Read Kissi Yosue 14 Bible Online

Yosue 14 - Kissi bible

Yosue 14

¹Ɲɛ Israɛlla sɔla kɛ́ɔ o lɛŋnde Kanaan-nden nin-ndo yɔŋnun hoo ni, ò Eleasar, vana-solia-lasálàá nda Yosue po Nun-ndo a vanaa va bolii lapangɛi o polama yɛ́-yɛ́an nin-nda a piɔw nda tɛɛn-ndo.

²Má mal siondei le polama ŋɔmahiɔɔlu a táláma máà lo vɔ-an lɛŋnden piɔwvo tɛɛn mɛɛ Mɛlɛka ndóò dimul Moise yɛ.

³Moise ndóò cii nin lɛŋii va Yurdɛn leeloo a ba paalen le can-ndo-e piɔw polama miɔnndan a polale tálálen tɛɛn, kɛ ndóò ke vɔ leviia kɛ́ o polama tɔ̀an tɛɛn te.

⁴Kani poaa Yosɛf-a va polan man miɔn: polale Manase len a polale Efraim-nden. Kɛ leviia sɔla kɛ́ o lɛŋnde len nin te, fɔ kobilan le calii ndɛi a yondola láà balu kobila lan-ndan le cɔlua ndaa a le ɲɛm sɔlan ndan.

⁵Mí Israɛlla piɔw lɛŋnden mɛɛ Mɛlɛka ndóò dimul Moise yɛ kpafii.

⁶Paale pum, mí vanaa fula o polale Yuda len nin-nda kɔa o Yosue lo Kilkal, mí Kalɛb po Yefune Kenisiinɔ-o dimul ndu aa: «Vɛ̀ɛ̀ a loonun pá ɲɛ Mɛlɛka dimul Moise vana baala Hala-o le nɔm a ya o kɔɔ Kadɛs-Barnea-o?

⁷Yáà nɔ vɔsilan belehiɔɔlu telen Moise, vana baala Mɛlɛka-o vem ya cɔnɔnndo Kadɛs-Barnea le lɛŋnden nden mɛɛndianndo o suansuaannden nin-ndo. Mɛɛ ya muungu, mí kɔ downun ndu kona ɲɛkɛndɛi.

⁸Mí puapilɛa nia ndáà liila ya-a va vannda yoomuan solio, kɛ mí ya i bii diom Mɛlɛka Hala-o a kɔl nuu kpow, mí lo o lediom coo.

⁹Paale len, mí Moise mɛnalan ya vannda o hɔl kpendekele, mó dimi aa: ‹I co nɔm toɲaa dimul, nɛɛ-nɛɛ pelii nɔmnde tiiya pɛ, lɛŋnde len le vanin kɛ́ɔ le nɔm a le cuavaa nɔmnda le lɔ́ɔ́-lɔ́ɔ̀ ni. Kani a bii diom Mɛlɛka Hala nuu a kɔl nɔmndo kpow.›

¹⁰Nduyɛ kandɔɔ ɲinkon háá hau, mí Mɛlɛka mɛi ya Kalɛb yoomu mɛɛ kpema ndɔɔ co yɛ. O dimul Moise sɔɛi ken, o co nin hau vɔsilan belehiɔɔlu a laŋuɛɛnu. Tuma kon Israɛlla va keiyo o lɛŋnde veselɛilen nin le hunɔɔ ni. Sisa, i nɔ vɔsilan belaŋɔmaa a laŋuɛɛnu.

¹¹Nduyɛ, i nɔ vɔ yoomuan maa paale Moise vem ya suansuaannde len-nden. O va le lakɔ o cɔw, te kon te le ɲɛ-ɲɛ tosa, yoomuma pilɛma man koni ya nɔ vɔ háá hau ni.

¹²Lelan, ke ya niko pembii Mɛlɛka yii paale len kpemaa le ya yɔngoo-e. Kani nɔm pila tuei ɲinkon maa cuavaa-imamaa Anak-a co lon o kobila bɛndula mayoomulan nin. Kɛ Mɛlɛka co ya ikɛi, i co lakɔ nda tovɔɔ maa mɛɛ o yiilul-la kpemaa yɛ.»

¹³O kon, mí Yosue dɔaw Kalɛb, po Yefune-o duaa, mó ke ndu lɛŋnde Hebrɔn-nden kɛ́ɔ.

¹⁴Lelan Hebrɔn co kɛ́ Kalɛb, po Yefune Kenisiinɔ-o háá hau ni, kani ò kela o nɛila Mɛlɛka, Hala Israɛlla lan coo.

¹⁵Nuaa ndáà veelu Hebrɔn paandu ni aa Kiriat-Arba. Vana hiow tɔ́ɔ́ fula o cuavaa-imamaa Anak-a tɛɛn-ndo Arba kon yɔŋnun ni. O kon, mí vannda sɔla kɔlɲuloo, cɔw ve lɛ le.