Read Kissi Masaa kialaa n'yamaa 12 Bible Online

Masaa kialaa n'yamaa 12 - Kissi bible

Masaa kialaa n'yamaa 12

¹Vanaa fula o polale Efraim-nden nin-nda cuungianndo, má taŋ peo Yurdɛn, má kɔa Safɔn. Má ɲuna Yɛfte aa: «Le yɛɛ nɛ n kɔ del-lɛ Amɔnnda coo a cɔwvo a veelu naa le nɔm malaa le? N co cɛi nɔmndo lomɔɔ mì nɔm pila ŋɔɛ a ndu latulu.»

²Mí Yɛfte mulul nda aa: «Lɔ́ɔ́ ya a vanaa nia n va o sɔngɔ bɛndoo nin naa Amɔnnda-o, mí veelu niaa, kɛ la baŋa ya nda o ba le.

³Mɛɛ ya ce maa la hin le ya mala le, mí vɔngul yoomu nuu, mí kɔ del Amɔnnda coo a cɔwvo. Kɛ mí Mɛlɛka mal nda ya o ba. Le kɔlɔ yɛɛ niaa co yɛ niko ya hau hunɔɔ delɔɔ coo a cɔwvo?»

⁴Mí Yɛfte cuungiaa Kalaadea kpow, mó del polale Efraim-nden coo a cɔwvo, mó nɔla nda. Polale Efraim-nde len léè dimul Kalaadea ni aa: «Niaa Kalaadea, vanaa ɲaanun polale Efraim-nden-nda niaa co ni, len niaa hɛlun ni mí la kɔ vionnun o polale Manase len tɛɛn.»

⁵O kon, mí vannda Kalaad kɔ sim o leendun peo Yurdɛn, le polale Efraim-nden nɛiyo kiolɔɔ laci, haliko telen oo telen vana pilɛ ndóò ɲaanun pɛ mì ndóò hin le hiovɔɔ, ndáà ɲuna ndu aa: «Vɛ̀ɛ̀ Efraimnɔɔ n co ni?» Te ndóò muli pɛ aa: «Ɛ-ɛ»

⁶ndáà dimul ndu le dimio aa: «Siubolɛt». O mɛi dimio lende mò dimi aa: «sibolɛt[13]». Kani ndóò nɔla dimio mɛɛ o bɛnda le dimio yɛ le. O kon ndáà bii vana kon ndáà dii ndu lon. Mí vannda vaalan belehiɔɔlu a latiɔn a sɔla piɔ́mndo o polale Efraim-nden nin o telen kon bɛngu.

⁷Yɛfte Kalaadenɔ tosa masalen Israɛlla coo vɔsilan tan ŋɔmpum, mó vu, má kumbu ndu Kalaad, o kobi ndɔ o velun nin-ndo nin.

⁸Yɛfte vuo, mí Ibsan fula Bɛtlɛhɛm-ndo siŋnun simlacinɔ Israɛlla.

⁹Mó vialu poaa beleyaa a hɔ́aa laandua beleyaa. Mó kɛsi cuavaa ndɔa kan o nɔlan vanaa nda fula o polale pilɛ nin te-a o laba. Mó cuel poaa ndɔa laandua fula vɛlɛ o polale pilɛ nin nda ndaa le-a. Vɔsilan tan ŋɔmmɛw o tosa Israɛlla masalen coo ni.

¹⁰O kon, mó vu, má kumbu ndu Bɛtlɛhɛm.

¹¹Ibsan vuo, mí Elɔn fula o polale Sabulɔn-nden nin-ndo siŋnun simlacinɔ Israɛlla le vɔsilan tɔ́.

¹²Mí ndu bɛɛ vu, má kumbu ndu Ayalɔn o tàndá Sabulɔn-ndo nin.

¹³Elɔn vuo, mí Abdɔn po Hillɛl fula Piratɔn-ndo siŋnun simlacinɔ Israɛlla.

¹⁴Mó vialu poaa belehiɔɔlu, mó sɔla poaa imamaa beleyaa, ndáà hel o sofɛlɛa belaŋɔmmɛw coo ni. Vɔsilan tan ŋɔmaa Abdɔn sim Israɛlla laci ni.

¹⁵O kon kɔɔli mó vu, má kumbu ndu Piratɔn, o tàndá Efraim-ndo nin o pembii Amalɛkea coo.