Read Kissi Tite 1 Bible Online

Tite 1 - Kissi bible

Tite 1

¹Ya Pol, ya vana baala Hala-o a kiilanɔ Yeesu Krista-o. I sɔla vomɔɔ haliko mi vanaa Hala hɛli-a sɔla laalanndo, mà sina toɲaa mɛɛ o bɛnda o laalanndo nin yɛ,

²mà sɔla kɔlkɛsiaa le yoomu fɛɛn-fɛɛndo sɔlaa. Hala, o dimi lacòòva loo dimi sɔɛi yoomu kalaa kabi paandu ni.

³Nduyɛ, mɛɛ telen o kelu-o tiiya, mó cɔm sɔɛi ndɔɛi o yɔngu ya le vannda tiiyallo-e mɛɛ ndu Hala Vana naa Ciindiaa dimi yɛ.

⁴I co nɔm Tite sɛbɔɔ ho sɛval, nɔm po ni kpeekpeiyo o laalan pilɛ naa n nɔ-o nin. Màá Hala Fuɲaa a Yeesu Krista vana ciindiaa naa ke nɔm dɛnɛ kɛndɔɔ a kɔlɲuloo!

⁵I mɛi nɔm Krɛte haliko ma bɛɛndiaa dɛnnda co le bɛɛndiaa lon-ndan. O kobi oo kobi nin, mà hɛli simlacia vanaa laalannda tɛɛn mɛɛ ya sila nɔm yɛ.

⁶Simlacinɔ vanaa laalannda bɛnda mò va vana yaalan too, o bɛnda mò nɔ lanɔɔ ndu pilɛ. Mì cuavaa ndɔa va vanaa laalannda, o va cuavaa vannda co cɔu kela vɔɔndo o hɔl-la le, te kon te mà kɛɛ sɔɔn biyɔɔ-a le.

⁷Nduyɛ, le mɛɛ simlacinɔ vanaa laalannda bɛnda mò nɔ hɔlten baala Hala-o coo yɛ, o bɛnda mò va vana yaalan too: o va vana yonga le, o va vana nɛi kɔl itambu loo le. O va vana yɔngun mɔiyan-ndo le, o va vana lasɔngɔ le, o va vana hɔlte ɲɛ-sɔlaa le.

⁸Kɛ mò va vana caa mialla biyɔɔ-o, vana yeema dɛnɛ kɛndɔɔ tosaa-o. Mɛɛ mò va vɛlɛ vana kɔlkaloo, vana sandaa, vana dendu Hala o hɔl-lo a vana tiwba kɔl ndɔɔ biyɔɔ-o.

⁹Mɛɛ mò yiinun a diom Hala kpeekpeiyo mɛɛ o sɔla pɛɛkoo yɛ, haliko mo tiwba vanaa celen yoomuan lueiyo o pɛɛkula toɲalan nin, mò va vanaa sɛɛngiaa mingio o nɛi.

¹⁰Kani vanaa bɔɔ-bɔɔ co Yuifia laalan-nda tɛɛn, vanaa nila kalua, vanaa sondola yeelɛiya a vanaa huiyaa n'vannda nda co ni.

¹¹Mɛɛ mì la kinda nda sondolan, kani a co yungulan kpede pesipesio a pɛɛkula bɛnda le lan le ɲɛm lakafan sɔlaa.

¹²Vana-tɛɛngaa-diom Hala-o pum dimi ni, Keretiinɔɔ pɛɛn aa: «Vanaa lacòòvaa Krɛtia co lɔ́ɔ́-lɔ́ɔ̀ ni, maa visia biyaa nda co ni, vanaa siɛlɛyaa yeema dioo tuŋ-nda.»

¹³Nduyɛ, toɲaa ɲɛ o dimio-o co ni. Lelan, soo nda o lani ɲɛkɛndɛi, haliko ma sɔla laalan kpeekpeiyo,

¹⁴o kon mà faŋal talela lacòòvala Yuifia hɔlla, silala vanaa mulul kan toɲaa kɔɔ-a pɛɛn.

¹⁵Ɲɛ-ɲɛ co o diandaa le vanaa diandaa, kɛ ɲɛ-ɲɛ dindu le vanaa co a nɔɔlɛi Mɛlɛka o hɔl, mà kɛɛ laalan nda le, kani kɔlkalu ndaa a yiyan ndaa kpede la dindu le.

¹⁶Vanaa kan a tiwba mà dimi maa a sínà Hala, kɛ mà kɛɛ ndu o dɛnnda ndalan nin. A nɛinun bɔɔ vannda, vanaa nila kalua nda co ni, a tiwba dɛnɛ kɛndɛ kɛ́-kɛ̀ tosaa le.