Read Kissi 2Timote 2 Bible Online

2Timote 2 - Kissi bible

2Timote 2

¹Nɔm yɛ niko, po nuu, luei yoomuan le kɛndɛi naa n sɔla Yeesu Krista o ba-e.

²Ɲɛ n tuei ya dimio seiya taw o hɔl-lo, pɛɛku vanaa n laalan-nda ndu, a tiwnin ba mà pɛɛku vɛlɛ vanaa celen ndu-a.

³N sàngà latulu mɛɛ vana cɔw kɛndɛ Yeesu Krista-o sàngà nuaa yɛ.

⁴Vana cɔw co baalaa-o bɛnda mò vow balan o sɔɔn celen nin te, te o yeema pɛ mò tosa ɲɛ hɛnan vana co ndu bollen-ndo.

⁵Lende koni, te vanndo kindin pɛ le ɲaanɔnndo daama, o sɔla sala le, te o co mò ɲaanun mɛɛ o bɛnda yɛ le.

⁶Vana váà sanga taw-vo bɛnda fɔlɔn mò sɔla kundaa o ɲɛm o kow-von nin ni.

⁷Keela kɔllo o sɔɔn ya co nɔm dimullo-on coo, kani Mɛlɛka kenin nɔm kɔlkaloo o dɛnndan kpow nin.

⁸Loonun a Yeesu Krista o kɔɔ, o fula o polale David len nin, mó tendul-lo, mɛɛ Yoongu Kɛndɛ ya co dimio-o co yɛ.

⁹Le Yoongu Kɛndɛ kon ya co sangaa sɔlaa nuaa ni, mì va vɛlɛ o yɔlɔn maa vana tɛɛmbuu dɛnɛ pum-ndo. Kɛ sɔɛi Hala-e co i yiyaa le.

¹⁰Lelan i co dɛnndan kpow biuvɔn le dɛnɛ kɛndɛ vanaa Hala hɛli-a, haliko mi nda bɛɛ sɔla cindaa, o fula Yeesu Krista o ba-o, mà sɔla vɛlɛ biilu fɛɛn-fɛɛndo.

¹¹Toɲaa sɔɔn mun n co ni: «Te n vi pɛ latulu naa Yeesu-a, n vanin vɛlɛ yoomu naa ndaa.

¹²Te n biwnun pɛ, n tosanin vɛlɛ masalen naa ndaa. Te n kɛɛ pɛ ndu, ndu bɛɛ kɛɛnin naa.

¹³Te naa n lo o lediom coo le, ndu ndu lonin o diomnden coo, kani ndu pila sɛɛngiannin te.»

¹⁴Va nda dɛnndan ndan yiyalanndo, mà va nda silaa Hala o hɔl vakpa maa a kpakpala sɛɛngianndan o diomndan lapum coo, la nɔ tɔnɔ le lan, kani tɛɛmbuuo koni la tɛɛmbuu vanaa yaŋ ndan nilan-nda ni.

¹⁵Kindin mà cɔmnun Hala o hɔl maa vana baala fula kɔlɔ loo, o siɛmbula bii loo, mà va sɔɛi toɲɛi dimio.

¹⁶Vow sondoo o sɔɔn fondon idiɔmndon nin te, kani sɔɔn mun n tosa ni mì vannda cɔɔlu Hala faaŋian.

¹⁷Sɔɔn ndan co macoaa mɛɛ paw kolonndo co nuaa yɛ. Himene nda Filɛte co vanaa kan ni,

¹⁸a faŋan kan toɲaa kɔɔli, má va dimio maa tendul naa cuu nin yɔŋnɔn, nduyɛ a co laalan vanaa pum faŋaa o fonda ndaa.

¹⁹Kɛ nduyɛ, sɔɔn kpeekpeiyun Hala tɔl mì n kɛsi tumndo-on n co mun ni aa: «Mɛlɛka sínà a ndɔ-a», nduyɛ: «Vana-vana dimi pɛ maa o Mɛlɛka-o o co ni, mɛɛ o màl dɛnɛ vɔɔndo.»

²⁰O cɛi bɛndoo nin, o co ko ɲɛm-laandun nda toosiaa a sianion-ndon, te kon te n nda toosiaa a volin humbon daama-on te n co le, kɛ n pum toosian a yɔmnde, mì n pum toosian a puulu bɔ́wvo. N pum le makola sɔvɛlan solinndo a mun, n pum yɛ le kpekula yɛ́-yɛ́lan.

²¹Lelan te vanndo dindin pɛ le dɛnnda ya dimi lan ndan kpow, o siŋnun volɔɔ baalaa le makola sɔvɛlan, vana vana ndɔ bɛndoo solin mako-o pɛɛn, o toosian le dɛnɛ kɛndɛ súú-súù ka tosaa-o.

²²Màl yeemɛi ifelengiyɛi, mà nuwviaa dɛnɛ sandaa a laalanndo, a kaolaa a á kɔlɲuloo niaa vanaa co Mɛlɛka biiloo a kɔl diandaa-a latulu.

²³Vòw sondoo o sɛɛngiannda fondola idiɔmndan nin te, kani lan la hun a sɔngɔlan ni.

²⁴Nduyɛ vana baala Mɛlɛka-o bɛnda mò va vana lasɔngɔ le. Kɛ o bɛnda mò va vana sɔvɛɔ a vannda kpow, mò tiwba vannda pɛɛkoo, mò va vana biwnun dɛnndan-ndo.

²⁵O bɛnda mò mingi vanaa co ndu simullo-a o nɛi a kɔlɲuloo, mò nɔ o kɔl maa Hala co tosa, mà mangalan, mà sina toɲaa,

²⁶o kon mà muungu o nda pila nin, mà hɛlun yaŋɔɔla nda va nin-ndan, la ɲina vɔɔndo toosiaa haliko mi ndáà tosa yiyan ndɔɔ lan.