Read Kissi Masaa kialaa n'yamaa 16 Bible Online

Masaa kialaa n'yamaa 16 - Kissi bible

Masaa kialaa n'yamaa 16

¹Paale pum, mí Samsɔn kɔa Kaasa, mó ca vanalanɔ suundɛiyo pum, mó hini a ndu.

²Má dimul vanaa va o kobi kon nin-nda maa Samsɔn co lon. O kon má balu simndan pindo, má lɔl ndu cumul pii o dio kobio. Icɔl kon pii, a yɔŋ Samsɔn ɲɛ-ɲɛ le, kani má dimi aa: «A paalen siaalen n diinin ndu.»

³Kɛ lɔma tasean koni Samsɔn lɔl ni. Di-tɛɛndo tɛndaa, mó can mó bii koŋnda tiɔnnda dio kobio, mó sungu lan a kèéden miunndon kpede, a yɔm ndáà nɛɛla koŋndan-ndo, mó siilun ndan kpow o congú, mó kɔ kɛsi lan o pembii va o kobio Hebrɔn hɔl-ndɔ-e tullo.

⁴O kon kɔɔli, mí Samsɔn kaola cuaa pum diolan Dalila, o bóllo Sorɛk nin cua kon va icali ni.

⁵Mí masaa ŋuɛɛnua Filistia kɔ dimul Dalila aa: «Dɛɛniaa Samsɔn mò cɔm nɔm ɲɛ yɔngu ndu yoomuma bɛnduan man-ndo a mɛɛ vana looku mì vana nɔla ndu yɛ, haliko mi n tiw ndu ba, mì n yii ndu. A tosa pɛ kon, naa kpow vana-vana yɔngunin nɔm volin latámán vàá pilɛ a kɛmɛ.»

⁶O kon mí Dalila ɲuna Samsɔn aa: «I co nɔm tɛɛlɔn, yandi, dimul-la ɲɛ yɔngu nɔm yoomuma bɛnduan man-ndo. Vɛ̀ɛ̀ kpeekpei vana looku yɛ mì vana tiwba le nɔm yiiyo?»

⁷Mí Samsɔn mulul ndu aa: «Te vana yii ya pɛ a yoei kpaasiai kiyɛii vesa vɔ lei ndii ŋɔmmɛw, i fula yoomuan, i muungu maa vanndacieaa tɔ̀a.»

⁸Mì masaa Filistia cuu Dalila yoei kpaasiai kiyɛiye ndii ŋɔmmɛw, ndii vesa vɔ le, mí Dalila yii Samsɔn a ndi.

⁹Nduyɛ Dalila ndóò cii nin vannda vionɔɔ o ndu lo cɛinin. Fɔ́ɔ́fɔ̀, mó yonda aa: «Samsɔn sei, Filistia hin nɔm delɔɔ coo!» Mí Samsɔn kili yoeì ken vanáà ca ko aa a yoei ŋɔalɛiye ndáà yii ndu ni. Vana-vana sina nɛɛ yoomuma ndɔma man maa va fulaa-a le.

¹⁰Mí Dalila dimul Samsɔn aa: «Huiyo n hui ya ni, ma dimul-la còòlan. Kɛ dimul-la nihau toɲaa mɛɛ vana looku mì vana yii nɔm yɛ.»

¹¹Mó mulul ndu aa: «Te vana yii ya pɛ a yoei sɛnɛi vana soli vɔ kpeku oo kpeku lei, i fula yoomuan, i muungu maa vanndacieaa tɔ̀a.»

¹²O kon, mí Dalila kɔ cua yoei sɛnɛiye, mó yii Samsɔn a ndi. Vannda va nin vɛlɛ a vianaa o ndu lo cɛinin. Mó yonda aa: «Samsɔn sei, Filistia hinul nɔm!» Mí Samsɔn kilikili yoei ndáà yii ndu ken balan-nde vanáà ca ko aa a kɛiyo ndáà yii ndu ni.

¹³Mí Dalila dimul Samsɔn aa: «O laan vɛlɛ, huiyo n hui ya vɛlɛ ni má dimul-la còòlan? Dimul-la nihau toɲaa kpeekpei mɛɛ vana looku mì vana tiwba le nɔm yiiyo yɛ.» Mí Samsɔn mulul ndu aa: «Taa lɔ pɛ kandela ŋɔmmɛwla co ya o lebol-tan mɛɛ vana lɔa kolaa nuaa yɛ, mà diŋila lan a nuiyo, mà yii lan o pikiei, i fula yoomuan, i muungu maa vanndacieaa tɔ̀a.»

¹⁴Mí Dalila hivi Samsɔn o lɔan, mó lɔa kandela ŋɔmmɛwla va ndu o lebol-tan mɛɛ vana lɔa kolaa nuaa yɛ, mó yii lan o pikiei. O kon kɔɔli, mó deŋi aa: «Samsɔn sei, Filistia hinul nɔm!» Mí Samsɔn yinga, mó sungu nuiyo a pikiei.

¹⁵Mí Dalila ɲuna ndu aa: «Yee hoo n co dimio ni aa a kaola ya? A laalan ya le. Tofa vɔ, bɛmbɛ leyáá co nin hoo ni, a co ya huiyo, ma kɛɛ le ya ɲɛ yɔngu nɔm yoomuma bɛnduan man-ndo cɔmndo.»

¹⁶Dalila lo ilafi-lafiei Samsɔn kɔɔli a sɔɔn pilɔn mun ndu dimullo lepalaa-lepala háá mí Samsɔn sanga yɔkɔɔ a mun tueyɔɔ, o nɔla lɛ biuvɔnndo le,

¹⁷mó kumbil Dalila kɔllo kpow, mó dimul ndu aa: «Kabi bɛɛ yiiŋii nii kilun-ndɔ le, kani yáà vilun-ndɔ le, mí siŋnun teengen le Hala. Te vana kili ya pɛ yiinde, i fula mayoomu, i muungu maa vanndacieaa tɔ̀a.»

¹⁸Mí Dalila sina maa Samsɔn cii ndu ɲɛ va ndu yoomuan yɔngoo-o cɔm, mó viam vannda le kɔlan masaa Filistia dimullo aa: «O laan nin, la hun, kani Samsɔn ciinun kɔl ya o ba.» Má yoo ndu volin ndáà cuel ndu ciɛ́i-yon.

¹⁹Mí Dalila hivi Samsɔn o lɔan ndu o vulan coo, mó veelu langbanɔɔ pum, mí langbanɔ kon kɔ sendi ndu kandela ŋɔmmɛwla va ndu o lebol-tan. O kon, mí Dalila kandu ndu nɔlaa, kani mí yoomuma ndɔan má kɔannun.

²⁰Mó yonda dɔ́ɔ́ kpélén aa: «Samsɔn sei, Filistia hinul nɔm!» Mó tiandu, o va yiyanndo maa o va lɛ hiɔlɔn mì ndóò tosa mɛɛ ndóò dema tosa yɛ. Kani o ve sina maa Mɛlɛka ndóò cii nin kpaaya ndɔɔ poonda le.

²¹Mí Filistia hun bii ndu, má pesi ndu hɔltan. Má kɔa a ndu Kaasa, má kɔ baa ndu yɔlɔn n'daɲan, má baŋ ndu pow bɛndu cuiyaa n'kullo ɲumbɔɔ o kaasoo.

²²O telen kon bɛngu faw, yiiŋii ndɔɛi ndáà kili-e va hindɔɔ.

²³Paale pum, mí masaa Filistia cuungian le ɲaaloo dɔwnɔnndo le nɔla nda nɔla Samsɔn-ndo a le Dakɔn piɔm ndaa sálà bɛndoo solullo. Má soli condei aa: «Piɔm naa mal Samsɔn yaamɔɔ naa naa o ba.»

²⁴Mɛɛ vannda ce dɔ́ɔ́ piɔm ndaa, má kandu ndu sangalaa, má va dimio aa: «Piɔm naa mal Samsɔn yaamɔɔ naa naa o ba. Ndu va lɛŋnde naalen tɛɛmbuuo ni, mó va vannda diwvo taw-taw.»

²⁵Mɛɛ nda dɔwnun ɲaale tei, má dimi aa: «La veelu Samsɔn mò hun mɛmi naa.» Má kɔ soli ndu o kaasoo, mí vannda va ndu tofaa, má va ndu mamɔɔ. Ndáà simio ndu o sungbuma cɛi soolaa tɛɛn,

²⁶mí Samsɔn dimul poombɔ va ndu baa saa le ndu nɛiyo cɔmndo-o aa: «Kɔ a ya o fonda ya tiwba mi pilan sungbuma bii cɛi soolaa ho-an-ndo, haliko mi sɛɛŋun.»

²⁷Nduyɛ, cɛiyo va o piaa cá a vanndacieea, vanpiaandua a vanlaandua. Masaa ŋuɛɛnua Filistia bɛɛ va lon, vanaa va o sɛmtɛ ma va Samsɔn tofaa a ndu mamɔɔ-a va le vannda vàála yaa.

²⁸O kon, mí Samsɔn piɛi Mɛlɛka aa: «Éé Maalii, Mɛlɛka! Yiyan ya coo yandi, mà mingi ya yoomuan o n'dial o laan daama, haliko mi mingul Filistia ha màá nda pesi ya hɔlta nila tiɔnndan-ndo o lepilɔɔ.»

²⁹Mí Samsɔn keeliaa balan o sungbuma miɔmma cɛiyo ndóò cal coo-an, mó hol ba ndɔ kɛndɔɔ o sungbulen lepilɛ, mó hol ba mɛllo o sungbulen lepilɛlen.

³⁰Mó yonda kpélén aa: «I vu vɔ latulu naa Filistia!» Mó kindun man tɛɛn a yoomuma ndɔan kpow, mí cɛi kalaa komba masaa Filistia a vanaa va lenin-nda kpow coo. Vanaa vi ɲinkon a Samsɔn latulu-a ndáà hiow sɛ́lɔ́ɔ́ a vanaa Samsɔn kalaa diw lɔ́ɔ́ o va yoomu-o-a.

³¹Mí puapilɛa ndɔa a yungu ndɔɔ hun cua ndu o vílɛ́iyo, má kɔa a ndu, má kɔ kumbu ndu nɛɛ ndáà kumbu Manoa fuɲa ndɔ-a, Sorea a Ɛstaɔl tɛɛn. Vɔsilan bidiin Samsɔn tosa simlacilen Israɛlla coo ni.