Read Kissi Nsaki 4 Bible Online

Nsaki 4 - Kissi bible

Nsaki 4

¹Kuɛɛ nɛ sɔngɔlan a cɔlɔbala co niaa tɛɛn-ndan la co yɛ fulaa? Vɛ̀ɛ̀ o co o yeeman co niaa cɔlɔbaa o lakɔl-lon nin te?

²La co ɲɔɔn hɔlten fulaa, kɛ la co mun sɔla le. La co yeemɛi le vanndacieea diwvo, la yeema ɲɔɔn, kɛ la co mun sɔla le. La co sɔngɔlan a cɔlɔbalan, kɛ la co ɲɛ-ɲɛ sɔla le. Kani la co ɲuna le.

³La co ɲunaa, kɛ la co sɔla le, kani la co caa ɲunaa le, le yeemɛi niɛi tosaa daama niaa co ɲunaa ni.

⁴Éé niaa vanaa laasiannda ha! Vɛ̀ɛ̀ la co sina le maa, yeemɛi ceendo ho i siinguu vana yaamɔɔ Hala-o ni? Lelan, vana yeema pɛ le vaa caaŋoo ceendo, ndu siŋnun yaamɔɔ Hala-o.

⁵La yiyan te maa fondo fúú o sɛvan-ndo dimi aa: «Kɔl Hala luei naa nin-ndo, o kaola ndu taw a paŋalaa.»

⁶Kɛ nduyɛ, kɛndɛi Hala co naa tosallo-e co i bɔɔ, kani o dimin vɛlɛ aa: «Hala co vanaa kuundiannda cɔlɔbaa, kɛ o co vanaa tuisin tootoo-a kɛndɛi tosallo.»

⁷Lelan, la tuisin Hala o labɛngunin. La simul ɲina vɔɔndo, o ɲaanunnin niaa.

⁸La sɔɔnguu Hala ikɛi, ndu bɛɛ sɔɔnguunin niaa ikɛi. La dindi bala niaalan, niaa vanaa lahakia ha! La dindi kɔlta niaalan, niaa vanaa kɔlta tiɔn-tiɔnda ha!

⁹La sínán kɔɛi niɛi. Mɔnɛi bíí niaa, mì la caŋ. Mamɔɔ niaa bɛnda mò siŋnun mɔnɛi, mì kɔlkɛndɛ niaa siŋnun kɔl tambɛiyo.

¹⁰La tuisin tootoo Mɛlɛka o hɔl, mò heelu niaa.

¹¹Puapilɛa niaa, la congan vellaa-velle le. Vana congu pɛ puapilɔɔ, te kon te vana yaala pɛ puapilɔɔ, mɛɛ ndu congu tɔŋndo mo yaala tɔŋ kalaa. Nduyɛ, taa kelu pɛ tɔŋndo iyama, mɛɛ a co vana biyaa tɔŋ te, yaamɔɔ tɔŋndo n co ni.

¹²Nduyɛ, Hala ndu pilɛ kpé handu tɔŋndo ni, ndu pilɛ kpé tiw vɛlɛ ba yaman kiolɔɔ ni. Ndu pilɛ kpé nɔla ciindiaa a tɛɛmbuuo ni. Kɛ nɔm yɛ, nɛ̀ɛ̀ n co yɛ, nɔm co caanda yaalaa-o?

¹³Niaa co sisa dimio-a aa: «Hau, te kon te siɔdii, n kɔanin o kobi vaa nuaa nin. N ciinin vɔsio pilɛ lon, n tosanin yulalen ndon mì n sɔla tɔnɔɔ»,

¹⁴la sínà bɛɛ mɛɛ ceen niaa vanin siɔdii le. Maa hangulu niaa co ni, o fula pɛ le telen bingi o kon kɔɔli o kiolu.

¹⁵O bɛnda mì la dimi fisa aa: «Te Mɛlɛka cɛl pɛ, n vanin yoomu mì n tosa dɛnɛ vaa nuaa, te kon te dɛnɛ celen.»

¹⁶Kɛ sisa, la co kuundianndo o yiyannda niaala yongalan nin. Kuundian vaa lende kpow vɔw ni.

¹⁷Te vanndo sina pɛ le dɛnɛ kɛndɔɔ tosaa, te o tosa ndu le, mɛɛ o cua hakio o ken nin.