Read Kissi Filipea 2 Bible Online

Filipea 2 - Kissi bible

Filipea 2

¹Te Krista luei vana yoomuan ni, te o va pɛ maa vana sɔla yoomuan o kaolaa nin, mì Kɔl-Diandaa cuu diom pilɔɔ, te o va pɛ mì ɲííye a kɛndɛi co,

²mɛɛ la va diom pilɛ, o kon mì la peelu ɲaale nuu. La kaolian vellaa-velle, mì la nɔ kɔl pilɔɔ a yiyan pilɔɔ.

³La tosa ɲɛ-ɲɛ a latɔnga te kon te le lacandɔɔ sɔla le, kɛ la tosa dɛnndan o tuisinndo nin, mì la ce caanda fisa hiovɔɔ niaa pila coo.

⁴Vana-vana o niaa tɛɛn buulan ko le tɔnɔ ndɔɔ daama le, kɛ o buulan vɛlɛ o caanda.

⁵Kela niaa va maa kela vanaa sínà Yeesu-a.

⁶Ndu co ɲɛ pilɔɔ a Hala-o, o kungulan siimian o siimian nda Hala-o coo le.

⁷Kɛ mí ndu pila mal biilu o va nin-ndo, mó siingun cɛɔ le siŋnɔn o siŋnun maa vanaciee-o. Ndóò cɔu maa o siŋnun vanacieo,

⁸mí ndu pila cɛl le tuisinndo, mó tuisin háá, mó cɛl le piɔ́mndo sɔlaa o yɔm-singafilaa coo.

⁹Lelan bɛɛ Hala heelu ndu ni, mó ke ndu diola hiow diolan kpow lan,

¹⁰haliko mi vana-vana o halataala, o lɛŋnden coo a ciee-piɔ́m a baŋ vulan telen nda tuɛinin diola Yeesu lan-ndo,

¹¹o kon mì lediɛɛmu oo lediɛɛmu le dimi kpedekele aa: «Yeesu Krista co Vana bɛndoo» le biilu Pua Hala-o ni.

¹²Lelan, caaŋaa nia ya kaola taw-va, maa mɛɛ niaa co lɔ́ɔ́-lɔ́ɔ̀ vanaa biyaa isɔɔ-a o dɛnɛ Hala-o nin yɛ, la hiow laci a tosaa lende telen ya co niaa ikɛi-yo, kɛ mì la hiow bɛɛ sɔɛi ndɔɛi biyɔɔ telen ya co niaa tɛɛn too.

¹³Kani Hala co tosaa ni mì la va hɛnan ndɔɔ tosaa mɛɛ tuu ndɔɔ co yɛ.

¹⁴La tosa dɛnndan kpow, o va a sɔɔn pɔmbɔ le, o va vɛlɛ a lasɛɛngian te,

¹⁵haliko mi la va vanaa yaalan te-a a vanaa diandaa, mì la va cuavaa Hala-a, à vànà seelun isɔw nin te-a vanaa co laasianndo-a a vanaa vɔɔnda tɛɛn. Mì la va nda diondɔɔ tɛɛn maa ɲɛ-tengaa o ceendo,

¹⁶kani la nɔ sɔɛi yoomuɛi. Lelan siɛmbula biinin ya paale Krista hunnin-nden te, kani i ɲeenun ɲaanɔn fondo le, i sanga sanga fondo le.

¹⁷Kɛ o va bɛɛ mì kooma nian ma siŋnun sálàá handɔɔ o sálà niaa co Hala solullo a laalanndo-o coo, ɲɔɔ hɛnan ya ni, mì dɔwnun ɲaale a niaa kpow latulu.

¹⁸Niaa bɛɛ, la naŋ kɔl mì la dɔwnun ɲaale a ya latulu.

¹⁹I nɔ kɔlkɛsiaa o Maalii Yeesu nin maa o lo ɲɛ-pɔmbɔ mì vim niaa Timote, haliko mi ya pila i va yoomuan sɔlaa a yoongula ya vanin tueyɔɔ fulaa o niaa lan.

²⁰Kani i nɔ vana celen te, o buulan dɛnɛ niaa-o, vana nɔ̀ kɔllo lekɛ́ndɛi o sɔɛi niɛi coo-o,

²¹kani vana-vana co tɔnɔ ndɔ ndu pila-o nuwviaa, a co buulan le dɛnɛ Yeesu Krista-o le.

²²Kani niaa pila sínà mɛɛ Timote lo lediom coo a ya yɛ. Mɛɛ poo va fuɲaa ikɛi le ndu malaa nuaa yɛ, lende o co ya malaa le Yoongu kɛndɔɔ yondaa ni.

²³Te i sínà dɔ́ɔ́ pɛ mɛɛ sɔɛi nii vanin yɛ, i yeema mì vem ndu o niaa lo.

²⁴Nduyɛ, i nɔ laalanndo o Maalii nin maa ya pila tamalanin le kɔlan o niaa lo le.

²⁵Kɛ nduyɛ, i ce maa o co fisa mì vem Epafrodite puapilɛ nuu, o naa n co baalaa latulu, mì n va cɔlɔba pilɔɔ-o, o niaa vem le ya hunɔɔ malaa lɔ́ɔ́ ya va o bahavɛiyo nin-ndo,

²⁶kani co yeemaa taw le niaa cɔu vɛlɛ kpow, o co buulanndo taw le tùú niaa tuei maa o co a naa-o.

²⁷I co toɲa maa mí ndóò naa taw, o va le vuo. Kɛ mí Hala tuinun ndu iɲíí, o co yɛ ka ndu le o tuinun iɲíí le, ya bɛɛ mó tuinun ya iɲíí, yɔŋii yáà sɔla kɔl tambɛi celen o hoo kɔɔli.

²⁸Lelan ya co ndu keleŋa yɔɔ ni, haliko mi la dɔwnun ɲaale le ndu cɔu vɛlɛ. O kon mì kɔl ni tambɛiyo bɛɛ yɛlɛma tiŋ.

²⁹La bii ndu o Maalii nin a ɲaaloo ɲɛkɛndɛi, mì la biilu vanaa vaa lende,

³⁰kani le baala Krista-o o va le piɔ́mndo sɔlaa ni. Yoomu ndɔɔ va le ndu hiɔlɔnndo o ya malaa, mala niaa pilaa tiwnin ba loo.