Read Kissi Masaa kialaa n'yamaa 14 Bible Online

Masaa kialaa n'yamaa 14 - Kissi bible

Masaa kialaa n'yamaa 14

¹Paale pum, mí Samsɔn kɔa Timna, mó saalun felengi laandu Filistinɔɔ pum ndon.

²Ndóò muungoo, mó kɔ dimul yungu ndɔɔ aa: «I saalun felengi laandu Filistinɔɔ pum Timna, i yeema mì la cuel-la ndu mò va laa ni.»

³Mí yungu ndɔɔ dimul ndu aa: «Vɛ̀ɛ̀ a ci felengi laandu celen o polale nɔmnden nin, te kon te o vanaa nɔmnda tɛɛn te? Filistia dii haa tooma le-a tɛɛn nɔm co kɔlan lanɔɔ yilɔɔ ni?» Kɛ mí Samsɔn mulul fuɲa ndɔ aa: «Ndu hɛnan ya ni, yil-la ndu mò va laa nuu.»

⁴Yungu Samsɔn-ndo ve sina maa Mɛlɛka pila le ndóò luei po ndaa yiyan kon nin le mɛɛ ndóò sɔlà fɛɛlɔɔ le Filistia cɔlɔbaa yɛ le. Nduyɛ o telen kon, Filistia o ba bɛngu Israɛlla va ni.

⁵Mí Samsɔn nda yungu ndɔɔ a va kɔlan Timna. Tuma nda tiiya o nakɔla n'rɛsɛnnda va Timna ciee-lekɔɔ lan nin-ndo, mí yàlà téndóó pum fulal Samsɔn fɛlɛmɛndɛn a kuuliaa.

⁶Mí kɔl Mɛlɛka-o toal Samsɔn coo, mó bii yàlà téndé kon, mó sɛɛsiaa ndu a laba mɛɛ vana sɛɛsiaa cuin cuaa nuaa yɛ. Kɛ o dimul fuɲa ndɔ a kala ndɔ ɲɛ o tosa kon-ndo le.

⁷Mó kɔannun, má kɔ dɔaw baltan nda cuaambɔ Filistinɔ kon. Ndóò hɛnan Samsɔn taw.

⁸Palɛi pum o kon kɔɔli, mó can muungoo Timna le ndu cuaa o nɔ̀u nin. O va kɔlan, mó sei le yàlà ndóò dii kon-ndo tofaa, mó komal lɛa pumboo o visi kalaa nin a lɛan lenin.

⁹Mó soli lɛma man, mó bii man o ba, mó va kɔlan a man dioo o nɛi. Ndóò bendallo yungu ndɔɔ, mó ke nda man le dioo, kɛ o dimul nda maa o yàlà vílɛ́iyo nin te ndóò soli man te.

¹⁰Mí fuɲaa Samsɔn kɔa o cuaambɔ kalaa lo, mí Samsɔn bɛɛndiaa ɲɛdiaa sɔvɛɔ lon, kani lende langbaa felengia ndáà tosa o nɔlan yiiyo ni.

¹¹Mɛɛ Filistia ce ndu, má hɛli langbaa felengia beleyaa le Samsɔn sɔɔnguuo ikɛi.

¹²Mí Samsɔn dimul nda aa: «I co niaa taloo pum dimul, te la cɔm pɛ kɔlɔ ndɔɔ, mì la tɛɛsial-la ndu, nanu a palɛi ŋɔmmɛvii kafoei he cuvɔɔ, i yɔngunin niaa domala lebɛngulan beleyaa a domala kafolan beleyaa.

¹³Kɛ te la nɔla le, mɛɛ niaa co ya domala lebɛngulan beleyaa a domala kafolan beleyaa yɔngu ni.» Má mulul ndu aa: «Ava, dimi tale kalaa, n co nɔm lani!»

¹⁴Mí Samsɔn dimul nda aa: «O ɲɛ dia-o nin ɲɛ vana dia-o fulá ni. O ɲɛ nɔ bɛmɛi-yo nin ɲɛ yeelɛiyo fulá ni.» Mí langbaa bimban o palɛi ndii yáá bɛngu, a sina tale kon kɔlɔɔ le few.

¹⁵O paale ŋɔmmɛwndɔlen[14] coo, má kɔ dimul lanɔɔ Samsɔn aa: «Fɛɛla pɔnɔ nɔm, haliko mo cɔm naa kɔlɔ taloo ho, te o co kon te n co nɔm lomɔɔ o yin a yungu nɔmndo kpede. Vɛ̀ɛ̀ o co le naa ɲɔɔn poondiaa o laba le niaa veelu naa nuaa le?»

¹⁶Mí lanɔɔ Samsɔn kɔa o pɔnɔ ndɔ lo a caŋndo, mó dimul ndu aa: «A yeema ya le few. I hɛnan nɔm hali ɲɛ-pɔmbɔ le. Le yɛɛ ma ɲuna vanaa nia kɔlɔ taloo pum a cɔm ya fɔlɔn tɛɛsiaa ndɔɔ le?» Mí Samsɔn mulul ndu aa: «Hali fuɲa nuu nda kala nuu, i dimul nda kɔlɔ taloo ho le. Le yɛɛ ya cɔm yɛnin nɔm kɔlɔ ndɔɔ?»

¹⁷Mí lanɔɔ Samsɔn lo ndu ilafi-lafiei kɔɔli a caŋndo o palɛi ŋɔmmɛvii kafoei ken kpow nin. O paale mɛɛlaalen coo, mí Samsɔn cɔm ndu kɔlɔ tale kalaa le saangiaa bɛndu o va ndu-o. Fɔ́ɔ́fɔ̀, mó kɔ cɔm vɛlɛ vanaa ndɔa kɔlɔ tale kalaa.

¹⁸O paale ŋɔmmɛwndɔlen coo, lɔ́ɔ́ pá mí paalen le del, mí vanaa va o kobio nin-nda hun dimul Samsɔn aa: «Yɛɛ nɛ yeela yɛ mo hiaw lɛan yeelaa? Yɛɛ nɛ nɔ yɛ bɛmɛi mo hiaw yàlàá?» Mí Samsɔn mulul nda aa: «Te niaa véé a naw ni téndóó le, niaa nɔlanin kɔlɔ ndɔɔ sinaa le few.»

¹⁹O kon mí kɔl Mɛlɛka-o toal Samsɔn coo, mó kɔa Askelɔn. Mó diw vanpiaandua beleyaa lon, mó cua domala ndalan, mó yɔngu vanaa cɔm kɔlɔ tale kon-nda lan le kafoo. O kon kɔɔli, mó can a kɔltuwvo, mó muungu o fuɲa ndɔ lo.

²⁰Má cua lanɔɔ Samsɔn, má yɔngu langbanɔ felengi va ndu Samsɔn ikɛi-yo[15] ndu.