Read Kissi Hebreea 13 Bible Online

Hebreea 13 - Kissi bible

Hebreea 13

¹La hiow laci a kaolianndo vellaa-velle maa n'puapilɛ.

²La pɔɛɛnun le mialla biyɔɔ le, kani o mialla biyɔɔ vanaa pum a yiya mɛlɛkaa ni, a ve sina le.

³La yiyan vanaa co o kaasolan-nda coo maa niaa ndaa co o kaasoo ni, mì la yiyan vanaa nda co saangiaa-a coo maa mɛɛ nda va niaa bɛɛ saangiaa yɛ.

⁴Vannda kpede bɛnda mà ke nɔu bɛɛlen, mì vanaa co o nɔ̀u nin-nda, vana-vana lo o lediom coo a vanndo pilɔɔ vellaa-velle. Kani Hala kialunin yamɛi vanaa laasiannda a vanaa suundaa.

⁵La káolà volion mò hiow ɲɛ-ɲɛ fee le, kɛ la hinì kɔl a ɲɛm niaa nɔ-on. Kani Hala pila dimi aa: «I kɛɛnin nɔm te, i melnin nɔm te.»

⁶Lelan n tiwba mì n dimi a laalanndo aa: «Mɛlɛka co vana co ya malaa-o ni, siòòŋii co ya a ɲɛ-ɲɛ le. Yɛɛ vanndacieea nɔla yɛ ya yɔŋ?»

⁷La loonun ndɔ a simlacia niaa paandua, a tiiyal niaa sɔɛi Hala-e-a pɛɛn. Mì la dɔw mɛɛlula ndalan taasi, mì la tuula laalan ndaa.

⁸Mɛɛ Yeesu Krista va cɛi yɛ, lende koni o co hau ni, lende vɛlɛ koni o vanin le fɛɛn a fɛɛn ni.

⁹La del pɛɛkula súú-súù ka kɔɔli le. Kani o naŋ mì kɔllo sɔla kpaayaa o kɛndɛi Hala-e nin, kɛ o va a tɔŋnda ɲɛdiaa le. La mala vanaa bii lan-nda le lan.

¹⁰Fonda-loamaa-lasálà naa n nɔ-o, vanaa-solia-lasálà co vallo o cɛi-kola-toandaa diandaa nin-nda bɛnda mà de ɲɛ solin sálà lecoo-o le.

¹¹Kani kooma cɔlua nda soli sálàá le hakio-a bolle vanaa-solia-lasálàá co cua ni, mò luɛi a man o fonda diandaa-diandaa le sálà malaa lahakio solio. Kɛ mà kɔ lom cɔlua kalaa kpow o dɔ́ɔ́ngɔ́ɔ̀ kɔɔli.

¹²Lelan Yeesu bɛɛ sanga o kobio kɔɔli ni, mó dindi vannda a kooma ndɔma ndu pila-an.

¹³Mɛɛ n kɔnnun o ndu lo o dɔ́ɔ́ngɔ́ɔ̀ kɔɔli, mì n cɛlnun sɔɔlɛmaa maa ndu.

¹⁴Kani n nɔ calta fɛɛn-fɛɛn o ceendo coo nanu le, ciee bɛndu co naa laci-o naa n co nuwviaa ni.

¹⁵N solulun Hala sálàlan o ndu sangalaa nin, condon ndu solullo o diola Yeesulan pɛɛn.

¹⁶La pɔɛɛnun kɛndɛi tosaa a maalianndo vellaa-velle le, kani sálàla vaa lende la hɛnan Hala ni.

¹⁷La bii diomnda simlacia niaa mì la tuisin nda o labɛngunin. Kani a nɔ niaa hɔlten coo le kona nda hun dɔawnunnin o Hala lo-o. Lelan te la tuei nda pɛ diom, a tosa baala ndaa a ɲaaloo, o ve a cɛɛŋɔn te, la sɔla mala oo mala o ken nin te.

¹⁸La piɛi Hala le naa. N laalan maa n dendu kɔltan, nduyɛ yeemɛi co naa mì n kela kela kɛndɔɔ o dɛnndan kpow nin.

¹⁹Kɛ taama-taama, la piɛi Hala le ya mì yala niaa muungu tɛɛn.

²⁰Hala yɔngù naa kɔlɲuloo ni. Mó mingi Maalii Yeesu, vana mandaa n'saa bɛndoo, yoomu fulaa vanvílɛ́iya tɛɛn. Mí kooma sálà ndɔɔ ma siŋnun sabuo le kpema fɛɛn-fɛɛndo.

²¹Màá Hala kon ke niaa kpaayaa le dɛnnda kɛndɛla súú-súù ka tosaa, mì la nɔla hɛnan ndɔɔ tosaa. Màá o mala naa o diola Yeesu Krista lan mì n tosà hɛnan ndɔɔ. Màá biiloo va le ndu Yeesu Krista le fɛɛn a fɛɛn! Amiina!

²²Puapilɛa nia, i co niaa tɛɛlɔn mì la yaŋ nilan ɲɛkɛndɛi o sɔɔn ya sɛval niaa mun le niaa yoomuan lueiyo-on. O co bɛɛ sɔɔn bɔɔ le ya sɛval niaa le.

²³La sínà maa Timote puapilɛ naa sɔla malɔɔ. Te o yala pɛ tiiya nanu, n kɔanin niaa yilɔɔ naa ndu.

²⁴La yil simlacia niaa a vanaa laalaŋaa tɔ̀a kpow. Vanaa laalannda Itali yil niaa.

²⁵Màá dɛnɛ kɛndɛ Hala-o va niaa coo kpede!