Read Kissi Masaa kialaa n'yamaa 1 Bible Online

Masaa kialaa n'yamaa 1 - Kissi bible

Masaa kialaa n'yamaa 1

¹Biisi Yosue-o cuvɔɔ, mí Israɛlla ɲuna Mɛlɛka aa: «O naa tɛɛn, ɔ́ɔ̀ vanaa tasea kɔanin mà kɔ del Kanannda coo a cɔwvo-a?»

²Mí Mɛlɛka muli aa: «Vanaa co o polale Yuda len nin-nda bɛnda fɔlɔn ni ma kɔɛ, kani i cii nda lɛŋnden malɔɔ o ba.»

³O kon, mí vanaa fula o polale Yuda len nin-nda dimul puapilɛa ndaa fula o polale Simeɔn-nden nin-nda aa: «La hun mala naa mì n kɔ delnun Kanannda coo a cɔwvo le lɛŋnde yɔngun naa len hiɔlɔɔ. N cii pɛ, n kɔ hiɔlun vɛlɛ lɛŋnde yɔngun niaa len.»

⁴Má kɔa a cɔwvo, mí Mɛlɛka mal Kanannda a Perisiia nda o ba, má diw vannda vaalan tɔ́ nda tɛɛn Besɛk.

⁵Má komal masaa Adoni-Besɛk Besɛk lon, má del ndu coo, má nɔla Kanannda a Perisiia.

⁶Mí Adoni-Besɛk ɲaanun, má ɲaanun ndu kɔɔli, má kɔ kpuva ndu, ma kili ndu suon bɛndon o balan a o pelon.

⁷Mí Adoni-Besɛk yonda coocoo aa: «Masaa belaŋɔmmɛw, a nda kili suon bɛndun laban a suon bɛndun labɛngon-nda va kúúon cɔwviaa nɛɛ yáà dia ɲɛdiaa-a ni. O ya tosa-o, ndu kpafii Hala mingul-la nuaa ni.» Má kɔa a ndu Yerusalɛm, lon o kɔ vu ni.

⁸Mí vanaa fula o polale Yuda len nin-nda kɔ del Yerusalɛmnda coo a cɔwvo, má nɔla nda, má diw vanaa va lon-nda, má mulin ma loam kobio.

⁹O kon kɔɔli, má kɔ del Kanannda coo nɛɛ nda va icali o pembon coo, o tàndàá Nekɛv nin a o dɛngbɛlan nin-nda.

¹⁰Má kɔ del vɛlɛ Kanaŋaa va icali Hebrɔn-nda coo, kobi ndáà veelu kon paandu aa Kiriat-Arba-o pɛɛn, má nɔla yungula Sesai lan, yungula Ahiman-ndan a yungula Talmai lan.

¹¹Cɔnɔnndo lon, má kɔ del vannda Debir coo, kobi ndáà veelu kon paandu a Kiriyat-Sefɛr-o.

¹²O kon mí Kalɛb dimi aa: «Vana-vana kɔɛ pɛ mò kɔ del kobio Kiriyat-Sefɛr coo a cɔwvo, mò nɔla ndu, i ke ndu Aksa cua ni o nɔ̀u nin.»

¹³Mí Otniɛl, po Kenas-o kɔ bii kobi kon a cɔwvo. Kenas kon yɛ pɔmbɔɔ Kalɛb o va ni. Mí Kalɛb yɔngu ndu Aksa cua ndɔ o nɔ̀u nin mɛɛ ndóò dimi yɛ.

¹⁴Ndóò tiiyaa dɔ́ɔ́ o Otniɛl-lo, mó soaa ndu o lani le Kalɛb fuɲa ndɔ yondoo piɛiyo. O kon, mí ndu Aksa huulu, mó toal o Sofɛlɛ ndɔɔ coo, mí Kalɛb fuɲa ndɔ ɲuna ndu aa: «Yɛɛ nɛ n yeema yɛ?»

¹⁵Mó muli aa: «Tosal-la kɛndɛi pum! Yondo n ke ya a ba too-o, o co yondo nàŋ ɲɛ le o co le. Lelan, ke ya vɛlɛ soonnda mamɛnndan.» Le hee, mí Kalɛb ke ndu soonnda mamɛnndan lecoo a lan lebɛngu.

¹⁶Mí poaa Keni lefoo Moise-a[1] faŋan o kobi mavawvo[2] nda vanpiaandua fula o polale Yuda len nin-nda, má kɔ cal o lɛŋnde veselɛile co o tàndá Yuda-o nin-nden nin, Arad a ba too, má cal lon nda vanaa va lon-nda latulu.

¹⁷Mí vanpiaandua fula o polale Yuda len nin-nda kɔa nda puapilɛa ndaa fula o polale Simeɔn-nden nin-nda, má kɔ del Kanaŋaa va icali Sefat-a coo a cɔwvo, ma tɛɛmbuu kobi kon few-few, má ke fonda kon diolan aa Hɔrma (kon co dimio ni aa «Bembóó»).

¹⁸Mí polale Yuda len le kɔ bii vɛlɛ kobilan ndan a tàndàla ndalan kpow: Kaasa, Askelɔn a Ekrɔn.

¹⁹Mɛlɛka va Yudaa ikɛi háá má cii lɛŋnde n'pembulen kpow hiɔlɔɔ, kɛ a nɔla vanaa va o dɛngbɛlan nin-nda lɛŋnden hiɔlɔɔ o ba le, kani vanaa kan ndáà nɔ ɲɛla ɲaanannda n'cilinnda soa nan-ndan.

²⁰Má ke Kalɛb lɛŋnde Hebrɔn-nden maa mɛɛ Moise ndóò dimi yɛ. Má toaw yungula poaa yáá-aa Anak-a va icali lon-ndan.

²¹Vanaa fula o polale Bensamɛn-nden nin-nda tiw ba Yebusiaa va Yerusalɛm-nda tovɔɔ le, má cal lon nda ndaa latulu háá paalen nden.

²²Mí Mɛlɛka sim vanaa fula o polale Yosɛf len[3] nin-nda kɔɔli, ma kuel vannda Betɛl.

²³Má viam fɔlɔn suansuaanda, má kɔ mɛɛndian kobi kalaa kpow, Betɛl kon ndáà veelu paandu ni aa Lus.

²⁴Mí vanaa nda vem kan-nda bɔŋan a langbanɔɔ pum ciee-lekɔɔ, má dimul ndu aa: «Cɔm naa nɛiyo le fulaa ciee, mí n tuinun nɔm iɲíí.»

²⁵Mí langbanɔ kon cɔm nda nɛiyo, má luɛi ciee a cɔwvo, má kɔ diw vanaa va lon-nda kpow, kɛ a yɔŋ langbanɔ kon a vanaa ndɔa ɲɛ-ɲɛ le.

²⁶Mí langbanɔ kon lo kɔlan háá mó tiiya o lɛŋnde Hitiia nin, mó kɔ kialu cieo, mó ke ndu diolan aa Lus, diola lan ciee kon nɔ háá paalen nden ni.

²⁷Vanaa fula o polale Manase len nin-nda tiwba le vannda Bɛt-Sean, haa Taanak, haa Dɔr, haa Yibleam, haa Mekido a haa o tàndàla balu lon-ndan tovɔɔ le. Lelan Kanannda baŋ le lou o lɛŋnde len nin ni.

²⁸Hali telen Israɛlla sɔla yoomuan-ndo, baŋɔɔ nda baŋ vanaa kan baalala lepɔtɔltan tosaa ni, kɛ a tuw nda le.

²⁹Vanaa fula o polale Efraim-nden nin-nda tuw Kanaŋaa va icali Kesɛr-a le, nda ndaa va latulu Kesɛr lon ni.

³⁰Vanaa fula o polale Sabulɔn-nden nin-nda tuw vanaa va icali Kitron-nda le, a tuw vɛlɛ a va Nahalɔl-la le, má cal nda Kanaŋaa kan o lɛŋnde len ni. Kɛ nduyɛ, ma va nda baalala lepɔtɔltan baŋɔɔ tosaa.

³¹Vanaa fula o polale Asɛr len nin-nda bɛɛ a tuw vanaa va Ako-a, vanaa va Sidɔn-nda, a va Alab-a, a va Aksib-a, a va Helba-a, a va Afik-a a á va Rehɔb-a le.

³²Calle vanaa fula o polale Asɛr len nin-nda cal Kanaŋaa va icali o lɛŋnde len nin-nda tɛɛn ni, kani a tuw nda le.

³³Vanaa fula o polale Nɛftali len nin-nda tuw vanaa va icali Bɛt-Siemɛs-a le, a tuw á va icali Bɛt-Anat-a le. Calle nda cal latulu nda Kanaŋaa va o lɛŋnde len nin-nda ni. Kɛ má baŋ nda baalala lepɔtɔltan tosaa.

³⁴Mí Amoriia toaw polale Dan-nden, má heelu nda o pembon coo, a cɛl nda le tolɔɔ calle o dɛngbɛlan nin te.

³⁵Mí Amoriia cal Har-Herɛs, Ayalɔn a Saalbim kangalan, kɛ mɛɛ vanaa fula o polama poaa Yosɛf-a nin-nda sɔla yoomuan, má baŋ Amoriaa kan baalala lepɔtɔltan tosaa.

³⁶Lɛŋnde Amoriia léè kandun o helɔɔ-ngeemaa, cɔnɔnndo a Pow kpovaa, mí le heelu lende.