Read Kissi Yosue 9 Bible Online

Yosue 9 - Kissi bible

Yosue 9

¹Lɔ́ɔ́ masaa va Yurdɛn leeloo-a kpow a tuei maa Israɛlla cii Ai tɛɛmbuu-o, á va o pembei coo-a, á va o dɛngbɔɔ nin-nda a á va o mɛmma ihɛllan Mediteranee kɔngɔ-a, háá o pembon Liban coo, nda yɔŋnun yɛ Hitiia, Amoriia, Kanannda, Perisiia, Heviia a Yebusiia ni,

²mí nda kpow yiinan le Yosue a Israɛlla cɔlɔbaa.

³Mɛɛ vannda Kabaɔn bɛɛ a tuei mɛɛ Yosue tosa a kobio Yeriko a kobio Ai yɛ,

⁴má tuu le kɔlkalu vɔɔndo tosaa. Má cua ɲɛm dian, má dovi sofɛlɛa ndaa a bɔlɔla yuululan a á bɔlɔla yáwla mamɔila sɛɛsiɛila ndáà mingi suendi lan,

⁵má vownun samtala yuulula suendì-suendiaalan a volɔɔla siɔŋɛilan. Bulu va nda o ba le dioo-o va o kengelɛi kekew, o va o yomiyomiaa.

⁶Má kɔ komal Yosue a Israɛlla o dɔ́ɔ́ngɔ́ɔ̀ nin Kilkal, má dimul nda aa: «Lɛŋnde naa n cɛn nin-nden le bandu a nanu. O niaa lo naa n hin ni mì n yiinun kpemaa naa niaa.»

⁷Kɛ mí Israɛlla mulul nda aa: «Bɔɔle naa macɛlu niaa co icali ni, vɛ̀ɛ̀ naa n yii yɛnin kpemaa naa niaa?»

⁸Má dimul Yosue aa: «Buɛyaa nɔmnda naa n co ni.» Kɛ mí Yosue ɲuna nda aa: «Vanaa súú yɛɛ niaa co yɛ? Kuɛɛ nɛ niaa fula yɛ?»

⁹Má muli aa: «Naa buɛyaa nɔmnda, lɛŋnde naa n cɛn nin-nden le bandu a nanu. Kani Mɛlɛka Hala nɔmndo naa n tuei tɔ́ɔ́ ni, n sina dɛnnda kɔndɔfilta o tosa Esipte lan kpow,

¹⁰n sina vɛlɛ ɲɛ o tosa a masaa ŋiɔŋaa Amoriaa va o peo Yurdɛn leeloo-a-o, Sihon va masaa Hɛsbɔn-ndo a Ɔk va masaa Basan-ndo, ó va icali Astarɔt-o pɛɛn.

¹¹Kaasoŋaa kɔlkalua a vanaa co o lɛŋnde naalen nin-nda kpow a dimul naa ni aa naa n cua ɲɛm dian le keiyo dioo nɛi-tɛɛn, mì n hin niaa demul le niaa dimullo aa buɛyaa niaa naa n co ni, lelan n yiinun kpemaa naa niaa.

¹²Bulu naa ho va vɔ o tuw-tuw telen naa n va faŋanndo o naa lo le hunɔɔ nanu-o, kɛ tofa vɔ nihau mɛɛ o kengelan mó yomiyomi yɛ.

¹³Tofa vɔ mɛɛ bɔlɔla yáwla mamɔila sɛnɛila naa n pei a mɔiyan-ndan la sɛɛsiaa yɛ. Samtalan a volɔɔla naalan la siɔŋnun a kɔla levil-tan.»

¹⁴Mí Israɛlla bii ɲɛm dian ndan, kɛ a ɲuna Mɛlɛka le.

¹⁵Mí Yosue luei kɔlɲuloo a nda tɛɛn, mó yii kpemaa nda ndaa le nda mɛiyo yoomu. O kon, mí simlacia va nda tɛɛn-nda tiinda sɔɛi ken a mɛnanndo.

¹⁶Palɛi yaa hiovɔɔ o kpema nda yii kon nda ndaa-o kɔɔli, mí Israɛlla tuɛi maa pilacieaa ndaa vanaa kan va ni.

¹⁷O kon mí Israɛlla can kɔlan o kobila vanaa kan nin. O paale yàándɔlen, má tiiya Kabaɔn, Kefira, Beerɔt a Kiriat-Yearim.

¹⁸Kɛ Israɛlla del nda coo a cɔw le, kani simlacia ndaa ndáà cii nin nda mɛnalan o diola Mɛlɛka lan, Hala Israɛlla pɛɛn. Mí Israɛlla kpow a va sɔɔn pɔmbɔn dimio a simlacia.

¹⁹Kɛ mí simlacia kpow dimul vannda aa: «N cii nda mɛnalan o diola Mɛlɛka Hala Israɛlla, lelan n tiw lɛhau ba mì n tosal nda dɛnɛ vɔɔn te.

²⁰N mɛinin nda yoomu, yɔŋii kɔltuw Mɛlɛka-o tol naa coo le mɛnalan naa n mɛnalan nda-o. Kɛ ɲɛ naa n tosalnin nda-o co hoo ni:

²¹À lonin yoomu, kɛ à vanin naa yɔmnde kilullo ma va naa mɛnndan kondullo maa mɛɛ simlacia naa ndáà mɛnalan nda yɛ.»

²²Mí Yosue veelu vanaa kan Kabaɔn, mó ɲuna nda aa: «Le yɛɛ niaa hui yɛ naa mí la dimul naa còòlan maa nɛɛ levil niaa fula ni? Nduyɛ naa tɛɛn niaa co icali ni.

²³Le fɛɛn a fɛɛn nin, vanaa dangaa niaa co ni. Cɛlen le cuu lɛnin niaa kuee lɔ́ɔ́-lɔ́ɔ̀ le, la vanin vanaa kialaa iyɔmnda a vanaa vilia mamɛnnda le Cɛi-Hala nuu.»

²⁴Mí Kabaɔnnda mulul Yosue aa: «Nuaa naa n tuei ni maa Mɛlɛka Hala nɔmndo dimul Moise vana ndɔ baalaa ni le niaa lɛŋnden nden kpow keo, mì la diw vanaa niaa komalnin lenin-nda kpow. Lelan siòònde bii naa taw a niaa le yoomula naalan ni, mí n tosa lende.

²⁵Kɛ sisa, n co nɔm o ba bɛngu, bii naa mɛɛ o hɛnan nɔm, mó sandu nɔm o hɔl-lɛ.»

²⁶Mí Yosue bii nda lende, o cɛl mì Israɛlla diw nda le.

²⁷Mó baŋ Kabaɔnnda yɔmnde tingɔɔ a mɛnndan vilio le Israɛlla a le fonda-loamaa-lasálà Mɛlɛka-o o fonda ndu Mɛlɛka hɛli-o. Háá paalen nden hau, baala kon cuavaa ndaa imamaa co tosaa ni.