Read Kissi Masaa kialaa n'yamaa 17 Bible Online

Masaa kialaa n'yamaa 17 - Kissi bible

Masaa kialaa n'yamaa 17

¹Langbanɔɔ pum va o tàndá n'pembu Efraim-ndo nin, diolan ndu Mika.

²Paale pilɛ, mó ɲuna kala ndɔ aa: «A loonun pá maa lɔ́ɔ́ nda ciimbul nɔm volin latámán vàá pilɛ a kɛmɛ-o, má mɛna vui kon ya o hɔl? Volin mun co ya o ba. Yáà cua mun ni.» O kon, mí kala ndɔ dimi aa: «Po nuu, màá Mɛlɛka dɔw nɔm duaa!»

³Mí Mika mingi volin vàá pilɛ a kɛmɛn mun kala ndɔ o ba, mí kala ndɔ dimi aa: «Yáà cii nin tuu o kɔl nuu nin le volion mun siinguuo teengen le vali Mɛlɛka-o, le nɔm po nuu piɔmndo toosiallo a volin teengian. Lelan má cè niko mun.»

⁴Kɛ mí Mika mingi vɛlɛ kala ndɔ volin kalan o ba, mí kala ndɔ cua volion kɛmɛ lediin lecoo, mó yɔngu vana teengiaa n'volio, mí vana kon teengiaa mun, mó toosiaa tuulaa pum, mó cɔaw piɔmndo a ciliŋun teengian mun, mó kɔ kɛsi ndu o Mika lo cɛinin.

⁵Mika kon yɛ, ndóò nɔ cɛi máándo. Mó toosiaa doma ifalen solia lasálàá, mó toosiaa vɛlɛ piɔmaa tongoninnda, mó kɛsi po ndɔɔ pilɛ lon le sálàla ndɔlan solio.

⁶O telen kon, masa ve Israɛl te. Vana-vana va hɛnan ndɔɔ tosaa.

⁷Langbanɔ felengoo pum va icali Bɛtlɛhɛm o tàndá Yuda-o nin, leviinɔɔ o va ni.

⁸Mó faŋan Bɛtlɛhɛm o tàndá Yuda-o nin le kɔlan calta celen kilaa o sumialle nɛɛ ndóò nɔlanin-nda. O lo kɔlan, mó tiiya o Mika lo, o tàndá n'pembu Efraim-ndo nin.

⁹Mí Mika ɲuna ndu aa: «Kuɛɛ n cɛn yɛ nuaa?» Mó mulul ndu aa: «Leviinɔɔ ya co ni, Bɛtlɛhɛm o tàndá Yuda-o nin ya fula ni. Fonda calaa ya co nuwviaa ni.»

¹⁰Mí Mika dimul ndu aa: «Violu ya cua! Cal sumialii ni ma va vana-solia-lasálà nuu. O kon, i vanin volin latámán tɔ́ nɔm yɔngoo o vɔsio nin, mì va vɛlɛ volɔɔla cuɛinanndan a ɲɛdiaa nɔm keo.»

¹¹O kon mí leviinɔɔ cɛl le calle o ndu lo. Mí Mika bii ndu maa po ndɔ.

¹²Mó siinguu ndu vana-solia-lasálà ndɔɔ, mó yiya ndu o ndu lo.

¹³Mí Mika dimi aa: «I laalan maa o laan Mɛlɛka co ya dɛnɛ kɛndɔɔ tosal, kani leviinɔɔ co nin vana-solia-lasálà nuu ni.»