Read Kissi Masaa kialaa n'yamaa 18 Bible Online

Masaa kialaa n'yamaa 18 - Kissi bible

Masaa kialaa n'yamaa 18

¹Tuma pum va, masa ve o lɛŋnde Israɛl-ten nin te. O telen kon nin, mí vanaa fula o polale Dan-nden nin-nda va lɛŋnden nuwviaa le calle, kani o polama Israɛlla tɛɛn, polale len daama léè sɔla vɔ nɛɛ calaa le ni[17].

²Mí vanaa fula kan o polale len nin-nda hɛli vanaa cɔvaa mayoomua nda ŋuɛɛnu nda pila tɛɛn nɛɛ nda va Sorea a Ɛstaɔl-la, má viam nda le lɛŋnde len mɛɛndianndo ɲɛkɛndɛi. Vanaa kan tiiyaa o tàndá n'pembu Efraim-ndo nin, má sim o cɛi Mika-o ikɛi.

³A lo lon, má tuɛi langbanɔ leviinɔɔ pum sɔɛi, má sina ndu diomndo. O kon má kɔa, má ɲuna ndu aa: «Nɛ̀ɛ́ hin yɛ a nɔm nanu? Yɛɛ nɛ n co yɛ tosaa nanu? O yɛɛ coo n cal-lɛ nanu?»

⁴Mó mulul nda aa: «Baalaa Mika ke ya nanu ni, mó va ya salaa. Kani vana-solia-lasálà ndɔɔ ya co ni.»

⁵O kon má dimul ndu aa: «Ɲunal-lɔ naa Hala, le sinaa te kela naa ho yelelalnin naa.»

⁶Mí vana-solia-lasálà kon dimul nda aa: «Siòòŋii bii niaa le, Mɛlɛka co niaa ikɛi o kela niaa ho nin.»

⁷O kon mí langbaa ŋuɛɛnua kan bii nɛiyo, má tiiya Lais. Vanaa nda komal lon-nda vannun icali yili o kɔlɲuloo a o nila ɲululan nin maa mɛɛ Sidɔnnda vannun yɛ. Vana-vana ndóò nɔ isɔɔ o kɔl a vanaa va masalen tosaa-a le. Vanaa kan va icali Sidɔnnda levil, a ve vɛlɛ o ba vana bɛngu le.

⁸Mí kiilaa fula kan o polale Dan-nden nin-nda muungu Sorea a Ɛstaɔl, mí puapilɛa ndaa ɲuna nda lavàà lon.

⁹Má dimul nda aa: «La cɔn mì n kɔ delnun vannda Lais coo a cɔwvo. Kani lɛŋnde kɛndɛ-kɛndɛlen lɛŋnde ndalen le co ni. Là ló icali a siɛlɛiyo nuaa le, la keleŋa lakɔ le lɛŋnde len hiɔlɔɔ.

¹⁰Te la tiiya pɛ, la komalnin vanaa tiindan nda pila-a icali lon. Lɛŋnde len le co lebɔɔ. Hala cii len malɔɔ niaa o ba. O ɲɛm co o lɛŋnden coo-on nin, ɲɛ-ɲɛ bii vana lepɛŋ o fonda kon te.»

¹¹O kon, mí vanaa cɔvaa fula o polale Dan-nden nin-nda kɛmɛ leŋɔmpum a bɛɛndian le cɔwvo, má can Sorea a Ɛstaɔl,

¹²má kɔ kila dɔ́ɔ́ngɔ́ ndaa Kiriat-Yearim o tàndá Yuda-o nin, a ba paalen le del-lo. Lelan nda ke fonda kon diolan ni aa Mahane-Dan (kon co dimio ni aa «Dɔ́ɔ́ngɔ́ Dan-ndo»), diola lan o nɔ háá paalen nden ni.

¹³Ndáà cɔnɔnndo lon, má kɔa o tàndá n'pembu Efraim-ndo nin, má tiiya o Mika lo bɛɛ.

¹⁴Mí vanaa ŋuɛɛnua ndáà kɔɛ kan lɛŋnde Lais len mɛɛndianndo-a dimul caaŋaa ndaa aa: «La co pá sina maa doma ifalen solia lasálàá, piɔmaa tongoninnda, piɔm tuulaa a piɔm nda cɔw a ciliŋun teengian-ndo co o cɛilan ndan o pilɛ nin? Niaa pila yiyan niko ɲɛ niaa bɛnda mì la tosa-o.»

¹⁵O kon kɔɔli, mí vanaa ŋuɛɛnua kan kɔ luɛi o Mika lo cɛinin, má ɲuna langbanɔ leviinɔ va kon lon-ndo lavàà lon.

¹⁶O telen kon, n'van kɛmɛ leŋɔmpumaa fula kan o polale Dan-nden nin-nda va isisi o cɛiyo sondoo a ɲɛm cɔwvon o laba.

¹⁷Telen vana-solia-lasálà kon va isisi o dio nda vanaa kɛmɛ leŋɔmpumaa ɲɛm cɔwvon va kan o laba-a-o, mí vanaa ŋuɛɛnua kɔ mɛɛndian kan lɛŋnden-nda luɛi cɛinin, má cua tuula piɔm va lon-ndo, doma ifalen solia lasálàá, piɔmaa tongoninnda, má cua vɛlɛ piɔm ndáà cɔw kon a ciliŋun teengian-ndo.

¹⁸Tuma nda va luɛyɔɔ o Mika lo cɛinin má va tuula piɔm va lon-ndo, doma ifalen solia lasálàá, piɔmaa tongoninnda a piɔm ndáà cɔw kon a ciliŋun teengian-ndo cuaa-o, mí vana-solia-lasálàá ɲuna nda aa: «Yɛɛ niaa co yɛ hoo tosaa?»

¹⁹Má mulul ndu aa: «Keleŋa mei! Handun baa o sondo ma hin naa kɔɔli! Violu naa cua, ma siŋnun vana-solia-lasálàá le polale naalen. Kani ɔ́ɔ̀ ɲɛ co fisa le nɔm-ndo? Siŋnɔnndo vana-solia-lasálà le yungu vanndo ndu pilɛ kpé baa siŋnɔnndo vana-solia-lasálàá le polalen lepilɛ kpulukuu o Israɛlla tɛɛn?»

²⁰Mí ɲɔɔ hɛnan vana-solia-lasálà kon taw a tuu kon, mó cua dɔ́ɔ́ doma ifalen solia lasálà ndɔɔ, piɔmaa tongoninnda a piɔm ndáà cɔw kon a ciliŋun teengian-ndo, mó kɔannun nda kɔɔli.

²¹Mí vanaa fula kan o polale Dan-nden nin-nda mulin kɔnndan. Má hivin cuaambɔa, cɔlua a volɔɔlan nda laci.

²²Tuma nda kɔɛnnun má mɛi cɛi Mika-o levil lándan-ndo, mí Mika nda vanaa ndáà nɔ cɛilan nɛɛ pilɛ-a koma veelan, má ɲaanun nda kɔɔli.

²³A lo nda yoondiaalan kɔɔli, mí vanaa fula kan o polale Dan-nden nin-nda mulin, má ɲuna Mika aa: «Yɛɛ nɛ yɔŋnun yɛ nɔm ma va yonda bɛndoo ho?»

²⁴Mí Mika mulul nda aa: «Ɔ́ɔ̀ ɲuna niaa co ya-o? La cii piɔmaa niaa ya cɔw-va cua, mí la bii vana-solia-lasálà nuu le kɔnndan a ndu. Ɲɛ-ɲɛ celen bɛɛ i loo lɛhau le.»

²⁵Mí vanaa fula kan o polale Dan-nden nin-nda mulul ndu aa: «Bɔ́ɔ́lùù naa nilan te dɛ! A bɔɔluu pɛ naa nilan, vannda pum o naa tɛɛn a co kɔltan tuulu, má del niaa coo. O kon, nɔm pila kondulun dɛnɛ, a kondul vɛlɛ cɛi nɔmndo dɛnɛ.»

²⁶O kon kɔɔli, má mulin vɛlɛ kɔnndan. Mika cɔu maa vanaa kan hiow ndu yoomuan, mó mulin, mó muungun o ndu lo.

²⁷Mí vanaa fula kan o polale Dan-nden nin-nda kɔannun a ɲɛm Mika ndóò toosiaa-on a á vana-solia-lasálà ndɔ va ndu o ba bɛngu-o. Má kɔ del kobio Lais coo a cɔwvo, má diw vanaa va icali lon o kɔlɲuloo nin-nda, má loam kobi kalaa.

²⁸O bóllo Bɛt-Rehɔb nin Lais va ni, o va Sidɔn levil lándán. Vanaa va o kobi kon nin-nda ve vɛlɛ o ba vana bɛngu le. Lelan vana-vana hin le nda cɔwvo mala le. Mí vanaa fula o polale Dan-nden nin-nda mingi kobi kalaa tangul, má calnun ndon.

²⁹Ma ke Lais diola celen aa Dan, maa mɛɛ fuɲa nda mamaa, po Yakɔb-o ndóò nɔ diolan yɛ.

³⁰Mí vanaa fula kan o polale Dan-nden nin-nda luei piɔm Mika-o o cɛi máándo nin, má siinguu ndu ɲɛ nda soolaa. O kon, mí Yonatan po Kɛrsɔn-ndo, po imama Moise-o siŋnun vana-solia-lasálà ndaa. Mí polale Yonatan-nden le va baala kon tosaa háá o telen nda kɔɛ a vannda o biyɔɔ nin-ndo.

³¹Piɔm Mika kon va o mandaa nda o ba lon o telen Cɛi-Hala-o cii Silo-o kpow bɛngu.