Read Kissi Yosue 3 Bible Online

Yosue 3 - Kissi bible

Yosue 3

¹Mɛɛ Yosue nda Israɛlla kpow a cɛn Sitim idiiyo púŋ, má tiiya o peo Yurdɛn kɔngɔ. Má kila caltan le telen taŋaa pee kalaa cumndo lon.

²Palɛi yaa o kon kɔɔli, mí vanaa va nda bollen-nda balu dɔ́ɔ́ngɔ́ɔ̀ sɔ́

³le vannda dimullo aa: «Lɔ́ɔ́ niaa canin leviaa-solia-lasálàá kɔlan a kesu kpema Mɛlɛka Hala niaa o lacongú-o, la faŋan o fonda niaa co hoo-o, la kɔɛ nda kɔɔli.

⁴O kon, la sinanin nɛi niaa bɛnda le biyɔɔ o kɔlan-ndo, kani la kei-yɔ o nɛi kon coo le. O va bɛɛ lende, o bɛnda mì tiŋndo va niaa a kesoo tɛɛn le dunndo vàála tiɔn. La sɔɔnguu ndu ikɛi le.»

⁵Mí Yosue dimul vannda aa: «La dindin, kani Mɛlɛka tosanin dɛnnda kɔndɔfiltan niaa tɛɛn siɔdii.»

⁶O kon kɔɔli, mó dimul vanaa-solia-lasálàá aa: «La cua kesu kpemaa, mì la sim vannda laci.» Má cua ndu, má hiaw vannda laci le kɔlan.

⁷Mí Mɛlɛka dimul Yosue aa: «I co hau kandɔɔ nɔm kuundiaa Israɛlla kpow o hɔl, haliko ma sina maa mɛɛ ya va Moise ikɛi yɛ, lende koni ya co nɔm ikɛi ni.

⁸Nɔm Yosue, dimul vanaa-solia-lasálàá co kɔlan a kesu kpemaa-a aa: ‹Te la tiiya pɛ Yurdɛn o peelo, la sim peo nin.›»

⁹O kon mí Yosue dimul Israɛlla kpow aa: «La sɔɔnguu mì la yaŋnun sɔɔn Mɛlɛka Hala niaa co dimio-on.

¹⁰Mɛɛ niaa sinanin maa Hala kiyɛiyo co niaa tɛɛn, maa ndu toawnin Kanannda, Hitiia, Heviia, Perisiia, Amoriia a Yebusiia niaa laci ni yɛ co hoo ni.

¹¹Kesu kpema Maalii co lɛŋnden kpow bollen-ndo taŋnin peo Yurdɛn niaa o hɔl.

¹²Lelan, la hɛli vanpiaandua tɔ́ a à ŋiɔn o polama Israɛlla tɛɛn, lepola oo lepola vana pilɛ.

¹³Vanaa-solia-lasálàá co kɔlan a kesu kpema Mɛlɛka, Maalii co lɛŋnden kpow bollen-ndo-a pila dɔ́ɔ́ pɛ pelei Yurdɛn o peelo, mɛnndan ma kiolunin tɛɛn, mì ma co tolɔɔ fulaa a luaŋ-ndan ma sim mí ma cuungian maa mɛɛ vana kanda mamɛn.»

¹⁴O kon, mí vannda faŋan o dɔ́ɔ́ngɔ́ɔ̀ nin le Yurdɛn taŋɔɔ. Mí vanaa-solia-lasálàá va kɔlan a kesu kpemaa-a sim nda laci.

¹⁵Tuma koavaa kón tosan ni, telen kon mɛnndan Yurdɛn ma hun taw ni, mì ma hel o kɔngɔlan. Mɛɛ vanaa-solia-lasálàá va kɔlan a kesu kpemaa-a pila dɔ́ɔ́ pelei o peelo,

¹⁶mí mɛmma va cɔnɔnndo a ba luaŋ-ndo-an ma sim, mí ma cuungian nɛɛ pilɛ nɛɛ levil o kobio Adam ikɛi, o co Sartan ikɛi-yo pɛɛn. Mí ma va tuusoo-an man ma va kɔlan delɔɔ o mɛmma va o bóllo Araba nin-ndan coo, mɛmma hɛlii bɛnduan pɛɛn, mí ma kiolu kpali. O kon mí Israɛlla taŋ Yurdɛn o kobio Yeriko hɔl-ndɔ.

¹⁷Tuma Israɛlla kpow a va kon taŋɔɔ a pelon n'vesɛi sɛ́ɛ́n-ndo, vanaa-solia-lasálàá va kɔlan a kesu kpema Mɛlɛka-o-a va isisi Yurdɛn o peo kɔllo, lɛŋnden le vannun levesɛi sɛ́ɛ́n, a lo isisi lon háá mí vannda kpow a cuu taŋɔɔ.