Read Kissi Masaa kialaa n'yamaa 10 Bible Online

Masaa kialaa n'yamaa 10 - Kissi bible

Masaa kialaa n'yamaa 10

¹O Abimelɛk kɔɔli, mí Tola po Puva-o, po imama Dodo-o hun baŋa Israɛlla. O polale Isakar len nin Tola kon ndóò fula ni, Samir o tàndá n'pembu Efraim-ndo nin o va icali ni.

²Mó sim Israɛlla laci le vɔsilan bidiin a layàá, o kon kɔɔli, mó vu. Má kumbu ndu Samir ciee.

³O ndu kɔɔli, mí Yair fula Kalaad-o muungu o fonda ndɔɔ, mó sim Israɛlla laci le vɔsilan bidiin a latiɔn.

⁴Ndóò nɔ poaa beleyaa, poaa kan ndáà hel o sofɛlɛa téndéa beleyaa coo ni, ndáà nɔ kobilan beleyaa o tàndá Kalaad-o nin. Háá hau a co vɔ kobila lan veeloo aa sɔndɔkɔlta Yair lan.

⁵O kon kɔɔli, mí Yair vu, má kumbu ndu Kamɔn ciee.

⁶Mí Israɛlla tosa vɛlɛ ɲɛ hɛnan Mɛlɛka loo. Má sooluu Baalla a Astarteea, piɔmaa Aramiia, piɔmaa Sidɔnnda, piɔmaa Moabua, piɔmaa Amɔnnda a piɔmaa Filistia. Má mulul Mɛlɛka kɔɔ, a ve lɛ ndu biilu le few.

⁷O kon mí Mɛlɛka tuulu kɔl a Israɛlla, mó mal nda Filistia a Amɔnnda o ba.

⁸Kandɔɔ o telen kon, kɔ bii háá vɔsilan tɔ́ a laŋɔmaa, vanaa kan va Israɛlaa va icali Amoriia tɛɛn o tàndá Kalaad-o nin Yurdɛn a ba paalen le can-ndo-a saangiaa a nda yɛlen tollo.

⁹Mí Amoriia taŋ Yurdɛn leeloo le kɔlan vanaa fula o polale Yuda len nin-nda, vanaa fula o polale Bɛnyamɛn-nden nin-nda a á fula o polale Efraim-nden nin-nda delɔɔ coo a cɔwvo. Mí dɛnɛ palaa bɛndoo toal Israɛlla coo.

¹⁰Mí Israɛlla koŋul o Mɛlɛka lo, má dimi aa: «N cua hakio a nɔm, kani n mulul nɔm Mɛlɛka Hala naa kɔɔ, le Baalla sooloo.»

¹¹Mí Mɛlɛka mulul nda aa: «Lɔ́ɔ́ Esiptea, Amoriia, Amɔnnda, Filistia,

¹²Sidɔnnda, Amalɛkea a Maɔnnda va niaa saangiaa, mí la caŋ ya o lani-o, vɛ̀ɛ̀ i baŋa niaa nda o ba le?

¹³Kɛ mí la mulul-la kɔɔ le piɔmnda sooloo. Lelan i cɛl-lɛnin le niaa baŋaa le.

¹⁴La kɔ veelu niko piɔmaa niaa hɛli-a le niaa baŋaa. Nda bɛnda nin le niaa baŋaa lɔ́ɔ́ niaa vanin o dɛnɛ palaa nin-ndo ni.»

¹⁵O kon, mí Israɛlla muli aa: «Mɛlɛka, n cua hakio. Tosa ɲɛ hɛnan nɔm-ndo a naa. Kɛ o va bɛɛ lende, baŋa naa vɛlɛ hau.»

¹⁶Mí Israɛlla faŋan piɔmaa nda va sooloo-a kɔɔli, má muungu vɛlɛ Mɛlɛka biiloo. Le hee, mí Mɛlɛka yiyan nda coo le sangala bɛndula nda va lan-ndan.

¹⁷Mí Amɔnnda cuungian, má kɔ sim o tàndá Kalaad-o nin. Mí Israɛlla nda cuungian, má kɔ sim Mispa.

¹⁸Mí vanaa va icali o tàndá Kalaad-o nin-nda a simlacia ndaa dimulan vellaa-velle aa: «Ɔ́ɔ̀ vana yɔngunnin le Amɔnnda ha delɔɔ coo a cɔwvo-o? Vana tosanin ken-ndo, ndu vanin simlacinɔ Kalaadea kpow ni.»