Read Kissi 2Piɛr 2 Bible Online

2Piɛr 2 - Kissi bible

2Piɛr 2

¹Vanaa-tɛɛngaa-diom Hala-a lacòòvaa va sindɛ Israɛlla tɛɛn. Nduyɛ, lende koni vanaa pɛɛkaa lacòòvaa vanin niaa tɛɛn ni. A hunnin a pɛɛkula vɔɔnndan o kɔlkalu vɔɔndo nin, mà kɛɛ bɛɛ Vana Bɛndu baŋa nda-o, o kon mì nda pila luei bollen o ɲánndávàà.

²Vanaa bɔɔ-bɔɔ a delnin laasian nda kon kɔɔli, o kon mi vannda dimi sɔɔn pɔmbɔn a nɛi toɲaa o kɔɔ le nda.

³A co niaa tɔnɔɔ dioo a sondola yeelɛilan le mɛɛ nda nɔ hɔlte bolofaalen yɛ. Kɛ o co lɛhau le yamɛi ndɛi cuu kiolɔɔ ma sɔla yaalaa le, tambii ndɛi nɔ lɛ bɛɛ lɔ́ɔ́ le.

⁴Kani Hala mɛi mɛlɛkaa tosa hakio-a lon te, kɛ mó ɲindu nda o soonnda maɲumndan nin, nɛɛ nda co a mandaa le telen kialaa iyamaa-a.

⁵O mɛi ceen paandoo lon lende le, kɛ mó cuu mɛmma bɛnduan o ceen vanaa ndáà síná Hala le-a coo, fɔ Noe va diom Hala-o yondaa-o kínɛí o kanda ni a vanaa celen nda ŋɔmmɛw.

⁶Hala yaala kobilan Sodɔm a Komɔr le lan tɛɛmbuuo, mó mingi lan pultan, mí ken va silaa le vanaa hun sinanin Hala le-a,

⁷kɛ mó ciindiaa Lɔt vana sandaa, o va o mɔnɛi nin le kela vɔɔn vanaa kan-ndo.

⁸Kani vana sandaa va nda kon tɛɛn-ndo va cɔu mó va ɲɛ-ɲɛ nda va tosaa lepalaa-lepala-o tueyɔɔ, mí mɔnɛi va ndu biyɔɔ o kɔl le dɛnnda vɔɔnnda nda va lan coo lan.

⁹Kon co cɔmndo ni maa Mɛlɛka sínà mɛɛ o báŋà vanaa sandaa o tɔɔndanndo nin, mò màndà vanaa tosaa dɛnnda vɔɔnda le nda dɛnɛ palaa tuisio coo o paale yamɛi kiolunin-nden yɛ,

¹⁰taama-taama, vanaa co yeemɛi dɛnɛ nɔɔlɛiye kiltan kɔɔli, a nɔ lebɛɛ a Mɛlɛka le-a. A hiwba nda pila laalanndo, a kendu sondolan, a nɔ isiòòn le mɛlɛkaa co o halataala-a yeowlan te.

¹¹Nduyɛ mɛlɛkaa kan a hiow nda yoomuan a kpaayaa, kɛ a co diomnde vɔɔn dimi a nda Maalii o hɔl te.

¹²Kɛ vanaa kan a co dɛnndan tosaa vana ca ko aa visia ni, o co a kɔlkalu le. Maa visia yondo nda co ni, a nda koam, mà bii, mà dii-a. O nda sínà loo nda co yeowlan ni, nda bɛɛ a tambunin maa n'cɔlu.

¹³Lende nda sɔlanin sala dɛnɛ sandaa lepɛŋ nda tosa-o ni. Ipala déŋ ɲɔɔ hɛnan nda le yeemɛi ndɛi vɔɔnde peeloo ni, sɔɔn lasiɛmbon a sɔɔn bɛɛtambɛiyon kposon nda tosa ni: a cɛn pɛ a luɛi niaa coo o cuungiannda niaala diaalan coo, kɛ nduyɛ huiyo koni nda co niaa ni.

¹⁴Hɔltan la pɛ nda a suundaa, a sanga a hakilan tosaa le, a co vanaa kɔlta ndalan la sim yili le-a laasiaa a kɔlkalu vɔɔndo, kɔlta ndalan la co lapiaa a yeemɛi ɲɛ-sɔlaa, dangaa co le nda.

¹⁵A faŋan o nɛi sandaa coo, má del Balaam po Bosɔr-o kɔɔli, mí ndu fula sala dɛnɛ vɔɔndo hɔlten,

¹⁶kɛ mó sɔla silaa le haki o tosa-o. Kani mí sofɛlɛ laandoo, cɔlu suu loo soaa o ndu lo maa vanaciee, o kon mí vana-tɛɛngaa-diom Hala kon pɛngi dɛnɛ idiɔm o va tosaa-o.

¹⁷Vanaa kan co macoaa maa soonnda mamɛnnda nɔ mamɛn lenin te lan, maa piɔɔ helaa hoeyii fùkù-fùkùei hivi-o, ɲumma bɛndu-bɛnduan ma co nda cum.

¹⁸Sɔɔn fondon mala vana loon nda dimi ni, a yeemɛi ndɛi lasiɛmbuei nda bii vanaa hɛlun sɛnɛi vanaa luei vannda o pɔwlan nin-nda ni.

¹⁹A co nda dimullo maa a kenin nda hɔ́ɔ́yɛi, nduyɛ nda pila co o cɛlen nin dɛnnda tɛɛmbuu vana lan o ba, kani vana-vana co o biyaa o cɛlen nin ɲɛ o nɔla hiɔlɔnndo loo o ba.

²⁰Kani vanaa pum hɛlun dɛnnda vɔɔnnda ceenndan o Maalii naa a vana naa ciindiaa Yeesu Krista sinaa kɔɔli, kɛ taa muungu pɛ mà malnun dɛnnda lan o ba, mì la nɔla nda, ceen ndaa vɔwnin bɛɛ hiovɔɔ o tasoo coo.

²¹Ɲɛ ndóò va fisa le nda-o co ni, hali mì ndáà sina nɛi dɛnɛ sandaa le, a ndu sinaa tɛ́ɛ́ ma muungu ma mulul tɔŋ diandaa ndóò tiiyalan nda-o kɔɔ.

²²Mí ɲɛ tale toɲaa pum dimi-o tosalan nda aa: «Tunndo de ɲɛ o kuusuu-o, te kon te aa, ciiyo dɔ́ɔ́ pewvo pulɔɔ, mó kɔ del o loolio nin.»