Read Kissi 1Nsaŋ 4 Bible Online

1Nsaŋ 4 - Kissi bible

1Nsaŋ 4

¹Caaŋaa nia hɛnan ya-a, la laalan kɔltan kpow le, kɛ la soli lan kɔlɔ mì la sina te Hala o ba la fula ni, kani vanaa-tɛɛngaa-diom Hala-a bɔɔ-bɔɔ a hin o ceendo coo.

²Mɛɛ niaa sinanin Kɔl Hala-o yɛ co hoo ni: kɔl oo kɔl cɛl pɛ mò sɔlɔlan maa Yeesu Krista hin o falon nin, mɛɛ o Hala-o co kon ni.

³Kɔl oo kɔl cɛl lɛ mò sɔlɔlan sɔɛi Yeesu-e le, mɛɛ o co o Hala le co kon te, kɔl Yaamɔɔ-Krista-o co kon ni, o niaa tuei le hunɔɔ ndɔɔ-o pɛɛn, sunsun yɛ, o cuu luɛyɔɔ o ceendo nin.

⁴Niaa cuavaa nia, a Hala-a niaa co ni, nduyɛ la nɔla vanaa-tɛɛngaa-diom Hala-a lacòòvaa, kani o co niaa nin-ndo hiow vaa o bɔɔ a o co o ceendo nin-ndo.

⁵Ceendo nɔ vanaa kan ni. Lelan nda soaa maa vanaa ceen ni, mì ceendo yaŋ nda nilan.

⁶Kɛ naa, Hala nɔ naa ni. Nilan vana sínà Hala-o yaŋ naa ni. Vana co le Hala loo, ndu yeŋ naa lani le. O kon naa n sínà hiyan co Kɔl toɲaa a kɔl luei vana o pɔwlan nin-ndo ni.

⁷Caaŋaa nia hɛnan ya-a, n kaolian vellaa-velle, kani Hala o ba kaolaa fula ni, nduyɛ vana-vana kaola pɛ, mɛɛ o Hala-o co kon ni, o sina Hala.

⁸Vana kaola le, mɛɛ ndu sínà Hala le, kani kaolaa Hala co ni.

⁹Tofa vɔ mɛɛ kaola Hala-o cɔmnun naa yɛ: Hala vem Po ndɔ pilɔɔ o ceendo coo, haliko mi n va yoomu ndu o ba bɛngu.

¹⁰Kaola ndɔ kon co yɛ hoo ni aa: o co naa le n kaola Hala le, kɛ ndu kaola naa ni, mó viam Po ndɔɔ, mó yɔŋnun sálàá le hakila naalan faŋaa.

¹¹Caaŋaa nia hɛnan ya-a, te Hala kaola pɛ naa kaola bɛndu súú vaa lende, o bɛnda mì naa bɛɛ n kaolian vellaa-velle.

¹²Kabi bɛɛ vana ci vɔ Hala le. Te n kaolian pɛ vellaa-velle, Hala co naa o lakɔl, mì kaola ndɔɔ co o tiuvan naa nin sɔ́.

¹³O hee naa n sínà ni maa n co latulu a ndu, mì ndu va naa nin. Kɔl ndɔɔ o ke naa ni.

¹⁴Naa yɛ, cɔu naa n ce ni, mí n va seilen timbio maa Pua vem Poo ni, mò va vana ciindiaa le ceendo kpede.

¹⁵Vana sɔlɔlan pɛ maa Yeesu co Po Hala-o ni, mɛɛ Hala co vana kon o kɔl, mì ndu va o Hala nin.

¹⁶Naa yɛ, n sínà kaola Hala nɔ le naa-o, n laalan. Kaolaa Hala co ni, vana co pɛ o kaolaa nin, mɛɛ ndu co o Hala nin, mì Hala va o kɔl ndɔɔ nin.

¹⁷Lende kaolaa va o tiwnan naa o lakɔl ni, haliko mi n nɔ tiindanndo o paale kialaa iyamalen, kani mɛɛ Yeesu Krista co yɛ naa n co o ceendo ho coo ni.

¹⁸Vonnan co o kaolaa nin te, kɛ kaola kpeekpeiyo ndu vonnanndo o cii ni few-few, kani sangaa co o vow kɔɔli ni, vana vo pɛ dɛnɔɔ pum, mɛɛ ndu sínà kaolaa o tivɔn ndɔɔ nin te.

¹⁹Naa, n co ndu kaolaa, kani ndu fɔlɔn kaola naa ni.

²⁰Te vanndo dimi pɛ aa: «I kaola Hala», kɛ mò nɔ nɛyɔn puapilɛ ndɔɔ, mɛɛ vana lacòòvaa o co ni. Kani te vanndo kaola puapilɛ ndɔ o co cɔu-vo le, o nɔla mò kaola Hala o co cɔ loo le.

²¹Ndu dimul lɛ naa sɔɛi he ni aa: vana kaola pɛ Hala, ndu kaola vɛlɛ puapilɛ ndɔɔ.