Read Kissi Yosue 11 Bible Online

Yosue 11 - Kissi bible

Yosue 11

¹Yabin, masaa Hatsɔr tueyɔɔ maa a nɔla yaamɔaa ndɔa, mó vim Yobab va masaa Madɔn-ndo, masa va Simrɔn-ndo, a o va Aksaf-o kiilaa,

²mó vim vɛlɛ masaa va o tàndá n'pemboo nin a ba luaŋ-ndo-a, a va o bóllo nin o peo Yurdɛn kɔngɔ o dalaa Kinnerɔt a ba too-a, a va o dɛɛlaa nin-nda a haa o kɔngɔɔ demullo le kɔlan a ba kobio Dɔr a ba paalen le del-lo-a kilaa.

³Mó viam vɛlɛ kiilaa o Kanaŋaa va o kɔngɔla tiɔnnda peo Yurdɛn demullo lan-nda lo, o Amoriia lo, o Hitiia lo, o Perisiia lo, o Yebusiaa va o tàndá n'pemboo nin-nda lo a o Yebusiaa va o pembei Hɛrmɔn bɛngu o tàndá Mispa-o nin-nda lo.

⁴Mí masaa kan kpow a can kɔlan a vanaa ndaa cɔwva, a va sɛ́lɛ́, vanáà cii nda cɔm te, vanáà ca nda ko aa sióónndon o mɛmma ihɛllan kɔngɔ ni, a va a soa a ɲɛla ɲaanannda soa nan-ndan sɛ́lɛ́ bɛndoo taw.

⁵Mí masaa kan kpow a cɛlan, má hun bɔɔŋian o mɛnndan Merɔm kɔngɔ le Israɛlla delɔɔ coo a cɔwvo.

⁶O kon mí Mɛlɛka dimul Yosue aa: «Siòòŋii bii nɔm a nda le, kani siɔdii a telen vaa nuaa kpafii, i tosanin mà deli a yɔŋulɛiya Israɛlla o ba. A kilinin soa ndaa tɔndikɔɔlion, mà lumi ɲɛla ɲaanannda ndala soa nan-ndan.»

⁷Mí Yosue nda vanaa ndɔa cɔwva kpow a kɔ voolu yaamɔaa ndaa kan a cɔwvo o mɛnndan Merɔm kɔngɔ.

⁸Mí Mɛlɛka mal nda Israɛlla o ba, má diw nda. Má toaw nda háá o kobi bɛndoo Sidɔn, kɔlan háá Misrefɔt-Maim a o bóllo Mispa a ba paalen le can-ndo. Má diw nda, hali vana pilɛ a mɛi yoomu le.

⁹Mí Yosue tosa a nda mɛɛ Mɛlɛka ndóò dimul ndu yɛ, mó kili soa ndaa tɔndikɔɔlion, mó loam ɲɛla ɲaanannda ndala soa nan-ndan.

¹⁰O telen kon, mí Yosue muungu, mó kɔ bii kobio Hatsɔr, ndu va paandu kobi lebollo le masɛi va a ba luaŋ-ndo-e kpow ni. Mó dii masa va lon-ndo,

¹¹mó diw vanaa va lon-nda kpow, o mɛi ɲɛ-ɲɛ yoomaa lon te. Mó mulin, mó loam kobi kalaa, Hatsɔr pɛɛn.

¹²Mí Yosue nɔla masaa mɔsɔŋian kan-nda kpow, mó bii kobila ndalan. Mó diw masaa kan a vanaa va icali o kobila lan nin-nda kpow mɛɛ Moise vana baala Mɛlɛka-o ndóò dimul ndu yɛ.

¹³Kɛ Israɛlla lumuu kobila va o pembon coo lan te, kobio Hatsɔr kínɛí Yosue lom ni.

¹⁴Má cɔwviaa ɲɔɔn a cɔlua va o kobila lan nin-nda, kɛ má cii vanndacieea diw kpow, hali ɲɛ yoomaa o pilɛ a mɛi le.

¹⁵Diom Mɛlɛka ndóò dimul Moise vana ndɔ baalaa a dɛnɛ kon o kɔɔ-o, ndu koni ndu Moise bɛɛ tɛɛngul Yosue ni, mi Yosue bɛɛ tosa lende kpafii.

¹⁶Mí Yosue bii lɛŋnde len kpow: kandɔɔ a tàndá n'pemboo, kɔ bii a ba too, tàndàá Kosɛn kpow, tàndá co o mɛnndan kɔngɔ-o, tàndá co o dɛngbɔɔ nin-ndo, kobila va dɛɛlala vesɛila holnun Yurdɛn-ndan nin-ndan a tàndàla co o pembon coo a o dɛngbɛlan nin a ba luaŋ-ndo lan.

¹⁷Kandɔɔ o pembii bil vil coo lei a ba pembei Seir a ba too, kɔlan Baal-Kad o bóllo Liban nin, kɔlan tiiyaa háá o pembei Hɛrmɔn bɛngu a ba luaŋ-ndo, mó bii masaa va o tàndàla lan nin-nda kpow, mó diw nda.

¹⁸Viovɔɔ pila cɔwvo viow nda tɛɛn nda masaa kan ni.

¹⁹Heviaa va icali Kabaɔn-nda kínɛí luei bɛndaa nda Israɛlla tɛɛn ni. Kobila tɔ̀lan kpow, a cɔwvo nda bii lan ni.

²⁰Kani Mɛlɛka pila tosa ni má kindi nilan a Israɛlla, má ciŋilan nda a cɔw lambaa-lambaa. Lelan, Israɛlla tosa iɲíí a nda le, má diw nda kpede maa mɛɛ Mɛlɛka pila ndóò dimul Moise yɛ.

²¹O telen kon, mí Yosue kuel vanaa fula o polale Anak len nin má va icali o pembon Hebrɔn coo, o pembon Debir coo a o mun Anab coo-a a á va o tàndá n'pemboo Yuda nin a o tàndá n'pemboo Israɛl nin-nda a cɔwvo. Mó diw nda, mó tɛɛmbuu kobila ndalan kpow.

²²O vanaa fula o polale Anak len nin-nda tɛɛn, o kɛ́-kɛ̀ lo lɛ icali o lɛŋnde Israɛlla nin te, fɔ Kaasa, Kat a Asdɔd daama nda va nin ni.

²³Mí Yosue hialu lɛŋnde len kpow maa mɛɛ Mɛlɛka ndóò dimul Moise yɛ. O kon, mí Yosue yɔngu Israɛlla lɛŋnde kalalen ɲɛ nda pɛ́-pɛ́, mó piɔw nda len tɛɛn mɛɛ nda va a polama yɛ́-yɛ́an yɛ. O kon, mí vannda pɛngi cɔwlan tosaa.