Read Kissi 2Timote 4 Bible Online

2Timote 4 - Kissi bible

2Timote 4

¹I co nɔm sila Hala hɔl a Yeesu Krista o hɔl kpendekele, o co hunɔɔ kɔɔsɔ vanaa co yoomu-a a vanaa vi-a kiolɔɔ-o, mì sila nɔm o diola hunɔɔ ndɔɔ a o diola Masale ndɔlen,

²tiiyal vannda sɔɛi Hala-e. Dimul nda ndi o telenndan kpow bɛngu, o va telen kɛndɛ, o va telen vɔɔn, soo vannda mà cɔm tɛɛmbuulan, mà luei nda yoomuan, mà biwnun, mà biwnun pɛɛkoo lɔ́ɔ́-lɔ́ɔ̀.

³Kani telen pum co hunɔɔ tiiya, kaannde kpeekpeile Mɛlɛka len le hɛnannin vannda le, kɛ nda pila vanin yeemɛi le ɲɛ hɛnannin nda-o tueyɔɔ o pɛɛkoo.

⁴Nduyɛ, a mululnin Mɛlɛka kɔɔlan, mà muli hɔlla le bundɔn lacòòvan nilan yaŋɔɔ.

⁵Kɛ nɔm nɔm, va vana taasio o dɛnndan nin kpow, mà biwnun sangalan, mà tiiyal vannda Yoongu Kɛndɔɔ, mà tosa vali n nɔ le tosaa-o maa vana baala Mɛlɛka-o.

⁶Ya ya, telenndo tiiya mì vannda soli ya sálà. O lo nin ɲɛ-pɔmbɔ cobe mì faŋan o ceendo ho coo.

⁷I kindi a labɛɛla, mí tiindan Mɛlɛka, i cii vali va le ya-o tosa, mí kindin, mí lo o laalanndo coo.

⁸Nduyɛ, Mɛlɛka cii vɔ̀ngɔ̀ nuu manda. Ndu Mɛlɛka sandaa kialu yamɛi-yo yɔngunin ya ndu paale o kialunin vannda iyama len. O co ya kínɛí le o yɔngunin ndu le, kɛ vanaa cumnin hunɔɔ ndɔɔ a kaolaa-a kpow o yɔngunin ndu ni.

⁹Kindin mà keleŋa hunɔɔ ya ikɛi,

¹⁰kani Dimas kaola ceendo ho mó faŋan ya kɔɔli, o kɔɛ Tesalonike, Kresensa kɔɛ Kalasii, Tite kɔɛ Dalmatii.

¹¹Luke ndu pilɛ kpé co ya ikɛi ni. Dimul Marke mì la hin niaa ndu, kani o nɔla mò mala ya o vallo nin.

¹²I vem Tisike le kɔlan Efɛs.

¹³A va pɛ hunɔɔ, a cuu ya doma bɛndu ya mɛi Troas o Karpus lo-o a sɛbɛlan, kɛ taama-taama sɛbɛla nda toosiaa a yáwla visia lan.

¹⁴Alɛksandre siɛɛkinɔɔ tosal-la dɛnnda vɔɔnndan taw. Mɛlɛka mingulnin ndu mɛɛ dɛnnda ndɔlan la co yɛ.

¹⁵Nɔm bɛɛ mandan a ndu dɛ, kani o simul bɔɔ sɔɔn nan.

¹⁶Paale tasele ya va kɔɔsɔɔ len, nda kpede, vana-vana lo ya ikɛi le, má mal-la kpow. Kɛ màá Mɛlɛka loonun ɲɛ nda tosa kon-ndo le!

¹⁷Mɛlɛka mala ya ni, mó luei ya yoomuan, o kon mó tosa mí tiiyal vannda Yoongu Kɛndɔɔ mɛɛ o co faw yɛ, mí vanaa sina Hala le-a kpow a tuɛi. O kon mí Mɛlɛka baŋa ya, a dii ya le.

¹⁸Nduyɛ Mɛlɛka ciindiaanin ya o dɛnnda vɔɔnndan kpow nin, mò manda ya le luɛyɔɔ o Masale ndɔlen nin o halataala. Màá o sɔla biilu fɛɛn-fɛɛndo! Amiina!

¹⁹Yil-la Priska nda Akilas, mà yil-la vɛlɛ yungu Onesifɔr-o.

²⁰Esaste lo Korɛnte, i mɛi Trofime a nàá Milɛt.

²¹Kindin mà hin lɔ́ɔ́ pá mì sialten le tiiya. Kubulus, Pudans, Linas, Klodia a pualpilɛa kpow a yil nɔm.

²²Màá Mɛlɛka manda kɔl nɔmndo! Màá o tosal niaa kɛndɛi! Amiina!