Read Kissi Kolɔsea 3 Bible Online

Kolɔsea 3 - Kissi bible

Kolɔsea 3

¹Le mɛɛ niaa tendul a Krista latulu yɛ, la nuwviaa dɛnndan coocoo, nɛɛ Krista co icali Hala o ba kɛndɔɔ coo-a.

²La handu kɔllo o ɲɛm co o halataala-on coo, la yiyan mun lɛŋ coo le.

³Kani la vi, mí yoomu niaa va o vianaa a Krista latulu o Hala nin.

⁴Telen Krista, o co yoomu niaa-o fulanin ceen-ndo, o kon niaa bɛɛ la fula latulu a ndu o biiloo nin.

⁵La diw dɛnnda ceennda kɛ́-kɛ̀ co niaa nin: suundaa, dɛnnda nɔɔlɛilan, yeeman bɛndon, yeeman vɔɔnndon a yeemɛi ɲɛ sɔlɛi, kani piɔmnda sooloo co yeemɛi ɲɛ-sɔlaa ni.

⁶Dɛnndan vaa lende la tuisì kɔltuw Hala-o vanaa co ndu simullo-a coo ni.

⁷Lende niaa va paandu lɔ́ɔ́ niaa va o hakila lan nin-ndo ni.

⁸Kɛ sunsun, niaa bɛɛ la mal dɛnnda lan kpow: kɔltuwvo, nɛyɔnndo, kɔlvesɛiyo, congulan a sɔɔn vɔɔŋun va niaa fulaa o sondo-on.

⁹La dimulan còòlan te, kani la cii vanacieeyɛi niɛi paanduei malɔɔ a kaala ndɔlan,

¹⁰mì la vownun vanacieeyɛi sɛnɛiye le sinapɛngu peelanndo sɔlaa maa mɛɛ vana cɔw vanacieeyɛi kalɛi-yo co yɛ.

¹¹Lelan, Krɛkinɔ co lɛ le, Yuifnɔ co lɛ le, falenɔ co lɛ le, kɔ̀ndénɔ co lɛ le, vana sinaa dɛnɛ lepɛŋ co lɛ le, vana sinaa dɛnɛ co lɛ le, cɛ co lɛ le, vana co o ba ndɔ coo co lɛ le. Kɛ Krista tiw le nda kpow, o co vɛlɛ nda nin kpow.

¹²Vanaa co o yungu Hala-o nin-nda niaa co ni. Hala hɛli niaa mó kaola niaa. Lelan la va vanaa iɲííya, vanaa ikɛndɛa, vanaa tuisiannda, vanaa kɛndɛa a vanaa biuvannda.

¹³La biwnan vellaa-velle mì la tosalan kɛndɛi. Te vanndo nɔ pɛ ɲɛ o kɔl a vanndo pilɔɔ, la malnan lahaki mɛɛ Krista mal niaa haki yɛ.

¹⁴Kɛ hiovɔɔ o kon kpow coo, la vownun kaolaa maa volɔɔla cuɛinan, ndu nɔla niaa yiiyo latulu le vaa ɲɔɔ ndu pilɛ kpé ni.

¹⁵Màá kɔlɲulu Krista-o, o niaa sɔla veeloo le ndu le vaa kɔɔle pilɛlen-ndo tosa masalen niaa o lakɔl! La va vanaa sinaa ikɛndɛa.

¹⁶Màá sɔɛi Krista-e va niaa nin taw-taw! La pɛɛkuan mì la siilian vellaa-velle a taasi. La solul Hala condon a kɔlta niaalan kpow le ndu balikaa mello. La solul ndu condun lisan, condun kɔllon a condun sangalan fula Kɔl-Diandaa o ba-on.

¹⁷Ɲɛ-ɲɛ niaa va pɛ dimio, te kon te tosaa, la tosà ndu o diola Maalii Yeesu lan, mì la mel Hala Fuɲaa balika o diola Yeesu lan.

¹⁸Vanlaandua, la tuisin a piandaa niaa mɛɛ o bɛnda o Maalii nin yɛ.

¹⁹Vanpiaandua, vana-vana kaola laa ndɔ, la bii nda biyɔɔ vɔɔn te.

²⁰Cuaambɔa, la bii sɔɔn vanaa velu niaa-a o dɛnndan kpow nin, kani kon hɛnan Mɛlɛka ni.

²¹Niaa fuɲaa, la túúlù cuavaa niaa kɔltan te, yɔŋii nda fula mayoomu.

²²Niaa cɛa, la bii sɔɔn vanaa niaa bɛndua o falon nin, o dɛnndan kpow nin, o va ko telen nda co niaa hɔlten-ndo daama le, yɔŋii o va maa le vanndacieea hɛnanndo kínɛí niaa co baalaa ni, kɛ o va a kɔlta niaalan kpow le bɛɛle niaa nɔ le Maalii len.

²³Ɲɛ-ɲɛ niaa va pɛ tosaa, la tosà ndu a kɔllo kpow maa le Maalii, kɛ o va le vanaciee le.

²⁴La sínà maa la sɔlanin kɛ́ɔ Maalii o ba le niaa vɔ̀ngɔ̀ɔ́ dɔvɔɔ. Kani vana bɛndu kpeekpei niaa co baalaa tosallo-o, ndu co Krista ni.

²⁵Kani vana tosa pɛ dɛnndan o sandii lepɛŋnde nin, ndu koawnin mɛɛ dɛnɛ ndɔ sandaa lepɛŋndo co yɛ, kani Hala hiyan vannda le.