Read Kissi Yosue 17 Bible Online

Yosue 17 - Kissi bible

Yosue 17

¹Mí poaa imama Manase, po tase Yosɛf-o-a sɔla lɛŋnden. Poaa imama Makir po tase Manase-o-a ndáà cii nin lɛŋnden Kalaad a lɛŋnden Basan sɔla Yurdɛn a ba paalen le can-ndo, kani kuubanɔ cɔwvo Makir va ni.

²Má ke poaa tɔ̀a Manase-a lɛŋnden, mí vana-vana sɔla mɛɛ yungula ndalan la va yɛ, nda yɔŋnun haa ni: poaa Abiesɛr-a, poaa Helɛk-a, poaa Asriɛl-la, poaa Sikɛm-nda, poaa Hefɛr-a, poaa Semida-a. Kan yɔŋnun poaa Manase po Yosɛf-o-a a yungula ndala yɛ́-yɛ́lan ni.

³Selofad yɔŋnun po Hefɛr-o ni, mí Kalaad yɔŋnun fuɲaa Hefɛr, mí Makir vialu Kalaad, mí Manase vialu Makir. Selofad kon ndu vilu vanapɔnɔ le, fɔ vanlaandua. Cuavaa ndɔa kan yɔŋnun haa ni: Mala, Noa, Hɔkla, Milka a Tirsa[10].

⁴Mí cuavaa laandua kan sɔɔnguu Eleasar vana-solia-lasálàá, nda Yosue po Nun-ndo a simlacia Israɛlla kpow o hɔl, má dimi aa: «Mɛlɛka dimul Moise le naa kɛ́ɔ yɔngoo puapilɛa naa tɛɛn.» O kon, má ke nda kɛ́ɔ puapilɛa ndaa tɛɛn maa mɛɛ Mɛlɛka ndóò dimi yɛ.

⁵Mí Manase sɔla yondolan tɔ́ handɔɔ o tàndá Kalaad-o a lɛŋnde Basan-nden coo, Yurdɛn leeloo lɛŋii ken i va ni.

⁶Má yɔngu vanpiaandua fula o polale Manase len nin-nda yondolan, má yɔngu vɛlɛ vanlaandua fula o polale pilɛle len nin-nda yondolan. Le vanpiaandua tɔ̀a fula o polale Manase len nin-nda tàndá Kalaad-o va ni.

⁷Pɛɛngula lɛŋnde polale Manase len le sɔla len-ndan la va lan ni: cɔnɔnndo Asɛr, kɔlan Mikmetat Sikɛm ikɛi a ba paalen le can-ndo, mí la kɔa a ba Yamin-ndo háá o vannda Ɛin-Tapua lo a ba too.

⁸Polale Manase len léè nɔ tàndá kon ni, kɛ mí kobio Tapua, ó va o pɛɛngula lɛŋnde polale Manase len-ndo ndu yɔngun poaa Efraim-nda.

⁹O kon kɔɔli, mí pɛɛngula lan la hiaw a pee pɔmbɔɔ Kana. O pee pɔmbɔɔ kon a ba too, mí kobila va o kobila polale Manase len tɛɛn-ndan la siŋnun le polale Efraim-nden. O pee pɔmbɔ kon a maluaŋ, mí pɛɛngula lɛŋnde polale Manase len-ndan la kɔ del o mɛmma ihɛllan coo.

¹⁰Lɛŋnde va a ba too len le va le polale Efraim-nden ni, mí lɛŋnde va a ba luaŋ-ndo len le va le Manase, mɛmma ihɛllan ma va pɛɛngulan lɛŋii ken tɛɛn ni. Mí lɛŋii ken i pilan lɛŋnde polale Asɛr len le va a ba luaŋ-ndo len, mí i pilan lɛŋnde polale Isakar len a ba paalen le can-ndo.

¹¹Kobila Manase sɔla o tàndá Isakar nda Asɛr-o nin-ndan la va lan ni: Bɛt-Sean a kobila va ndu o ba bɛngu lan, Yibleam a kobila va ndu o ba bɛngu lan, vannda o kobio Dɔr a kobila va nda o ba bɛngu lan, vanaa va Ɛin-Dɔr-a a kobila va nda o ba bɛngu lan, a va Taanak-a, a va Mekido-a a kobila va nda o ba bɛngu lan.

¹²Kɛ poaa Manase-a nɔla Kanannda tovɔɔ le, lelan Kanannda lo icali o lɛŋnde len nin ni.

¹³Tuma Israɛlla sɔla kpaayaa taw-taw-vo, má baŋ Kanannda baalala kálà-kálàlan tosaa, kɛ a tuw nda le few.

¹⁴Mí poaa Yosɛf-a soaa o Yosue lo, má ɲuna ndu aa: «Le yɛɛ nɛ n yɔngu yɛ naa lɛŋnden bungɛi ndii pilɛ kpé? Nduyɛ, Mɛlɛka dɔw naa duaa, mí n kui taw?»

¹⁵Mí Yosue mulul nda aa: «Mɛɛ niaa co sɛ́lɛ́ yɛ, la hel o bundɔɔ nin, mì la kɔ fɛɛya bundɛ co o lɛŋnde Perisiia nda Refaimnda nin-ndo le calle. Kani tàndá n'pembu co o lɛŋnde Perisiia a o lɛŋnde polale Efraim-nden le sɔla len nin-ndo dɔɔnan a niaa.»

¹⁶Mí poaa Yosɛf-a dimul ndu aa: «Tàndá n'pemboo tiw naa le, hiovɔɔ o kon coo, ɲɛla ɲaanannda n'cilinndan la co Kanaŋaa co icali o bóllo nin-nda kpow o ba, la co haa Bɛt-Sean a á co o kobila co ndu o ba bɛngu lan nin-nda o ba, la co vɛlɛ a co o bóllo Yisreɛl nin-nda o ba.»

¹⁷O kon, mí Yosue dimul vanaa fula o polale Yosɛf len nin-nda, a co polale Efraim-nden a polale Manase len-nda pɛɛn aa: «La co sɛ́lɛ́, la nɔ vɛlɛ kpaayaa taw, la sɔ́lànin bungɛi ndi pilɛ daama le,

¹⁸kɛ la sɔlanin vɛlɛ tàndá n'pemboo. Hali o co bɛɛ bundɔɔ lende, la fɛɛya ndu. Nɛɛ niaa mɛɛlunin-nda vanin pɛɛngulan le niaa ni. Hiovɔɔ o kon coo, la co hunɔɔ Kanannda tovɔɔ, hali a nɔ bɛɛ ɲɛla ɲaanannda n'cilinndan a kpaayaa nuaa taw.»