Read Kissi Masaa kialaa n'yamaa 13 Bible Online

Masaa kialaa n'yamaa 13 - Kissi bible

Masaa kialaa n'yamaa 13

¹Mí Israɛlla tosa vɛlɛ ɲɛ hɛnan Mɛlɛka loo. Lelan, mí Mɛlɛka mal nda Filistia o ba le vɔsilan belehiɔɔlu.

²Langbanɔ pilɛ va Sorea diolan Manoa, o yungoo pum nin o polale Dan-nden nin ndóò fula ni. Laa ndɔ ndóò vilu hɔ́ɔ́ le.

³Paale pum, mí mɛlɛkanɔ Hala-o fulal laa ndɔ kon ceen, mó dimul ndu aa: «I sina maa a nɔ hɔ́ɔ́ le, kani a co vana vialaa le. Kɛ nduyɛ, a cuanin folio ma velu poo.

⁴Kandɔɔ sisa, mandan taw, kol mamɔi le, kol ɲɛ-ɲɛ bii vana mò hiŋ vana hɔlla le, dia vɛlɛ ɲɛ-ɲɛ co o nɔɔlɛi le,

⁵le foli n co hunɔɔ cua-o, a le po nɔm n co hunɔɔ violɔɔ-o. Yiiŋii po kalaa bɛnda mì i kelun te, kani hɔ́ɔ́ kon siŋnunnin teengen le Hala lɔ́ɔ́ pá mó hun violun. Ndu kandunin Israɛlla baŋaa Filistia o ba ni.»

⁶Mí vuɛɛn kon muungu o ndu lo, mó kɔ downun pɔnɔ ndɔ kona aa: «Vana Hala-o pum cɔmnun ya. Vanáà ce ndu pɛ aa mɛlɛkanɔ Hala-o ni, kani kɔndɔfillo ndóò bii vana o ndu tofaa ni. I ɲuna ndu nɛɛ o fula-a le, ndu bɛɛ dimul-la diola ndɔlan te.

⁷Kɛ mó dimul-la aa i co folio cua mi velu poo, aa ya kol mamɔi le, ya kol ɲɛ-ɲɛ bii vana, mò hiŋ vana hɔlla le, ya dia vɛlɛ ɲɛdiaa nɔɔlɛi le. Kani aa po bɛnda mò siŋnun teengen le Hala-o po kon vanin ni, kandɔɔ ya o dembe háá a piɔ́m ndɔɔ.»

⁸O kon, mí Manoa piɛi Mɛlɛka aa: «Yandi Mɛlɛka, i tɛɛlun nɔm, vim vɛlɛ naa vana baala Hala n vim hoo naa-o, haliko mo cɔm naa ɲɛ naa n bɛnda le tosaa a po co hunɔɔ violɔn-ndo o kɔɔ-o.»

⁹Mí Mɛlɛka mulul Manoa piɛile len, mí mɛlɛkanɔ Hala-o muungu vɛlɛ o nda lo, mó cɔmnun laa ndɔ telen o va icali yondoo nin-ndo. Pɔnɔ ndɔ ve ndu ikɛi le.

¹⁰Mó ɲaanun, mó kɔ dimul pɔnɔ ndɔ aa: «Langbanɔ hin o ya lo ɲinkon-ndo fula lɛhau ya o hɔl kpendekele.»

¹¹Manoa tamala le, mó kɔa dɔ́ɔ́ nda laa ndɔ, mó kɔ sɔɔnguu langbanɔ kon ikɛi, mó ɲuna ndu aa: «Vɛ̀ɛ̀ nɔm óò soo paale pum o laa nuu lo ni?» Mí langbanɔɔ mulul ndu aa: «Oi, ya ni.»

¹²Mí Manoa dimul ndu vɛlɛ aa: «Lɔ́ɔ́ sɔɔn nɔmndon peelunnin-ndo, ɔ́ɔ̀ nɛila naa n bɛnda mì n kela coo le po kalaa mandaa lan? Yɛɛ nɛ naa n bɛnda yɛ mi n hun tosa le ndu?»

¹³Mí mɛlɛkanɔ Hala-o dimul Manoa aa: «Laa nɔm bɛnda mò kpakpala ɲɛm ya cɔm ndu-on kpede.

¹⁴O dia ɲɛ-ɲɛ fula o rɛsɛnndo nin te, ò kol manɔi le, ò kol ɲɛ-ɲɛ bii vana, mò hiŋ vana hɔlla le, o dia ɲɛ-ɲɛ co o nɔɔlɛi le. O bɛnda mò bii sɔɔn ya dimul ndu-on ɲɛkɛndɛi.»

¹⁵Mí Manoa dimul mɛlɛkanɔ Hala-o aa: «Cum-ndɔ mì n kɔ bɛɛndial nɔm cuin téndóó ma de.»

¹⁶Mí mɛlɛkanɔ Hala-o muli aa: «Hali i cum bɛɛ, i dinin ɲɛdiaa n co ya bɛɛndial-lo le. Kɛ taa yeema pɛ, a bɛɛndiaa sálà loamaa, a solul Mɛlɛka ndu.» Manoa ve sina maa mɛlɛkanɔ Hala-o le.

¹⁷Mí Manoa dimul ndu aa: «Cɔm naa diola nɔmndan le nɔm balikaa mello lɔ́ɔ́ sɔɔn nɔmndon peelunnin-ndo.»

¹⁸Mí mɛlɛkanɔ Hala-o muli aa: «Le yɛɛ nɛ n yeema yɛ diola nilan sinaa? Diola kaamaalan la co ni.»

¹⁹Mí Manoa bɛɛndiaa cuin téndóó a kpeyanndo, mó kɛsi ɲɛm mun o pow bandíláà coo le Mɛlɛka mun sálàá solullo, Mɛlɛka tosà kaamaalan-ndo pɛɛn. Manoa nda laa ndɔ lo

²⁰yelenyelen leyin va helɔɔ cɔnɔnndo o fonda-loamaa-lasálàá coo-o tofaa, má ca mɛlɛkanɔ Hala-o helnɔnndo coocoo o yelenyelen kon nin. Má del lɛŋ a kuumbuan o kɔl coo.

²¹O kon mí Manoa sina maa mɛlɛkanɔ Hala-o ni. Mɛlɛkanɔ kon cɔmnun lɛ nda lɔ́ɔ́-lɔ́ɔ̀ le.

²²Mí Manoa dimul laa ndɔ aa: «Lekɛ́ndɛi, vuo naa n co ni, kani n ce Hala a lehɔl.»

²³Mí laa ndɔ mulul ndu aa: «Te Mɛlɛka ndóò yeema pɛ le naa diyɔɔ, ndóò cɛlnin sálà loamaa naa a ɲɛm-kéan nan te, ndóò cɔmnin naa ɲɛ naa n ce-o le, ndóò dimulnin naa vɛlɛ sɔɔn naa n tuei mun-ndon te.»

²⁴Mí lanɔɔ Manoa vialu poo, mó ke ndu diolan aa Samsɔn. Mí poombɔɔ sul, mí Mɛlɛka dɔaw ndu duaa.

²⁵Samsɔn lo o dɔ́ɔ́ngɔ́ o tàndá Dan-ndo nin, Sorea a Ɛstaɔl tɛɛn, mí kɔl Mɛlɛka-o kandu ndu baalaa tosaa nin.