Read Kissi Nsaki 3 Bible Online

Nsaki 3 - Kissi bible

Nsaki 3

¹Puapilɛa nia, la síŋnùn vanaa pɛɛkaa sɛ́lɔ́ɔ́ taw le, kani la sínà maa naa co pɛɛkoo-a, yamɛi nɛi i hiawnin ikalu.

²Kani naa vanaa bɔɔ-bɔɔ n co boŋilan o nɛilan taw coo. Te vanndo boŋ o sɔɛi sondoei nin te, mɛɛ vana peelun o dɛnndan nin-ndo co kon ni, o nɔla vɛlɛ mò manda dialun ndɔn kpow.

³Kani te n luei pɛ kalafoo soa o lasondo haliko ma tosa ɲɛ naa n yeema-o, mɛɛ dialun ndan kpow naa n co hiŋ kon lende ni.

⁴La tofa vɔ vɛlɛ dɛ̀ndɛ̀lan, la co bɛɛ labɛndu-bɛndu nuaa, mì hoeyii fùkù-fùkùei va lan ɲindɔɔ, ɲɛ-pɔmbɔɔ pum nuaa kínɛí ɲindu lan mɛɛ vana tɛɛngaa dɛ̀ndɔ̀ɔ́ pila yeema yɛ ni.

⁵Lende koni i co a diɛɛmulen ni, dialii pɔmbɔɛi le co ni, kɛ mì le kuundian le sɔɔn bɛndon taw tosaa. La tofa vɔ mɛɛ yinnde pɔmbɔlen le loam bundɛ bɛndoo yɛ.

⁶Nduyɛ, diɛɛmulen bɛɛ yinnden le co ni. Ceen dɛnɛ sandaa lepɛŋndo le co o dialun naan nin ni. Le co diallon kpow nɔɔliaa mì le va vanacieeyɛi nɛi kpow lomɔɔ. O Ɲánndávàà yinnde ndɔle len le fula ni.

⁷Kani vanacieo tiwba mo tosa hɛnan ndɔɔ visia yondoa, yowva, ɲaa sasun lɛŋ-nda a visia peea súúlan kpow coo, nduyɛ mò tosá hɛnan ndɔɔ nda coo.

⁸Kɛ vana-vana tiw-vɔ ba diɛɛmulen biyɔɔ le. Ɲɛ vɔɔn co muulɔnndo tuŋ-ndo le co ni, le co lepiaalen ca a ɲɛ lolo nɔla mò dii vana-o.

⁹A len naa n mel Mɛlɛka Fuɲaa balika ni, a len koni naa n mɛɛniaa vɛlɛ vanndacieea cɔwnun a velan Hala-o-a ni.

¹⁰O sondo pilɔɔ nin duaalan a mɛɛniaalan la co fulaa ni. Puapilɛa nia, o bɛnda mò tosan lende le.

¹¹Soon kólaa pilɔɔ nɔla pá mò soli mɛmma kɛndɛan a ma lolɛiyan o tɛɛngii pilɛi?

¹²Puapilɛa nia, buumbuuo nɔla pá mò kom oliveon, te kon te mì rɛsɛnndo kom buumbuuon? Soon mɛmma ihɛllan ma co fulaa nin-ndo bɛɛ nɔla lɛ mo soli mɛmma kɛndɛan te.

¹³Nɛ̀ɛ́-nɛ̀ co yɛ vana kɔlkaloo a vana sinaa dɛnɔɔ o niaa tɛɛn? Vana kon bɛnda mò cɔm o kela ndɔ kɛndɔɔ nin maa dɛnnda ndɔlan la fula o tuisinndo nin a o kɔlkaloo nin.

¹⁴Kɛ te la nɔ pɛ paŋala vɔɔndo a sɛɛngianndan niaa o lakɔl, mɛɛ la kuundian mì la dimí còòlan a toɲaa o kɔɔ le.

¹⁵Kɔlkalu vaa lende co kɔlkalu fula coocoo le, kɛ kɔlkalu ceendo, kɔlkalu n'faloo a kɔlkalu ɲinaa co kon ni.

¹⁶Kani nɛɛ paŋalaa a sɛɛngianndan la co-a, lon koni dɛnɛ laasiɛiyo a dɛnnda vɔɔnnda súú-súù ka la co vɛlɛ ni.

¹⁷O diandaa kɔlkalu fula coocoo-o co vɔ fɔlɔn ni, o kon kɔɔli kɔlkalu kɔlɲuloo a kɔlkalu fɛ́ɛ́-fɛ́ɛ́o, o kindù tɛɛlɔn te, o pɛ a ɲííye a kɔmnde kɛndɛlen, o hiyàn vannda le, o muulun te.

¹⁸Kɔmnde dɛnɛ sandaa le saŋnun o kɔlɲuloo nin, vanaa yeema kɔlɲuloo-a saŋ-nden ni.