Read Kissi 1Nsaŋ 1 Bible Online

1Nsaŋ 1 - Kissi bible

1Nsaŋ 1

¹Ɲɛ va kabi o tasendɔ-o, o naa n tuei-yo, o naa n ce a lehɔl-lo, o naa n mɛɛndian mí n pilan a dɛnɛ sɔɛi cindɛi o kɔɔ-o,

²kani cindaa cɔmnun, mí n ca ndu. A ndu o kɔɔ naa n co seilen tɛndaa ni, a cinda fɛɛn-fɛɛndo o kɔɔ naa n co sɔɛi ni, o va Pua ikɛi mó cɔmnun naa-o pɛɛn.

³O naa n ce mí n tuɛi-yo, ndu naa n co niaa dimullo ni, haliko mi niaa bɛɛ va latulu a naa. Nduyɛ vaa latulu naa niaa, ndu co vaa a Pua a á Yeesu Krista Po ndɔ ni.

⁴N co niaa ndi sɛvallo haliko mi ɲaale naa peelun.

⁵Yoongu naa n tuei Yeesu Krista o sondo mí n va niaa ndu dimul-lo co hoo ni: Ɲɛ-tengaa Hala co ni, ɲumma co o ndu nin te.

⁶Te n dimi pɛ maa n co latulu a ndu, mì n va kelaa o ɲumndan nin, mɛɛ còòlan naa co dimio ni, mɛɛ n co kela mɛɛ toɲaa co yɛ le.

⁷Kɛ te n va pɛ kelaa o ɲɛ-tengaa nin maa mɛɛ ndu pila co o ɲɛ-tengaa nin yɛ, mɛɛ n co a yiinannda latulu vellaa-velle, kooma Yeesu Po ndɔ-an ma dindi naa a hakilan kpow.

⁸Te n dimi pɛ maa n nɔ haki le, mɛɛ naa pila koni co palanndo ni, n co vanaa toɲa le.

⁹Te n sɔlɔlan pɛ hakila naalan, vana lo o lediom coo-o a vana sandaa Hala co ni, o malnin naa haki le hakila naalan, mò dindi naa le dɛnɛ vɔɔn kɛ́-kɛ̀ naa n tosa.

¹⁰Te n dimi pɛ maa n tosa haki le, mɛɛ n siinguu ndu vana lacòòvaa, o kon sɔɛi ndɔɛi co naa o kɔl te.