Read Kissi Yosue 7 Bible Online

Yosue 7 - Kissi bible

Yosue 7

¹Mí Israɛlla tosa dɛnɛ vɔɔn bɛndoo o ɲɛm siŋnun teengen le Mɛlɛka-on cuaa nin. Mí langbanɔ pilɛ, diolan Akan, po Karmi-o, Karmi kon po Sabdi-o o va ni, Sabdi kon po Sera-o o va ni, fulaa o polale Yuda len nin cua ɲɛm mun n'pum. Le hee, mí Mɛlɛka tuulu kɔl a Israɛlla.

²A lo Yeriko, mí Yosue viam langbaa pum, má kɔa Ai co Bɛt-Avɛn ikɛi-yo, Betɛl a ba paalen le can-ndo, le lɛŋnden fɛfɛlaa. Mó dimul nda aa: «La kɔ mì la fɛfɛla lɛŋnden.» O kon, mí langbaa kan kɔa, má mɛɛndian Ai.

³Ndáà muungoo Yosue o ibuŋ, má dimul ndu aa: «Vannda kpow héélù le Ai cɔlɔbaa le. N'van vàála tiɔn, te kon te vàála yaa bɛɛ a tìw. Kani vanaa co lon-nda co sɛ́lɛ́ le, hali mì vana saangiaa vanaa naa cɔwva le.»

⁴Mí vannda vàálan tan yáá a heelu le kɔlan Ai delɔɔ coo a cɔwvo, kɛ má kɔ ɲaanun vannda Ai.

⁵Mí vannda Ai diw Israɛlla beleyaa a à ŋɔmpum. Má kandu nda ɲaanɔnndo kɔɔli cɔnɔnndo o dio kobio háá Sebarim. Má koaŋ nda koŋɔɔ pila o pembei tolɔɔ. Mí Israɛlla laasian kɔltan, má fula mayoomu.

⁶O kon mí Yosue sɛɛsian volɔɔlan lekɔɔ, mó del o kuumbuan lɛŋ kesu kpemaa o hɔl, mó lo lende háá icɔllo, má vownun cundoo o lebol nda kaasoŋaa kɔlkalua Israɛlla kpow.

⁷Mí Yosue dimi aa: «Éé Maalii, Mɛlɛka! Le yɛɛ nɛ n tɛɛnguu yɛ naa peo Yurdɛn le naa hunɔɔ malɔɔ Amoriia o ba mà diw naa? Ndóò va fisa mí naa n lonnún Yurdɛn leeloo.

⁸Éé Maalii! Mɛɛ Israɛlla ɲaanun yaamɔaa ndaa nuaa yɛ, yɛɛ ya dimi yɛnin kpeekpei?

⁹Kanannda a vanaa celeŋaa co o lɛŋnden nden nin-nda co sɔɛi he tueyɔ̀ɔ̀ mà mɔsɔŋian, mà hun tiila naa, mà cii naa o lepilɔɔ. Te i tosan yɛ pɛ lende, vɛ̀ɛ́ n yɔŋ yɛnin le diola nɔmnda bɛndulan?»

¹⁰Mí Mɛlɛka dimul Yosue aa: «Cɔn lɛŋ! Le yɛɛ nɛ n del-lɛ o kuumbuan o kɔl coo?

¹¹Israɛlla tosa hakio, má tɛɛmbuu kpema ya yiilu nda-o. A toɲa, a cii ɲɛm ya kuuna nda-on cua. Mɛɛ nda ciimbuu mun, má vian mun o volɔɔla ndalan nin.

¹²Lelan, à nɔlanin yaamɔaa ndaa simullo le, ɲaanɔnndo tuŋ nda vanin nda ni, kani a del kasi. Te la tɛɛmbuu ɲɛm ya kuuna niaa mun le cuaa-on te, i ve lɛnin niaa tɛɛn te few.

¹³Cɔn ma dimul vannda mà bɛɛndian le bɔŋanndo naa ndaa siɔdii. Ma dimul nda aa: ‹Mɛlɛka Hala Israɛlla dimi aa ɲɛm o kuuna niaa le cuaa-on co niaa tɛɛn, niaa Israɛlla pɛɛn. Te la tɛɛmbuu ɲɛm mun niaa tɛɛn te, la nɔlanin yaamɔaa niaa simullo le.›

¹⁴Siɔdii idiiyo, niaa kpede hin mɛɛ niaa co a polama yɛ́-yɛ́an yɛ. Polale ya Mɛlɛka hɛlinin-nden le sɔɔnguunin a yungula yɛ́-yɛ́la ndɔlan. Yungu ya Mɛlɛka hɛlinin-ndo sɔɔnguunin a cɛila pilɛn-pilɛnnda co lenin-ndan. Vanaa co o cɛi ya Mɛlɛka hɛlinin-ndo nin-nda sɔɔnguunin a pilɛ-pilɛnnda.

¹⁵Vana ya hɛlinin nda tɛɛn-ndo, mɛɛ ndu ɲɛm ya kuuna mún-ndon co o ba ni. O kon, la bii vana kon, la mal ndu o yin a ɲɛm ndɔn kpow, o ŋɔɛ sukɛí, le tùú o tɛɛmbuu kpema ya Mɛlɛka-o-o a le tùú o tosa dɛnɛ nɔɔlɛiyo Israɛlla tɛɛn-ndo.»

¹⁶Idiiyo púŋ, mí Yosue can, mó sɔɔnguu Israɛlla mɛɛ nda va a polama ndan yɛ, mí sɔɛi bii polale Yuda len.

¹⁷Mó sɔɔnguu polale Yuda len a yungulan, mí sɔɛi bii yungu Sera-o. Mó sɔɔnguu yungu Sera-o a cɛilan, mí sɔɛi bii cɛi Sabdi-o.

¹⁸Mí Yosue sɔɔnguu vanaa va o cɛi Sabdi-o nin-nda a pilɛn-pilɛnnda, mí sɔɛi bii Akan po Karmi-o. O polale Yuda len nin Akan ndóò fula ni, kani Sera velu Sabdi ni, mí Sabdi vialu Karmi, mí Karmi vialu niko Akan kon.

¹⁹O kon, mí Yosue dimul Akan aa: «Po nuu, ke Mɛlɛka Hala Israɛlla bɛɛlen ma biilu ndu. Cɔm ya dɛnɛ n tosa-o, nduyɛ vin ya ɲɛ-ɲɛ le.»

²⁰Mí Akan mulul Yosue aa: «Toɲaa i co ni, ya cua hakio a Mɛlɛka Hala Israɛlla ni.

²¹Mɛɛ ya ce doma bɛndu kɛndɛ-kɛndɛ fula o lɛŋnde Sinear len nin-ndo, volin latámán kɛmɛ lediin a sianin n'kpungban kalamulan kɛmɛ leŋɔmpum o ɲɛm naa n sɔla o cɔwvo nin-ndon tɛɛn, mí yeemɛi bii ya a mun, o kon mí cua mun. N co n'vianaa lɛŋ o soondo nin o cɛi-kola-toandaa nuu kɔllo, volion co lebɛngu dí.»

²²Mí Yosue viam vannda, má kɔa cɔ́-cɔ́ o cɛi-kola-toandaa Akan-ndo nin, má komal dɛnndan lende kpafii. Ɲɛm mun va n'vianaa o cɛi-kola-toandaa nin, volion va lebɛngu dí.

²³Má cua ɲɛm mun kpow o cɛi-kola-toandaa nin, má yoo Yosue nda Israɛlla. O kon, má kɛsi mun Mɛlɛka o hɔl.

²⁴Mí Yosue nda Israɛlla kpow a bii Akan po Sera-o, má cua volin mun, doma kon, sianion, poaa Akan-nda a cuavaa ndɔa laandua, navaa ndɔa, sofɛlɛa ndɔa, saa ndɔa, cɛi-kola-toandaa ndɔɔ, a ɲɛm va ndu o ba-on kpow, má kɔa a nda o bóllo Akɔr nin.

²⁵Mí Yosue ɲuna ndu aa: «Le yɛɛ nɛ n tuisi yɛ naa dɛnɛ palaa vaa nuaa coo? Nɔm bɛɛ, Mɛlɛka co nɔm hau dɛnɛ palaa tuisi coo.» O kon, mí Israɛlla kpow a vii ndu a powtan, má vii vɛlɛ vanaa va ndu o ba-a a powtan, má loam nda sukɛí.

²⁶Má cuungiaa powtan bémboo Akan coo, powta lan la co vɔ lon háá paalen nden. O kon mí Mɛlɛka ɲuulul kɔl, mó mangala kɔltuw ndɔɔ. Lelan nda ke fonda kon diolan ni aa bóllo Akɔr (kon co dimio ni aa «Ból dɛnɛ palaa»), diola lan o nɔ háá paalen nden ni.