Read Kissi Yosue 13 Bible Online

Yosue 13 - Kissi bible

Yosue 13

¹Yosue ndóò yuuva nin taw. Mí Mɛlɛka dimul ndu aa: «A yuuva nin taw-taw, nduyɛ, fondalan la lo vɔ taw le biyɔɔ o lɛŋnden coo.

²Lɛŋnde lo le biyɔɔ len le co len ni: tàndàla Filistia a la Kesuriia kpow,

³kandɔɔ o pee pɔmbɔɔ Sihɔr, Esipte a ba paalen le can-ndo, kɔlan háá a lɛŋnde Ekrɔn-nden a maluaŋ. Tàndà kon kpow, vannda ndáà ce ndu maa o lɛŋnde Kanaan-nden coo o va ni. Lon masaa ŋuɛɛnua Filistia va masalen tosaa ni: masaa Kaasa, hoo Asdɔd, hoo Askelɔn, hoo Kat a hoo Ekrɔn, mí lɛŋnde Aviia le va vɛlɛ nda o ba bɛngu.

⁴Yosue, a bɛnda ma bii vɛlɛ lɛŋii Kanaaŋii co a ba too-e kpow, cɔnɔnndo Ara[8] o lɛŋnde Sidɔnnda nin, tiiyaa háá Afɛk o pɛɛngulan a Amoriia.

⁵Ma bii tàndá Kebaliia a tàndá Liban-ndo kpow a ba paalen le can-ndo, cɔnɔnndo Baal-Kad o pembei Hɛrmɔn tumndo, le kɔlan háá Lebo-Hamat,

⁶a vanaa co o tàndá n'pemboo coo Liban a Misrefɔt-Maim tɛɛn-nda kpow, Sidɔnnda kpow. Ya pila toawnin nda Israɛlla laci ni. Nduyɛ, mal siondei ma piɔw lɛŋnde len Israɛlla tɛɛn mɛɛ ya dimul nɔm yɛ,

⁷piɔw niko lɛŋii ken polama ŋɔmahiɔɔluan a polale tálále Manase len tɛɛn.»

⁸Polale tálále tɔ̀le Manase len a polama Rubɛn a Kad-an maa cii nin kɛ́ ndaa sɔla Yurdɛn leeloo a ba paalen le can-ndo, mɛɛ Mɛlɛka ndóò dimul Moise le nda lɛŋnden piɔwvo yɛ.

⁹Pɛɛngula lɛŋnde ndalen la va kandɔɔ o kobio Aroɛr, o pee pɔmbɔɔ Arnɔn kɔngɔ, a o kobi co o ból kon tɛɛn-ndo, handɔɔ o dɛngbɛ co o pembon Medeba coo-on coo a Dibɔn kpow,

¹⁰a kobila va Sihon, masa Amoriaa va masalen tosaa Hɛsbɔn-ndo o ba bɛngu lan, tiiyaa háá o pɛɛngulan a lɛŋnde Amɔnnda,

¹¹keiyo Kalaad, tàndá Kesuriia a Maakatiia, handɔɔ o pembei Hɛrmɔn a lɛŋnde Basan-nden kpow coo, tiiyaa háá Salka.

¹²Masale Ɔk va masaa Basan-ndo len kpow, ó va masalen tosaa Astarɔt a Edrei-yo bɛɛ le va o lɛŋnde ndalen nin. Ɔk kon va vana pilɛ o Refaimaa mɛɛlu masalen tosaa-a tɛɛn. Moise ndóò nɔla nin masaa kan, mó toaw nda.

¹³Kɛ Israɛlla tuw Kesuriia a Maakatiia le. Lelan nda co icali Israɛlla tɛɛn háá paalen nden ni.

¹⁴Polale Levii len daama le sɔla kɛ́ le ni. Kani nda nda, kɛ́ ndaa va o sálàla loamaala nda va Mɛlɛka Hala Israɛlla solullo lan nin, maa mɛɛ ndóò dimul nda yɛ.

¹⁵Lɛŋnde Moise yɔngu polale Rubɛn-nden mɛɛ yungula ndalan la va yɛ len le va

¹⁶kandɔɔ a Aroɛr co o pee pɔmbɔɔ Arnɔn kɔngɔ-o, keiyo a kobi co o dɛɛlaa tɛɛn-ndo, dɛngbɛ co o pembei coo-o kpow, kɔlan tiiyaa háá Medeba,

¹⁷Hɛsbɔn a kobila ndɔla co o pembei coo lan: Dibɔn, Bamɔt-Baal, Bɛt-Baal-Meɔn,

¹⁸Yasa, Kedemɔt, Mefaat,

¹⁹Kiriataim, Sibma, Serɛt-Hasahar pembii co o bóllo nin-nde,

²⁰Bɛt-Peɔr, kɔngɔla peo Piska a Bɛt-Hayesimɔt,

²¹Handɔɔ o kobila va lan o pembei coo lan coo kpow, masale Sihon-nden, masa Amoriaa va masalen tosaa Hɛsbɔn-ndo, le va o lɛŋnde nda sɔla len-nden nin. Mí Moise nɔla Sihon a simlacia Madiaŋaa va ndu o ba bɛngu o lɛŋnde len nin-nda: Evi, Rekɛm, Sur, Hur a Reba.

²²Balaam, vana viamaa yavaa, po Beɔr-o bɛɛ va vana pilɛ o vanaa Israɛlla diw-va tɛɛn.

²³Pɛɛngula lɛŋnde polale Rubɛn-nden le sɔla len la va Yurdɛn a lɛŋnde balu ndu len ni. Kobila pesin ndan diolan-ndan a cieon pesin mun diolan-ndon yɔŋnun kɛ́ polale Rubɛn-nden ni mɛɛ yungula ndalan la va yɛ.

²⁴Mí Moise yɔngu yungula fula o polale Kad len nin-ndan lɛŋnden mɛɛ yungula ndalan la va yɛ.

²⁵Lɛŋnde ndáà sɔla len le va Yaesɛr, kobilan o tàndá Kalaad-o nin kpow, tálá lɛŋnde Amoriia, tiiyaa háá Aroɛr co Raba ikɛi-yo.

²⁶Cɔnɔnndo Hɛsbɔn háá Ramat-Mispe, handɔɔ Betonim coo, cɔn vɛlɛ Mahanaim kɔlan háá o tàndàá Debir nin.

²⁷Kobila ndɔla va o dɛɛlaa Yurdɛn nin-ndan la va Bɛt-Haram, Bɛt-Nimra, Sukɔt, Safɔn a kobila tɔ̀la va o masale Sihon-nden nin-ndan ni, Sihon va masaa Hɛsbɔn-ndo pɛɛn. Lɛŋnde len le va Yurdɛn a ba paalen le can-ndo, len le va pɛɛngulan háá tiiyaa o mɛmma ihɛllan Kinnerɛt a maluaŋ ni.

²⁸Kobilan ndan a cieon mun kpow n va kɛ́ polale Kad len ni mɛɛ yungula ndalan la va yɛ.

²⁹Lɛŋnde Moise yɔngu yungula fula o polale tálále Manase len nin-ndan mɛɛ yungula ndalan la va yɛ

³⁰le va len ni: kandɔɔ Mahanaim, Basan, masale Ɔk va masaa Basan-ndo len kpow, handɔɔ niko vɛlɛ sɔndɔkɔlta belaŋɔmpum-nda Yair lan coo o lɛŋnde len nin.

³¹Kalaad táláá pilɔɔ, Astarɔt a Edrei, kobila lebolta Ɔk masaa Basan-ndan la va vɛlɛ o lɛŋnde ndale len nin. Mí lɛŋnde len kpow le yɔngun poaa Makir po Manase-o-a mɛɛ yungula ndalan la va yɛ.

³²Lɛŋnde he Moise yɔngu kɛ́ɔ lɔ́ɔ́ o va o dɛɛlaa Moab nin Yurdɛn leeloo, Yeriko a ba paalen le can-ndo-o ni.

³³Kɛ, o ke polale Levii len kɛ́ le, kani Mɛlɛka Hala Israɛlla va kɛ́ ndaa ni, maa mɛɛ o dimul nda yɛ.