Read Kissi 2Piɛr 1 Bible Online

2Piɛr 1 - Kissi bible

2Piɛr 1

¹Ya Simɔn Piɛr, vana baalaa a kiila Yeesu Krista-o ni. Ya co vanaa sɔla laalan sɔvɛɔ maa naa o dɛnɛ cindaa Hala naa nda Vana naa ciindiaa Yeesu Krista nin-ndo-a sɛvallo ni.

²Màá kɛndɛi a kɔlɲuloo kui niaa o lakɔl le sínà niaa síná Hala a Maalii naa Yeesu-o!

³Kpaaya ndɔ ihalayaa yɔngu naa ɲɛ-ɲɛ naa n nɔ makoo le vaa a sandaa, mó cɔm naa vana veelu naa o biilu ndɔɔ a o dɛnnda ndɔla kaamaala o tosa lan nin-ndo.

⁴O ndu nin o dimi le naa dɛnnda bɛndula sɔvɛlan tosallo ni, haliko mi la va o halayɛi ndɔɛi nin, mì la ɲaanun yeemɛi vɔɔŋii co o ceendo coo-e.

⁵Le kon yɛ, la kindikindin mì la handu kela kɛndɔɔ o laalan niaa coo, mì la handu dɛnɛ sinaa o kela niaa kɛndɔɔ coo,

⁶mì la tiw niaa pila ba handɔɔ o dɛnɛ niaa sina-o coo, mì la va vanaa biwnannda handɔɔ o tiw niaa tiw niaa pila ba-o coo, mì la handu ɲííye o biuvɔn niaa coo,

⁷mì la handu hɛɛnianndo o ipuapilɛyɛi nin o ɲííye coo, mì la handu kaolaa o hɛɛnianndo o ipuapilɛyɛi nin coo.

⁸Kani te la nɔ pɛ káàlan ndan, mì la kui niaa niŋ, la melnin niaa mì la kɛɛ ɲɛ tosa, te kon te mì la kɛɛ komɔɔ le Maalii naa Yeesu Krista sinaa le.

⁹Kɛ te vanndo nɔ kaalan ndan te, mɛɛ vana sumɛi co kɔlan yingo-yingo-o o co ni: o pɔɛɛnun maa o sɔla dindio le hakila ndɔla paandulan-ndo.

¹⁰Lelan puapilɛa nia, la cɔɔlu yoomuan luei o veelu Hala veelu niaa-o a o hɛli o hɛli niaa-o nin, la va pɛ tosaa lende, la delnin lɔ́ɔ́-lɔ́ɔ̀ le.

¹¹O kon la sɔlanin dio le luɛyɔɔ o masale fɛɛn-fɛɛnnde Maalii naa a vana naa ciindiaa Yeesu Krista len nin.

¹²Lelan i vanin niaa sɔɔn mun yiyilanndo lɔ́ɔ́-lɔ́ɔ̀, o va bɛɛ maa la sina nin mun, mì la va isisi yili o toɲaa nin hau.

¹³Te i co vɔ pɛ o ceendo ho coo, i ce ken dɛnɛ sandaa, mì va niaa yiyilanndo le mɛɛ niaa va o lapɔɛɛn nin te yɛ,

¹⁴kani i sínà, maa mɛɛ Maalii naa Yeesu Krista cɔm ya ndi yɛ, o lo lɛ levil te mì faŋan o ceendo ho coo.

¹⁵Kɛ i keinin o nɛi oo nɛi coo, haliko i kɔnnun nin bɛɛ, mì la koma loonun a dɛnndan ndan o kɔɔ.

¹⁶Nduyɛ, o co bundɔn nda caa toosiaa-on te naa n co niaa dimul a hunɔɔ kpaaya Maalii Yeesu Krista-o o kɔɔ le, kɛ naa pila n ce biilu ndɔɔ a lehɔl ciŋ.

¹⁷Kani o sɔla bɛɛlen a biiloo Hala Fuɲaa o ba, telen o tuei diomndo fulaa o biilu bɛndu Hala-o nin, mó dimul ndu-o aa: «Po ni ya kaola taw-vo co hoo ni, o ya hɛli a kɔl nuu kpow-vo!»

¹⁸Mí naa pila n tuɛi diom fula kon o halataala telen naa n va naa ndaa o pembii diandɛi coo-o.

¹⁹Hiovɔɔ o kon coo, sɔɔn vanaa-tɛɛngaa-diom Hala-a n co naa o ba, n niaa nɔ dí le hɔlten handɔɔ coo mɛɛ vana handu fitina co biyɔɔ o ɲumndan nin-ndo hɔlten coo háá mi ɲɛ-tengaa paale siaa tenga, mì loei idii-e tenga o kɔlta niaalan nin yɛ.

²⁰O tase ya co niaa dimul-lo co hoo ni, la sínà maa vana-vana bɛnda mò tɛɛsiaa diom kɛ́-kɛ̀ o sɔɔn vanaa-tɛɛngaa-diom Hala-a dimi mì n va n sɛvaa o Sɛbɛ Hala-o nin-ndon a yiyan ndɔ ndu pila le,

²¹kani o co a yiyan ivanacieeya le vanaa-tɛɛngaa-diom Hala-a dimi sɔɔn nda dimi-on te, kɛ o kpaaya Kɔl-Diandaa bɛngu vanndacieea tɛɛnguu diomnda Hala lan ni.