Read Kissi Yosue 18 Bible Online

Yosue 18 - Kissi bible

Yosue 18

¹Mí Israɛlla kpow a cuungian Silo, má baŋ cɛi-kola-toandaa-labɔɔŋianndo lon. Lɛŋnden kpow le va nda o ba bɛngu.

²Kɛ vanaa pum va nda tɛɛn, fulaa o polan man ŋɔmmɛw nin, nda ndáà sɔla vɔ kɛ́ lelɛŋ o piɔw kon nin te.

³O kon mí Yosue ɲuna nda aa: «Telen kuɛɛ niaa co yɛ cumndo le kɔlan lɛŋnde Mɛlɛka Hala fuɲaa niaa mamaa yɔngu niaa len biyɔɔ?

⁴O lepola oo lepola nin, la hɛli vanpiaandua nda yáá mì vem nda, mà kɔ balu lɛŋnden, mà sina mɛɛ le co yɛ, mà tuu len mɛɛ nda piɔwnin nden kɛ́ɔ yɛ. O kon kɔɔli, a muungu ya o ibuŋ.

⁵A piɔwnin lɛŋnden kundalan tan ŋɔmmɛw. Vanaa fula o polale Yuda len nin-nda lonin o pɛɛngula ndalan coo a ba too, mì vanaa fula o polale Yosɛf len nin-nda lo o pɛɛngula ndalan coo a maluaŋ.

⁶Lelan, la bɛɛndiaa tuuvo le lɛŋnden piɔwvo kundala tan ŋɔmmɛw, mì la cuu ya tuu kon nanu le mɛɛ ya tiwba mì mal siondei Mɛlɛka, Hala naa o hɔl le niaa yɛ.

⁷Kɛ leviia sɔlanin kunda niaa tɛɛn te, kani nda baala solia lasálà Mɛlɛka-o vanin kɛ́ ndaa ni. Kɛ polale Kad len, polale Rubɛn-nden a polale tálále Manase len máà cii nin kɛ́la ndalan sɔla Yurdɛn leeloo a ba paalen le can-ndo. Moise, vana baala Mɛlɛka-o pila ke nda kɛ́la lan ni.»

⁸Mɛɛ vanaa kan cɛn kɔlan lɛŋnden piɔwvo, mí Yosue congun nda a sɔɔn mun o kɔɔ kpéŋ-kpéŋ aa: «La kɔ mì la kɔ balu lɛŋnden, mì la mɛɛndian nden ɲɛkɛndɛi, mì la muungu ya o ibuŋ. O kon, i malnin siondei Mɛlɛka o hɔl Silo nanu le niaa.»

⁹Mí vanaa kan can, má kɔa. Má kɔ balu lɛŋnden, má piɔw len kundalan tan ŋɔmmɛw a kobilan lapum, má sɛwviaa lende. O kon kɔɔli, má muungu nɛɛ Yosue va Silo o dɔ́ɔ́ngɔ́ɔ̀ nin-nda.

¹⁰Mí Yosue mal siondei Silo Mɛlɛka o hɔl le Israɛlla, mó piɔw nda lɛŋnden tɛɛn, mó ke lepola oo lepola yondola ndɔlan.

¹¹Ndáà malɔɔ siondei, mí polale Bɛnyamɛn-nden le sɔla bungɛi tasei mɛɛ yungula ndalan la va yɛ. Lɛŋnde nda sɔla o siondei malɔɔ len le va o lɛŋii polale Yuda len a polale Yosɛf len le sɔla-e tɛɛn.

¹²Pɛɛngula ndalan a maluaŋ la va lan ni: cɔnɔnndo Yurdɛn, helɔɔ Yeriko a maluaŋ, hiovɔɔ o tàndá n'pemboo a ba paalen le del-lo, kɔlan tiiyaa háá o lɛŋnde veselɛilen Bɛt-Avɛn.

¹³Mí pɛɛngula lan la can ndon, mí la kei o pembii co Lus a ba too-e, Lus ndáà veelu kon aa Betɛl-lo pɛɛn, mí la toal Atrɔt-Adar o pembii co Bɛt-Hɔrɔn a ba too-e.

¹⁴A kpengii paalen le del-le yɛ, mí la can o pembii co Bɛt-Hɔrɔn o hɔl-ndɔ-e, mí la tundun a ba mɛmma ihɛllan a ba too, mí la kɔ fula Kiriat-Baal, kobi kon ndáà veelu vɛlɛ ni aa Kiriat-Yearim, polale Yuda len léè nɔ kobi kon ni. Pɛɛngulan a ba paalen le del-lo la va lán ni.

¹⁵Mí pɛɛngula va a ba too lan la kandun o kobio Kiriat-Yearim mɛɛlulan, mí la kɔa a ba paalen le del-lo, mí la kɔ fula o soonnda mamɛnndan Nɛftoa.

¹⁶Mɛɛ la cɛn ndon, mí la toal o pembii co o Bóllo Bɛn-Hinnɔm ikɛi-ye tumndo, o ból Refaimnda nin a maluaŋ. Mí la demul bóllo Hinnɔm a kpengii pembon Yebus holnɔnndo a ba too, mí la toal háá Ɛin-Rokɛl.

¹⁷Mí la kɔ tundun Ɛin-Siemɛs a maluaŋ, mí la hiaw Kelilɔt co o helɔɔ Adumim hɔl-ndɔ-o. Mí la can ndon, mí la toal a kpengii powvo Bohan, po Rubɛn-ndo Bohan kon va ni.

¹⁸O kon, mí la hiaw a kpengii pembon Bɛt-Araba a maluaŋ, mí la kɔ toal Araba.

¹⁹O kon kɔɔli, mí la kei o pembon Bɛt-Hɔkla a maluaŋ, mí la kɔ tiiyaa o mɛmma hɛlii bɛnduan a maluaŋ, nɛɛ peo Yurdɛn del man coo-a. Pɛɛngulan a ba too la va lan ni.

²⁰Yurdɛn va pɛɛngulan a ba paalen le can-ndo ni. Lɛŋnde poaa Bɛnyamɛn-nda sɔla kɛ́ɔ len le yɔŋnun nden ni, mɛɛ yungula ndalan la va yɛ a mɛɛ pɛɛngula ndalan la va yɛ.

²¹Kobila yungula yɛ́-yɛ́la fula o polale Bɛnyamɛn-nden nin-ndan la yɔŋnun ndan ni: Yeriko, Bɛt-Hɔkla, Ɛmɛk-Kesis,

²²Bɛt-Araba, Semaraim, Betɛl,

²³Avim, Para, Ofra,

²⁴Kefar-Amɔnai, Ofni a Keba. Faw-faw, la va kobilan tɔ́ a latiɔn a cieon balu lan-ndon.

²⁵Kabaɔn, Rama, Beerɔt,

²⁶Mispe, Kefira, Mosa,

²⁷Rekɛm, Yirpeɛl, Tareala,

²⁸Sela, Elɛf, Yebus (kon co Yerusalɛm ni), Kibea a Kiriat. Faw-faw, la va kobilan tɔ́ a lahiɔɔlu a cieon va lan o ba bɛngu-on. Kon yɔŋnun kɛ́ɔ le poaa Bɛnyamɛn-nda ni, mɛɛ yungula ndalan la va yɛ.