⁷Niáà kandu kiltan ɲɛkɛndɛi! Nɛ̀ɛ́ simi yɛ niaa le niaa sɔɔn toɲan kuunaa biyɔɔ?

⁸Ken fulá Hala veelu niaa-o o ba le.

⁹Lɛvɛnndo ɲɛ-pɔmbɔ cobe mò heelu dɛɔ kpow.

¹⁰Le ya, i laalan niaa o diola Maalii lan, yiyan celen delnin niaa le. Kɛ vanaa co niaa haa hɔlla hiŋndo-a sɔlanin yaalaa, mɛ̀ɛ́-mɛ̀ɛ́ nda va.

¹¹Ya le ya puapilɛa nia, te ndóò va pɛ maa sɔɛi toomaa diyɔɔ ya co keiyo vannda yondallo ni, mɛɛ le yɛɛ nda co yɛ niko hiovɔɔ laci a ya yɛlen tollo? Te lende ni, mɛɛ piɔ́m Yeesu sɔla o yɔm singafilaa coo-o co lɛ pow boŋaa le vana-vana le.

¹²Mɛɛ vanaa co niaa kan hɔlla hiŋndo-a, vana-vana kɔ kiolu vɔ hau dialii ndɔɛi.

¹³Puapilɛa nia, le hɔ́ɔ́yɛi niaa sɔla veeloo ni. Kɛ nduyɛ, la siinguu hɔ́ɔ́yɛi ken fɛɛlɔɔ le luɛyɔɔ dɛnnda n'falulan tosaa le, kɛ la tosalan baalaa vellaa-velle a kaolianndo.

¹⁴Kani tɔŋndo kpede peelun o sɔɛi he ndii pilɛ kpé nin aa: «Kaola caanda maa nɔm pila.»

¹⁵Kɛ te la co pɛ kisikisianndo mì la va misimisianndo vellaa-velle, mɛɛ la caa dɛ, yɔŋii niaa tɛɛmbuan vellaa-velle.

¹⁶I ya co niaa dimul-le co hee ni: la màl Kɔl-Diandaa niaa simndan laci o ceen niaa nin, o kon la tosà lɛnin yeemɛi n'faluei le.

¹⁷Kani dɛnnda falon yeema lan la kue latulu a la Kɔllo yeema lan te. La Kɔllo ndu yeema vɛlɛ lan la bɛnda a la n'falulan te. Vanaa ŋiɔŋaa kan a cɛlan te, lelan la tosà hɛnan niaa pila-o le.

¹⁸Kɛ te Kɔl-Diandaa sim pɛ niaa laci, mɛɛ la va lɛ o cɛle tɔŋndo bɛngu le.

¹⁹Nduyɛ dɛnnda n'falulan la co kpendekele: suundaa, dɛnnda nɔɔlɛilan, ilaasi-laasiei,

²⁰piɔmnda sooloo, mangalaa, nɛyɔnndo, diomnda biinannda lepɛŋndan, paŋalaa, yolɛi, siinganndo, piɔvianndan, kundala sɛɛngianndan kilaa,

²¹yeemɛi bɛnduei, mɔiyan yɔngɔnndo, pululen a dɛnnda vaa lende. Vanaa co dɛnndan ndan tosaa-a, i co niaa ndi pɔɔ dimul maa mɛɛ ya dimúl nin niaa ndi yɛ, nda sɔlanin kɛ o masale Hala len nin te few.

²²Kɛ kulii Kɔl-Diandaa koam-nde co kaolaa, ɲaaloo, kɔlɲuloo, biuvɔnndo, vanakɛndɛyɛi, kɛndɛi, lou o diomnden coo,

²³vili kɛndɔɔ a kɔllo biyɔɔ ni. Tɔŋndo co dɛnnda vaa lende cɔlɔbaa le.

²⁴Vanaa co o Yeesu Krista nin-nda, nda cii dɛnnda n'falulan a yeemɛi n'faluei baŋɔɔ o yɔm singafilaa coo.

²⁵Te n co pɛ yoomu o Kɔl-Diandaa nin, mɛɛ n kelan mɛɛ Kɔl-Diandaa yeema yɛ.

²⁶N vannun vanaa yonga le naa pila tiiŋuanndo te kon te tɔ́ɔ́yanndan biinanndo vellaa-velle le.