Read Kissi Masaa kialaa n'yamaa 15 Bible Online

Masaa kialaa n'yamaa 15 - Kissi bible

Masaa kialaa n'yamaa 15

¹Telen pum hiovɔɔ, a telen koavaa n'mallo kpafii, mí Samsɔn kɔa laa ndɔ yilɔɔ. Mó yoo ndu cuin téndóó. Mí Samsɔn ɲuna le luɛyɔɔ o laa ndɔ lo cɛinin, kɛ mí lefu ndɔ kuuna ndu le luɛyɔɔ.

²Mí lefu ndɔ dimul ndu aa: «Ya i ca ko aa nɔm óò yeema lɛ ndu le. Lelan, mí ke caan nɔm ndu. Kɛ pɔmbɔ ndɔ hiow ndu naŋɔɔ, vɛ̀ɛ̀ a sinà ken te? Cua ndu o fonda bɛ ndɔ-o va!»

³Mí Samsɔn dimi aa: «O laan ndu, vana-vana bii lɛnin ya tɛɛ le mɔnɛ ya co hunɔɔ soli a Filistia-o le.»

⁴Mí Samsɔn kɔa, mó kɔ bii kàá kɛmɛ leyáá. Mó bɛɛndiaa tɛngɛla leyinndan, mó yiw kàà kan puilan a ŋiɔn-ŋiɔn, mó yiw tɛngɛla leyinndan la pilɛn-pilɛn o puila o yiw nda lan-ndan tɛɛn,

⁵mó mɛndul tɛngɛla lan, mó mal kàà kalaa o ciɛɔn Filistia nin, mí yinnden le loam malun latumbun va n'yiwaa-on, n va isisi-on, hali nakɔla olivieelan, mí la ŋɔa.

⁶Mí Filistia ɲuna le vana tosa dɛnɛ kon-ndo sinaa, má mulul nda aa: «Samsɔn ni! Le tùú lefu ndɔ fula Timna-o hɛlu ndu lanɔɔ o ba mó ke langbanɔ felengi va ndu Samsɔn ikɛi-yo-o[16].» O kon, mí Filistia kɔ loam lanɔ kon nda fuɲa ndɔ.

⁷Mí Samsɔn dimul nda aa: «Le ɲɛ niaa tosa hoo-o, i celnin yili le te i cii màá nuu mingi niaa coo le.»

⁸Mó del nda coo, mó diw nda diwvo pila. O kon kɔɔli, mó kɔ luɛi o buululan nin o pow kpovaa Etam, mó cal lon.

⁹Mí Filistia kɔ sim o tàndá Yuda-o nin, mí vanaa ndaa cɔwva kɔ tiila tàndá Lehi-o.

¹⁰Mí vanpiaandua Yuda ɲuna nda aa: «Le yɛɛ niaa hin yɛ naa delɔɔ coo a cɔwvo?» Mí Filistia mulul nda aa: «Le Samsɔn biyɔɔ mì n mingi ɲɛ o tosal naa-o naa n hin ni.»

¹¹O kon mí n'van vàála yaa o vanpiaandua Yuda tɛɛn a kɔa nɛɛ Samsɔn va o buululan nin o pow kpovaa Etam-nda. Má dimul ndu aa: «A sina lekɛ́ndɛi maa Filistia o ba bɛngu naa n co ni. Vɛ̀ɛ̀ o co dɛnɔɔ le n kɔ kondul naa nuaa le?» Mó mulul nda aa: «Ɲɛ nda Filistia tosal-la-o ya mingi ni.»

¹²Má dimul ndu aa: «Yiiyo naa n hin nɔm ni, mì n yoo Filistia nɔm.» Mí Samsɔn dimul nda aa: «La mɛnalan ya maa niaa pila diinin ya le.»

¹³Má mulul ndu aa: «Kɛì-kɛì bɛɛ! N nɔ yiyan diyaa nɔm te. O naa n yeema daama-o co le nɔm yiiyo a le nɔm malɔɔ Filistia o ba ni.» O kon má yii ndu a yoei sɛnɛiye ndii ŋiin, má soli ndu o buululan nin.

¹⁴Tuma nda tiiya Lehi-o, mí Filistia hun ndu bɔŋaa a yoondiaalan le cɔmndo maa a nɔla ndu. Kɛ mí kɔl Mɛlɛka-o toal Samsɔn coo, mó piasa. Fɔ́ɔ́fɔ̀, mí yoei ndáà yiw ndu congúlan a balan-nde kioli cɔ́-cɔ́ maa kɛi ŋɔalɛi.

¹⁵Mí Samsɔn cua yaale sofɛlɛ ndáà dii sɛnɛi-yo, mó diw vannda vàá pilɛ.

¹⁶Mó yonda kpélén aa: «I dii vannda vàá pilɛ a yaale sofɛlɔɔ. A yaale sofɛlɔɔ ndu pilɛ mí heelu vanvílɛ́iya bémboo.»

¹⁷Ciiyo dɔ́ɔ́, mó viaw yaale kalaa polon. Lelan nda ke fonda kon diolan ni aa Ramat-Lehi (kon co dimio ni aa «Pembii Yaalei»).

¹⁸Fɔ́ɔ́fɔ̀, mí kolɔɔ bii Samsɔn, mó tosa piɛilen mó dimul Mɛlɛka aa: «Éé Hala! Nɔm yɔngu ya vana nɔm baalaa kpaayaa ni mí nɔla vannda ha. Vɛ̀ɛ̀ mì vi nihau a bolola vesɛilan, mì del vanaa dii haa toma le-a o ba?»

¹⁹O kon, mí Hala buli tɛɛngei o soon va o pow kpova va kon Lehi-o-o, mí mɛnndan ma fula. Mí Samsɔn kol, mó sɔla yoomuma sɛnɛi. Má ke tɛngii mamɛŋii ken diolan aa Ɛin-Kore (kon co dimio ni aa «Tɛngii mamɛŋii vana co piɛilen-ndo»). Tɛngii mamɛŋii ken co vɔ háá paalen nden.

²⁰Mí Samsɔn yɔŋnun simlacinɔ Israɛlla le vɔsilan bidiin o paale Filistia.