Read Kissi Hebreea 12 Bible Online

Hebreea 12 - Kissi bible

Hebreea 12

¹Seiya balu naa sɛ́lɔ́ɔ́, lelan n viòwnún ɲɛ co naa kuunaa kɔlan-ndo a haki simbulun naa-o, mì n ɲaanun háá o kilta naalan mɛɛlulan.

²N tofan Yeesu tuŋ. Ndu o ba laalanndo kandun ni, ndu o ba o mɛɛlu ni. Mó cɛl le vuo o yɔm singafilaa coo, o ci siɛmbula lan ɲɛ-ɲɛ le. Kani o va ɲaale o va hunɔɔ sɔla-o cɔu, nduyɛ sunsun o co icali Hala o ba kɛndɔɔ coo.

³La yiyan ndɔ, mí vanaa lahakia simul ndu. Kɛ mó biwnun. Lelan, la vu n'dial te.

⁴Kani la simul-lɔ hakio háá piɔ́mndo le.

⁵Vɛ̀ɛ̀ la pɔɛɛnun sɔɔn Hala dimul niaa le niaa yoomuan lueiyo maa cuavaa ndɔ-on? «Po nuu, Mɛlɛka saangiaa nɔm pɛ le dɛnɛ vɔɔn n tosa-o, ca sɔɛi ken sɔɛi taanin te. Te o soo pɛ nɔm, vu n'dial te.

⁶Kani vànà Mɛlɛka kaola-o, ndu o saangiaa le dɛnɛ vɔɔn ndɔɔ ni, cuavaa ndɔa o lɔaa a sionnden ni.»

⁷La biwnun sangaa, le niaa silaa ni. Maa cuavaa ndɔ Hala co niaa biyɔɔ ni. Kani ɔ́ɔ̀ hɔ́ɔ́ fuɲa ndɔ saangiaa le tɛɛmbuu ndɔɔ loo?

⁸Te la sɔla sangaa le tɛɛmbuula niaalan maa cuavaa ndɔa le, mɛɛ la co cuavaa ndɔ kpeekpei le.

⁹Naa n nɔ fuɲaa n'falua, a va pɛ naa saangiaa le tɛɛmbuula naalan, n ke nda bɛɛlen. Vɛ niko n tuisin a fuɲaa naa Hala, mì n va yoomu le?

¹⁰Fuɲaa naa nda, le telen bingi koni ndáà saangiaa naa le tɛɛmbuu naa ni, a va yiyanndo maa lende ndóò naŋ ni. Kɛ Hala ndu, le naŋɔɔ naa o saangiaa naa le tɛɛmbuula naalan ni, haliko mi naa bɛɛ n dendu maa ndu.

¹¹Sanga oo sanga nda tuisi pɛ vanndo coo le tɛɛmbuu ndɔɔ, o telen kon bɛngu, kɔllo vana kon tambu ni, vana niŋ kɔl te. Kɛ o kon kɔɔli, vana kon sɔla kɔlɲuloo, o tosa dɛnɛ sandaa.

¹²Lelan la siɛndi bala niaala sangɛilan, mì la simi vula co niaa ɲiiyaa lan.

¹³La toosiaa nɛila sandaalan le pelun niaan, haliko vana co tindaa-o mal nɛiyo le, kɛ mò sengu.

¹⁴La kindin le vaa o kɔlɲuloo nin a vannda kpow, mì la va a diandaa. Kani te o co o dindinndo nin te, vana-vana cinin Maalii le.

¹⁵La caa dɛ! Vana-vana fula o kɛndɛi Hala-e bɛngu le. Vana-vana va maa tɔlɔɔ vɔɔn vul o tɔlɔɔ kɛndɔɔ tɛɛn mò tɛɛmbuu ndu-o le.

¹⁶La caa taw! Màá vana-vana va niaa tɛɛn vana laasianndo mò kɛɛ ɲɛm Hala-on yii luɛyɔɔ maa Esau le, kani le ɲɛdiaa dio lepilɔɔ kpé, mó pisi fonda ndɔ ikaasonyaa.

¹⁷La sínà maa o mɛɛlulan, telen ndóò yeema le duaa sɔlaa fuɲa ndɔ o ba-o, o sɔla fonda le. A caŋ o caŋndo kpow, fuɲa ndɔ tiw lɛ ba diomndo yɛlɛmaa le.

¹⁸Niaa, o co ɲɛ vana nɔla pilanndo-o le niaa sɔɔnguu ikɛi le, yinnde bɛndule ve lon te, ɲumma n'kpungba ma ve lon te, ɲumma bɛndu ma ve lon te, hoeyii fùkù-fùkùi ve lon te,

¹⁹bulu ve isɔɔ lon te, vanaa tui vana isɔɔ lon te. Israɛlla tueyɔɔ diomndo pum, a cɛl lɛ le diom celen nilan yaŋɔɔ le.

²⁰Kani ndáà cɛl le dimio aa: «Vana-vana pilan pɛ pembei, o va bɛɛ cɔloo ni, o bɛnda mà vii ndu a powtan, mò vi.»

²¹Siòònde ndíì bii vana a ɲɛ nda va cɔu-vo ni. Mí Moise dimi aa: «Siòònde co ya bɔɔ, i co ɲiiyaa.»

²²Kɛ mí la sɔɔnguu o pembei Siɔn a o kobi Hala nɔ yoomoo o ba-o ikɛi, Yerusalɛm co o halataala-o, nɛɛ mɛlɛkaa co sɛ́lɛ́ a cuu cɔm te-a co-a.

²³Mí la sɔɔnguu o bɔŋan cuavaa tasea Hala-a, a diola ndalan la co lasɛvaalan o halataala-a pɛɛn, mí la sɔɔnguu Hala co vana kialaa iyamaa le vanndacieea-o ikɛi, mí la sɔɔnguu kɔlta vanaa sandaa tiwnun-nda ikɛi.

²⁴Mí la sɔɔnguu Yeesu ikɛi, o co kpema sɛnɛiyo a kooma ndɔma fasaŋan-ndan tɛɛn-ndo, má co sɔɛi hiovɔɔ kooma Abɛl-lan coo-an.

²⁵La caa dɛ! La kɛɛ diom vana co sɔɛi o niaa lo-o le. Kani vanaa kɛɛ sɔɛi vana va nda kanalanndo o lɛŋnden coo-o-a helun dɛnɛ palaa ndóò bɛnda le nda delɔɔ coo-o le. Konin te naa, vɛ̀ɛ̀ naa n hialun yɛnin, te n mulul pɛ diom vana fula o halataala le naa kanalanndo-o kɔɔ?

²⁶O paandoo nin, mí diom ndɔɔ tosa mí lɛŋnden le ɲiiya. Sunsun yɛ, o yiilu naa kpemaa aa: «I co vɛlɛ tosa mì lɛŋnden le ɲiiya, kɛ halataalaa vɛlɛ bɛɛ.»

²⁷Dimi kon lende aa: «vɛlɛ» kon co dimio ni maa ɲɛm cɔwnun-ndon, n nɔla tambeiyon, mun hiawnin. O kon mì ɲɛm nɔla itambu loon mun lo.

²⁸Lelan, le mɛɛ naa n sɔlanin masale hiilunnin te len yɛ, n sinàn kɛndɛi mì n melnun Hala balika, mì n tosalan ndu baalaa mɛɛ hɛnan ndɔɔ co yɛ, o siòònde a o ndu vou nin.

²⁹Kani yinnde tɛɛmbua len Hala naa co ni.