Read Kissi Masaa kialaa n'yamaa 11 Bible Online

Masaa kialaa n'yamaa 11 - Kissi bible

Masaa kialaa n'yamaa 11

¹Kuubanɔ kɛndɛ-kɛndɛ cɔwvo pum va o tàndá Kalaad-o nin, diolan Yɛfte. Po vanalanɔ suundɛiyo pum nda langbanɔ óò nɔ diolan aa Kalaad-o o va ni.

²Kalaad kon ndóò nɔ lanɔɔ, má vialu vɛlɛ poaa celen nda laa ndɔ kon. Poaa kan sulɔɔ, má toaw Yɛfte, má dimul ndu aa: «A nɔ dí oo dí ma cua kɛ́ o ɲɛm fuɲa naa nin te, kani nɔm po vanalanɔ celen n co ni.»

³Le hee, mí Yɛfte ɲaanun, mó faŋan puapilɛa ndɔa kan ikɛi, mó kɔ calnun o tàndàá Tob nin. Mí langbaa fondoa pum del ndu kɔɔli, má va keiyo cɔwlan tosaa nda ndaa.

⁴Telen pum hiovɔɔ o kon kɔɔli, mí Amɔnnda ciŋilan Israɛlla a cɔwvo.

⁵Tuma cɔwvo kandun-ndo, mí kaasoŋaa kɔlkalua Kalaad kɔa Yɛfte kɔɔli o tàndàá Tob nin.

⁶Má dimul ndu aa: «Hun ma va simlacinɔ vanaa naa cɔwva, haliko mi n nɔla Amɔnnda.»

⁷Kɛ mí Yɛfte mulul nda aa: «O co niaa le yɔŋnun yaamɔaa nia le? O co niaa le tow ya mí la soli ya o fuɲa nuu lo cɛinin te? Le yɛɛ niaa hin yɛ niko ya kɔɔli telen dɛnɛ palaa tol hoo sisa niaa coo-o?»

⁸Mí kaasoŋaa kɔlkalua muli aa: «Le ken kpeekpei naa n hin o nɔm ndo ni. Hun n kɔnnun naa niaa, ma kɔ cɔlɔbal naa Amɔnnda. O kon ma siŋnun simlacinɔɔ naa coo a vanaa co o tàndá Kalaad-o nin-nda kpow coo.»

⁹Mí Yɛfte mulul nda aa: «Te la mingi ya pɛ le Amɔnnda cɔlɔbaa, mì Mɛlɛka mal nda ya o ba, mɛɛ ya vanin simlacinɔ niaa ndei!»

¹⁰Mí kaasoŋaa kɔlkalua Kalaad dimul Yɛfte aa: «Mɛlɛka co naa lesei, n cua ciɛ́ɔn le ɲɛ n dimul naa-o tosaa.»

¹¹O kon mí Yɛfte muungu nda kaasoŋaa kɔlkalua Kalaad, mí vannda siinguu ndu simlacinɔɔ, mó va vanaa cɔwva bollen. Mí Yɛfte mingi sondo o sɔɔn mun kpow coo Mɛlɛka o hɔl Mispa.

¹²Mí Yɛfte viam kiilaa o masa Amɔnnda lo le nda ɲunaa aa: «Sɔɛi yɛɛ co yɛ naa tɛɛn naa niaa mí la hun lɛŋnde nilen delɔɔ coo a cɔwvo?»

¹³Mí masa Amɔnnda dimul kiilaa kan le Yɛfte mulullo aa: «Tuma Israɛlla va fulaa Esipte-o, má poonda lɛŋnde nilen a paa-kala kandɔɔ o pee pɔmbɔɔ Arnɔn, kɔ bii o pee pɔmbɔɔ Yabɔk, tiiyaa háá Yurdɛn. Sisa, mingul naa lɛŋii ken o bɛɛn-bɛɛndo nin.»

¹⁴Mí Yɛfte viam vɛlɛ kiilaa o masa Amɔnnda lo,

¹⁵má kɔ dimul ndu o diola Yɛfte lan aa: «Israɛlla helu lɛŋnde Moabua le, a helu vɛlɛ lɛŋnde Amɔnnda le.

¹⁶Kani lɔ́ɔ́ nda va fulaa Esipte-o, o lɛŋnde veselɛilen nin nda kei ni, má kɔa háá o mɛmma ihɛlma makpɛ̀ndɛ̀an, malan nda tiiya Kadɛs.

¹⁷A lo lon, má viam kiilaa o masaa Edɔm-ndo le ndu ɲunaa mì ndóò cɛl mí ndáà kei o lɛŋnde ndɔlen nin. Kɛ o cɛl mà kei lon te. Mí Israɛlla ɲuna vɛlɛ masa Moabua ɲuna pilɛ kon, mí ndu bɛɛ kɛɛ. Le hee, mí Israɛlla lo Kadɛs.

¹⁸O kon kɔɔli, má can kɔlan, má va keiyo o lɛŋnde veselɛilen nin, má pilapilan lɛŋnde Edɔm-nden a lɛŋnde Moab len, má tiiya Moab a ba paalen le can-ndo. Má cal o peo Arnɔn leeloo, a luei o lɛŋnde Moab len nin te, kani peo Arnɔn va pɛɛngulan ni.

¹⁹A lo lon, mí Israɛlla viam kiilaa o Sihon, masa Amoriaa va masalen tosaa Hɛsbɔn-ndo lo, le ndu ɲunaa mì ndáà kei o lɛŋnde ndɔlen nin le kɔlan o lɛŋnde va le nda len nin.

²⁰Kɛ Sihon cɛl te, mó cuungiaa vanaa ndɔa cɔwva, má kɔ cumul Israɛlla Yahas, má del nda coo a cɔwvo.

²¹Mí Mɛlɛka Hala Israɛlla mal Sihon a vanaa ndɔa cɔwva Israɛlla o ba, mí Israɛlla nɔla nda, má bii lɛŋnde Amoriia va icali nin-nden kpow,

²²kandɔɔ o pee pɔmbɔɔ Arnɔn kɔlan tiiyaa háá o pee pɔmbɔɔ Yabɔk, a cɔnɔnndo vɛlɛ o lɛŋnde veselɛilen nin a ba paalen le can-ndo háá Yurdɛn o peelo.

²³Mɛlɛka Hala Israɛlla pila cɛl naa vanaa ndɔa, mí n hialu lɛŋnde Amoriia ni. Yéè len nɔm yeema le naa poondaa o ba ni?

²⁴Nɔm, o co lɛŋnde Kɛmɔs hala nɔmndo yɔngu nɔm-nden te n nɔ nuaa le? Lelan, naa bɛɛ, n nɔ dí le calle o lɛŋnde Mɛlɛka Hala naa cɛl mi n sɔla len nin.

²⁵A nɔ o kɔl maa nɔm hiow Balak po Sipɔr masa Moabua yoomuan ni? Caan kon yɛ, o tíŋ Israɛlla a sɔngɔ le, o del nda coo a cɔw le.

²⁶O co nin le vɔsilan kɛmɛ leyáá, Israɛlla co icali Hɛsbɔn, Aroɛr a o cieon balu lon-ndon nin, o kobila co o peo Arnɔn kɔngɔ lan kpow nin. Le yɛɛ niaa kɛɛ yɛ niko nda lɛŋii ken poondiaa o laba háá hau?

²⁷Ya yɛ, i tɛɛmbuu isɔɔ a nɔm te. Kɛ nɔm co ya dɛnɛ vɔɔndo tosallo ni, ma va ya tiŋɔɔ a cɔwvo. Màá Mɛlɛka Hala kialu yaman vannda kpow-vo kiolu hau yamɛi Israɛlla nda Amɔnnda tɛɛn!»

²⁸Kɛ masa Amɔnnda luei sɔɛi Yɛfte-e yii le.

²⁹Mí kɔl Mɛlɛka-o toal Yɛfte coo. Mí Yɛfte kei o tàndá Kalaad-o nin a o tàndá Manase-o nin, mó kɔa Mispa co o tàndá Kalaad-o nin-ndo le hiovɔɔ o lɛŋnde Amɔnnda nin.

³⁰Mí Yɛfte cua ciɛ́i, mó dimul Mɛlɛka aa: «Taa mal pɛ Amɔnnda ya o ba,

³¹lɔ́ɔ́ ya vanin cɔnɔnndo o lɛŋnde ndalen nin le muungoo-o, vana tase fulanin ya o hɔl o yungu nuu nin le ya bɔŋaa-o, i yɔngunin nɔm vana kon, mì solul nɔm ndu sálà loamaa.»

³²Mí Yɛfte hiaw pɛɛngulan, mó kɔ del Amɔnnda coo a cɔwvo. Mí Mɛlɛka mal nda ndu o ba.

³³Mí Yɛfte nɔla nda, mó bii kobilan bidiin kandɔɔ Aroɛr, Minnit balɔɔ, kɔlan tiiyaa háá Abɛl-Keramim. Mí Amɔnnda luɛi Israɛlla o ba bɛngu.

³⁴Lɔ́ɔ́ Yɛfte va muungoo o ndu lo Mispa-o, mí cua ndɔ laandoo hun ndu bɔŋaa a yolan o dundulan bɛngu. Cua ndɔ kon ndu pilɛ kpé va ndu o ba ni. Ndóò nɔ hɔ́ɔ́ celen te.

³⁵Yɛfte cɔu ndu dɔ́ɔ́, mó sɛɛsiaa volɔɔla ndɔlan, mó koŋul kpélén aa: «Éé Cuanndo! A mal-la o sangaa nin fɔ́! Nɔm co vana pilɛ o vanaa kondul-la dɛnɛ-a tɛɛn. Ciɛ́i ya cua o Mɛlɛka lo ni, i nɔla lɛ ndi tɛɛmbuu le few.»

³⁶Mí cua ndɔɔ mulul ndu aa: «Te ciɛ́i n cua o Mɛlɛka lo ni, tosa a ya mɛɛ n cua ndi o ndu lo yɛ, kani ndu Mɛlɛka tosa ni ma nɔla yaamɔaa nɔmnda, Amɔnnda pɛɛn.»

³⁷Mí cua ndɔ kon handu diomnden lecoo, mó dimi aa: «Kɛ o ya co nɔm tɛɛlɔn daama-o co hoo ni, ke ya paangon mún miun, mì kɔɛ o pembon coo le felengiyɛi nii caŋndo lon naa caaŋaa nia.»

³⁸Mí Yɛfte mulul ndu aa «Mɛɛ kɔ!» Mó ke ndu paangon mún miun. Mí cuaambɔɔ kɔa o pembon coo nda caaŋaa ndɔa laandua, mó kɔ caŋ felengiyɛi ndɔɛi lon.

³⁹Ciiyo paangun miuŋun mun, mó muungu o fuɲa ndɔ lo, mí fuɲa ndɔ kɔ tosa a ndu mɛɛ ndóò cua ciɛ́i yɛ. Cuaambɔ kon ndóò sina vɔ dɛnɛ vanapɔnɔ le few. Kandɔɔ o telen kon, mí dɛnɛ kon siŋnun naamoo Israɛlla tɛɛn.

⁴⁰Vɔsi oo vɔsi, vanlaandua Israɛlla cɛn pɛ a kɔ caŋ cua Yɛfte Kalaadenɔ-o o palɛi ndii hiɔɔlu bɛngu.