Read Kissi Yosue 21 Bible Online

Yosue 21 - Kissi bible

Yosue 21

¹Mí vanaa va bolii lapangɛi o yungula fula o polale Levii len nin-ndan-nda komal Eleasar vana-solia-lasálàá, Yosue po Nun-ndo a vanaa va bolii lapangɛi o yungula tɔ̀la Israɛlla tɛɛn-nda

²nɛɛ nda va Silo o lɛŋnde Kanaan-nden nin-nda, má dimul nda aa: «Mí Mɛlɛka ndóò dimul Moise le naa kobilan yɔngoo le calle lenin, a yondo balu kobila lan-ndo le cɔlua naa.»

³O kon, mí Israɛlla faŋa kobilan lapum a yondola balu lan-ndan o kɛ́la ndalan coo, má ke leviia lan, maa mɛɛ Mɛlɛka ndóò dimi yɛ.

⁴Mɛɛ nda mal siondei, mí siondei bii fɔlɔn yungula Kehat lan. O leviia tɛɛn, mí polale Aarɔn-nden le sɔla kobilan tɔ́ a layàá o tàndàla vanaa fula o polale Yuda len nin, o polale Simeɔn-nden nin a o polale Bɛnyamɛn-nden nin-nda tɛɛn.

⁵Mí poaa tɔ̀a Kehat-a sɔla kobilan tɔ́ o tàndá Efraim-ndo, o tàndá Dan-ndo a o tàndá polale tálále Manase len tɛɛn.

⁶Mí poaa Kɛrsɔn-nda sɔla kobilan tɔ́ a layàá o tàndá Isakar-o, o tàndá Asɛr-o, o tàndá Nɛftali-o a o tàndá polale tálále Manase len tɛɛn, o lɛŋnde Basan-nden nin.

⁷Mí vanaa fula o polale Merari len nin-nda sɔla kobilan tɔ́ a latiɔn o tàndá Rubɛn-ndo, o tàndá Kad-o a o tàndá Sabulɔn-ndo tɛɛn mɛɛ yungula ndalan la va yɛ.

⁸Mí Israɛlla mal siondei, má ke leviia kobila lan a yondola balu lan-ndan maa mɛɛ Mɛlɛka ndóò dimul Moise yɛ.

⁹Má faŋa kobilan lapum o tàndá Yuda-o coo a o tàndá Simeɔn-ndo coo,

¹⁰má piɔw poaa Aarɔn-nda lan, a fula o polale Kehat po Levii-o len nin-nda. Kani nda fɔlɔn siondei bii ni.

¹¹Má ke nda Kiriat-Arba (o nda veelu sisa aa Hebrɔn-ndo), a yondola balu ndu lan kpow. O tàndá n'pembu Yuda-o nin o va ni. Arba yɔŋnun fuɲa-mama Anak-o ni.

¹²Kɛ nduyɛ, yondola balu kobi kon-ndan a cieon pɔmbɔn va ndu o ba bɛngu-on mún mun cii nin Kalɛb po Yefune-o yɔngɔn.

¹³Má ke poaa Aarɔn, vana-solia-lasálàá-a Hebrɔn, kobi vanaa sulalle ndíì fula o ba mì ndáà dii vanacieo-va ndáà viannun nin-ndo a kobio Libna.

¹⁴Má sɔla vɛlɛ Yatir, Ɛstemoa,

¹⁵Holɔnn, Debir,

¹⁶Ayin[11], Yuta, Bɛt-Siemɛs a yondola ndalan. Faw-faw, kobilan tan ŋɔmahiɔɔlu nda sɔla o polama miɔmma man coo ni.

¹⁷O tàndá Bɛnyamɛn-ndo nin, má sɔla Kabaɔn, Keba,

¹⁸Anatɔt a Almɔn, kobilan tan hiɔɔlu a yondola ndalan.

¹⁹Faw-faw, mí vanaa-solia-lasálàá, poaa Aarɔn-nda sɔla kobilan tɔ́ a layàá a yondola ndalan.

²⁰Mí poaa tɔ̀a Kehat-a, a fula o polale Levii len nin-nda sɔla kobilan o tàndá Efraim-ndo nin.

²¹Má ke nda kobilan tan hiɔɔlu a yondola balu kobila lan-ndan kpow le vanaa sulalle ndíì fula o ba-a vionnɔnndo: Sikɛm va o pembei coo o tàndá Efraim-ndo nin-ndo, Kesɛr,

²²Kibsaim a Bɛt-Hɔrɔn. Kobilan tan hiɔɔlu la co lan ni, a yondola balu lan-ndan ni.

²³O tàndá Dan-ndo nin, má sɔla vɛlɛ kobilan tan hiɔɔlu a yondola ndalan: Ɛlteke, Kibetɔn,

²⁴Ayalɔn a Kat-Rimɔn.

²⁵O tàndá polale tálále Manase len le sɔla-o nin, má sɔla kobilan tan tiɔn a yondola ndalan: Taanak a yondola balu ndu lan, a Kat-Rimɔn a yondola balu ndu lan, kobilan tan tiɔn.

²⁶Faw-faw, má sɔla kobilan tɔ́ a yondola ndalan.

²⁷Má yɔngu poaa Kɛrsɔn-nda, á fula kan o polale Levii len nin-nda kobilan tan tiɔn a yondola balu kobila lan-ndan o tàndá polale tálále Manase len nin: Kolan o lɛŋnde Basan-nden nin a Beɛstra.

²⁸O tàndá Isakar-o nin, má sɔla kobilan tan hiɔɔlu a yondola ndalan: Kision, Daberat,

²⁹Yarmut a Ɛin-Kannim.

³⁰O tàndá Asɛr-o nin, má sɔla vɛlɛ kobilan tan hiɔɔlu a yondola ndalan: Miseal, Abdɔn,

³¹Hɛlkat a Rehɔb.

³²O tàndá Nɛftali-o nin, má sɔla kobilan tan yáá a yondola ndalan: Kedɛs co o tàndá Kalile-o nin-ndo, Hammɔt-Dɔr a Kartan.

³³Faw-faw, mí polale Kɛrsɔn-nden le sɔla kobilan tɔ́ a layàá a yondola ndalan.

³⁴Mí polale Sabulɔn-nden le yɔngu yungula tɔ̀la leviaa fula o polale Merari len nin-nda kobilan ndan: Yɔkneam, Karta,

³⁵Dimna a Nahalal. Faw-faw, kobilan tan hiɔɔlu a yondola ndalan.

³⁶O tàndá Rubɛn-ndo nin, má sɔla vɛlɛ kobilan tan hiɔɔlu a yondola balu kobila lan-ndan: Besɛr, Yasa,

³⁷Kedemɔt a Mefaat.

³⁸O tàndá Kad-o nin, má sɔla kobilan tan hiɔɔlu a yondola balu kobila lan-ndan kpow: Ramɔt va o tàndá Kalaad-o nin-ndo va kobi pilɛ o kobila vanaa sulalle ndíì fula o ba mì ndáà hun vionnɔnndo lennin-ndan tɛɛn. Má sɔla vɛlɛ Mahanaim,

³⁹Hɛsbɔn a Yaesɛr.

⁴⁰Faw-faw, kobila yɔngun leviia tɔ̀a fula o polale Merari len nin mɛɛ yungula ndalan la va yɛ lan la va tɔ́ a latiɔn.

⁴¹Mó bɛnda niko kpow-kpow kobilan belehiɔɔlu a laŋɔmaa a yondola ndalan, la leviia ndáà sɔla o tàndála Israɛlaa tɔ̀a nin-ndan pɛɛn.

⁴²Kobila lan kpow, o kɛ́-kɛ̀ va o balaa sɔ́ a yondolan.

⁴³Nuaa Mɛlɛka ke Israɛlla lɛŋnde ndóò yiilu fuɲaa ndaa mamaa kpemaa le nda len yɔngoo len ni. Má sɔla len, má cal lenin.

⁴⁴Mí Mɛlɛka luei nda kɔlɲuloo tɛɛn nda lɛŋii ndáà salu pɛɛngulan-nde kpow, maa mɛɛ ndóò yiilu fuɲaa ndaa mamaa kpemaa yɛ. O yaamɔaa ndaa tɛɛn vɛlɛ, o kɛ́-kɛ̀ nɔla nda simullo le. Mí Mɛlɛka mal yaamɔaa ndaa nda o ba.

⁴⁵Mí kpemala kɛndɛla Mɛlɛka ndóò yiilu Israɛlla lan kpow la peelun, o kɛ́-kɛ̀ lo le kɛɔ peelɔnndo le.