Read Kissi 1Nsaŋ 3 Bible Online

1Nsaŋ 3 - Kissi bible

1Nsaŋ 3

¹La ce mɛɛ Pua kaola naa yɛ nɛ! Kani o veelu naa aa cuavaa Hala-a. Nduyɛ nda naa n co lekɛ́ndɛi ni. Lelan bɛɛ ceendo sínà naa le ni, kani o sínà Hala le.

²Caaŋaa nia hɛnan ya-a, cuavaa Hala-a naa n co nin ni, mɛɛ naa n hun vanin yɛ cɔmnun ndɔ le, kɛ i naa n sínà-e co ni maa telen Krista fulanin ceen-ndo, maa ndu naa n vanin ni, kani n canin ndu mɛɛ o co yɛ.

³Vana-vana kɛsi pɛ ndu kɔllo coo, ndu díndin, maa mɛɛ Krista pila co o diandaa yɛ.

⁴Vana-vana tosa pɛ hakio, mɛɛ ndu tɛɛmbuu tɔŋndo, kani hakio, ndu co tɔŋndo tɛɛmbuuo ni.

⁵Nduyɛ la sínà maa le hakilan faŋaa Maalii fula ni, haki co o ndu nin te.

⁶Vana-vana va pɛ o ndu nin, ndu tosa haki le, vana-vana tosa yɛ pɛ hakio, o ci ndu le, o síná vɛlɛ ndu le.

⁷Cuavaa nia hɛnan ya-a, vana-vana hìŋ niaa hɔlla le. Vana va pɛ dɛnɛ sandaa tosaa, mɛɛ ndu sandu mɛɛ Maalii pila sandu yɛ.

⁸Vana tosa pɛ hakio, mɛɛ le masa ɲinaa vɔɔnda vana kon co ni, kani o kandɔɔ pɔ́ masa ɲinaa vɔɔnda ndu tosa hakio ni. Po Hala-o ndu fula, haliko mo tɛɛmbuu baala masa ɲinaa vɔɔnda.

⁹Vana-vana velun pɛ o Hala nin, ndu hiw laci a hakio tosaa le, kani yɛi Hala-o co ndu nin, o nɔla hakio tosaa le, kani cua Hala-o o co ni.

¹⁰Mɛɛ vana sínà cuavaa Hala-a a cuavaa masa ɲinaa vɔɔnda yɛ co hoo ni: vana-vana tosa dɛnɛ sandaa le, vana-vana kaola vɛlɛ puapilɛ ndɔɔ le, mɛɛ ndu co o Hala le.

¹¹Pɛɛku niaa tuei kabi o tasendɔ-o co hoo ni aa: «N kaolian vellaa-velle.»

¹²N tosan maa Kaɛn te, le vana Vɔɔndo ndu va ni, mó dii pɔmbɔ ndɔ. Le yɛɛ kpeekpei o dii yɛ ndu? Le mɛɛ dɛnnda ndɔlan láà vɔw, mí la pɔmbɔ ndɔlan láà sandu yɛ.

¹³Puapilɛa nia, te ceendo nɔ pɛ nɛyɔn niaa, la dɔawnun kɔndɔfili le.

¹⁴N sínà maa n fula o piɔ́mndo nin, mì n co yoomu, kani n kaola puapilɛa naa. Vana nɔ kaolaa le, mɛɛ o piɔ́mndo nin ndu co ni.

¹⁵Vana-vana nɔ pɛ nɛyɔn puapilɛ ndɔɔ, mɛɛ ndu vana diuvaa n'vanndo o co ni, la sínà yɛ maa vana diuvaa n'van kɛ́-kɛ̀ nɔ yoomu fɛɛn-fɛɛndo ndu nin te.

¹⁶Ɛ̀ɛ̀ o ken naa n cɔm ni maa n sínà kaolaa: Yeesu yɔngu yoomu ndɔɔ le naa. Naa bɛɛ n bɛnda mì n yɔngu yoomu naa le puapilɛa naa.

¹⁷Te vanndo nɔ pɛ ɲɛm ceenndon o ba, mo ce puapilɛ ndɔɔ o bahavɛiyo nin, mò kindal ndu kɔl ndɔɔ, vɛ̀ɛ̀ o dimi yɛ o kon maa o kaola Hala?

¹⁸Cuavaa nia, n cɔmnùn kaola naa a lasondo a á lediɛɛmu daama le, kɛ n cɔmnùn ndu o dɛnndan a o toɲaa nin.

¹⁹O kon naa n sinanin ni maa vanaa toɲaa naa n co ni, o kon mì kɔlta naalan la sɔla kɔlɲuloo Hala o hɔl.

²⁰Mɛ̀ɛ́-mɛ̀ɛ́ kɔlta naalan la yaala naa, n sínà maa Hala hiow vaa o bɔɔ a kɔlta naalan, nduyɛ o sínà dɛnndan kpow.

²¹Caaŋaa nia hɛnan ya-a, te kɔlta naalan la yaala naa le, mɛɛ n nɔ tiindanndo Hala o hɔl.

²²Ɲɛ-ɲɛ naa n ɲuna ndu pɛ, n sɔla ɲɛ kon ndu o ba, kani n co tɔŋnda ndɔlan biyɔɔ, mì n va dɛnnda hɛnan ndu lan tosaa.

²³Tɔŋ ndɔ kon co yɛ hoo ni: n laalan o diola Yeesu Krista Po ndɔ lan, mì n kaolian vellaa-velle maa mɛɛ sɔɛi o dimul naa-e co yɛ.

²⁴Vana bii pɛ tɔŋnda ndɔlan, mɛɛ ndu co o Hala nin, mì Hala va ndu nin. O kon naa n sínà ni maa Hala co naa nin, Kɔl-Diandaa o ke naa-o cɔm naa ken ni.