Read Kissi 1Timote 6 Bible Online

1Timote 6 - Kissi bible

1Timote 6

¹O bɛnda mì vanaa-vanaa co cɛa ke vanaa ndaa bɛndua bɛɛlen mɛɛ o bɛnda yɛ, yɔŋii vannda soo sɔɔn vɔɔnndon a Hala naa a á pɛɛkula naalan o kɔɔ.

²Cɛa co vanaa ndaa bɛndua laalan-nda o ba-a bɛnda mà kɛɛ nda bɛɛlen ke le tùú nda co puapilɛa ndaa o laalanndo nin-ndo le. Kɛ o bɛnda mà tosal nda baalaa ɲɛkɛndɛi le tùú nda co vanaa laalaŋaa nda kaola-a o, kani o nda lo tɔnɔ vali nda kon co lakɔ ni. Sɔɔn n nɔ le pɛɛkoo mà sila vannda-on n co mun ni:

³te vanndo pɛɛku pɛ vannda pɛɛku celen, mò co ɲɛ pilɛ a sɔɔn diandan Maalii naa Yeesu Krista-on te, mò ve vɛlɛ ɲɛ pilɛ a kpɛɛku naa n nɔ a laalanndo o kɔɔ-o le,

⁴mɛɛ yongaa pɛ ndu lende nin ni, o sínà ɲɛ-ɲɛ le. Yeemɛi o nɔ lende le sɛɛngianndan a le diomndan hiŋanndo o sɔɔn pum coo ni. Nduyɛ o kon nin paŋalianndan, sɛɛngianndan, yeowlan, sɔɔn vɔɔnndon tuuvo

⁵a sɛɛngiannda cuu le lan la fula ni, la vanaa yiyannda ndalan la laasian, a sínà lɛ toɲaa le-a pɛɛn. Vanaa kan a co yiyanndo maa Hala laalanndo yɔngù vana ɲɛ-sɔlaa ni.

⁶Nduyɛ i co toɲa maa Hala laalanndo, bolofaa bɛndoo co kon le vanacieo ni, te n hini pɛ kɔl a o naa n nɔ o ba-o.

⁷Kani n hin a ɲɛ-ɲɛ o ba o ceendo ho coo le, n kuenin vɛlɛ a ɲɛ-ɲɛ o ba le.

⁸Kɛ te n nɔ pɛ baloo a volɔɔla cuɛinanndan, kon tiw.

⁹Kɛ nduyɛ, vanaa co bolofaa yeemaa-a a co delɔɔ o dɛɛniaa nin, mà va hawvo o yaŋɔɔlen, a co delɔɔ o tuula vɔɔnda idiɔmndan taw nin, la yaa vannda o ɲánndávàà mì ɲɔɔn kpow n cuu nda o laba lan.

¹⁰Kani kaola n'volio co dumbule dɛnnda vɔɔnnda súú-súù ka ni. Nduyɛ, mɛɛ yeemɛi ken i bii vanaa pum háá, má mal laalan ndaa, mí sangala bɛndulan la luɛi o kɔlta ndalan nin.

¹¹Kɛ nɔm vana Hala-o, kpakpala dɛnnda lan kpow, mà kindin le dɛnɛ sandaa a hɛnan Hala-o tosaa, a laalanndo, a kaolaa a á biuvɔnndo, mà kindin vɛlɛ le vaa vana sinaa ikɛndɔɔ a ndu.

¹²Cɔlɔba cɔlɔba toɲaa a laalanndo. Kafalan cinda lɔ́ɔ́-lɔ́ɔ̀, kani le ndu n sɔla veeloo telen n cɔm laalan nɔmndo seiya taw o hɔl-lo ni.

¹³I co nɔm ɲuna Hala o hɔl, o yɔngu ɲaa yoomaa kpow yoomoo-o, a Yeesu Krista o hɔl, ó soli seile kɛndɛlen Pɔnse Pilate o hɔl-lo,

¹⁴mà mandan a sila n sɔla hoo-o, o va a isɔw le, te kon te mì vana dimi káà nɔm vɔɔndo le, háá paale Maalii naa Yeesu Krista cɔmnunnin-nden.

¹⁵Kon tosannin telen Vana Duaa, Vana hiow masalen-ndo, Masa hiow masaa kpow-vo, Vana kùndaa hiow vanaa kùndaa kpow-vo kelu-o.

¹⁶Ndu pilɛ kpé co yoomu le fɛɛn a fɛɛn ni. Ɲɛ-tengaa o co nin-ndo, vana-vana nɔla mà sɔɔnguu ndu ikɛi le. Vana-vana ci vɔ Mɛlɛka le, nduyɛ vana nɔla mà ce ndu le. Màá o sɔla bɛɛlen a kpaaya fɛɛn-fɛɛndo! Amiina!

¹⁷Dimul vanaa nɔ bolofaa sunsun-nda maa nda pila a cannun ɲɛ le, dimul nda maa a kɛsì kɔllo o bolofaa fondoo ho coo le, kɛ a tiindàn Hala, o yɔngù naa ɲɔɔn kpow mì n va taw-vo, haliko mi n de mun tɔnɔ.

¹⁸Dimul nda mà a tosa dɛnɛ kɛndɔɔ, mà tosal vannda kɛndɛi taw, mà cɛl le vanaa celen ɲɛm ndan piɔwvo.

¹⁹O kon a cuungiaanin bolofaa vanin le nda lɔ́ɔ́-lɔ́ɔ̀ siɔdii laci-o, mà sɔla cinda kpeekpeiyo.

²⁰Nɔm Timote vana hɛnan ya-o, manda ke n sɔla-o ɲɛkɛndɛi. Kpakpala sɛɛngiannda fondola yɔngu vana laalan te lan, mà mal sɔɔn fondon vannda veelu aa dɛnɛ sinaa-on.

²¹Nduyɛ, vanaa pum a va yiyanndo maa a nɔ dɛnɛ sinaa, le hee nda mal laalan nda nɔ-o ni. Mbɔ̀ màá kɛndɛi Hala-e i va niaa coo fɔ́!