Read Kissi Masaa kialaa n'yamaa 19 Bible Online

Masaa kialaa n'yamaa 19 - Kissi bible

Masaa kialaa n'yamaa 19

¹Tuma kon, masa ve o lɛŋnde Israɛl-ten nin te. Leviinɔɔ pum va icali o tàndá n'pembu Efraim-ndo mɛɛlulan, mó bii balufaa fulaa Bɛtlɛhɛm, o tàndá Yuda-o nin.

²Kɛ mí balufaa ndɔ kon tambu kɔl a ndu[18], mó faŋan mó muungun o fuɲa ndɔ lo Bɛtlɛhɛm, mó kɔ cii paangon mún hiɔɔlu lon.

³Mí pɔnɔ ndɔ kɔa ndu kɔɔli, ndóò yeema le ndu dɛɛniaa le muungoo. Mó kɔa a buɛi ndɔɔ a á sofɛlɛa nda ŋiɔn. Mí cua kon kɔa a pɔnɔ ndɔ o yiya o fuɲa ndɔ lo cɛinin. Fuɲa ndɔ cɔu ndu dɔ́ɔ́, mó bii ndu a kɔlkɛndɔɔ.

⁴Mí lefu ndɔ kɛɛlu ndu le muungoo. Le hee, má tosa palɛi ndii yáá o lefu ndɔ lo cɛinin ndon nda buɛi ndɔɔ, lon nda va dioo, kolɔɔ a lɔan ni.

⁵O paale hiɔɔlundɔlen, má can idiiyo púŋ. Lɔ́ɔ́ leviinɔɔ congun le kɔnndan-ndo, mí lefu ndɔ piaandoo dimul ndu aa: «La kiolu fɔlɔn saasan[19] le yoomuan sɔlaa, malan niaa kɔa.»

⁶O kon mí poaa ŋiɔŋaa kan cal latulu, má dia, má kol. Mí lefoo dimul leviinɔɔ aa: «Cɛl mì n lɔlnun vɛlɛ hau nanu, mà dɔwnun ɲaale.»

⁷Leviinɔɔ ndóò yeema le kɔnndan, kɛ mí lefu ndɔ lo ndu ilafi-lafiei kɔɔli háá mó cɛl le lɔan vɛlɛ lon ɲinkon.

⁸O paale ŋuɛɛnundɔlen, mó can idiiyo púŋ le kɔnndan. Mí lefu ndɔ dimul ndu aa: «Kiolu vɔ fɔlɔn sáásan ma sɔla yoomuan, a paale yɔngannden dɔ́ɔ́ la kɔɛ.» O kon, má dia ɲɛdiaa latulu.

⁹Tumaa tiiyaa, mí langbanɔɔ can le kɔnndan nda balufaa ndɔ a buɛi ndɔɔ. Kɛ mí lefu ndɔ dimul ndu aa: «La piw nihau, ɲumndan ma co nin le tolɔɔ, la lɔl nanu, mì la dɔwnun ɲaale. Siɔdii púŋ, la pena cɔnɔn le kɔlan. O kon, la muungu o niaa lo.»

¹⁰Kɛ langbanɔɔ cɛl lɛ le, mó can kɔnndan nda balufaa ndɔ a sofɛlɛa ndɔa ŋiɔŋaa volɔɔlan la va lapɛmbiaa o lakɔɔ-a. Má tiiya háá Yebus ciee-lekɔɔ, Yerusalɛm pɛɛn.

¹¹Tuma nda tiiya ciee-lekɔɔ-o, paalen le va nin le delɔɔ. O kon, mí buɛi ndɔɔ dimul ndu aa: «N kɔ o kobi Yebusiia nin, mì n kɔ lɔl lon.»

¹²Mí vana ndɔ bɛndoo mulul ndu aa: «Ɛ-ɛ, n kuenin o kobi naa n sina hoo vana nin too nin te, kani Israɛlaa co lon te. N hiow mì n kɔɛ háá Kibea.»

¹³Mó dimul vɛlɛ ndu aa: «N kindin mì n tiiya Kibea, te kon te Rama, mì n kɔ lɔlnun o kobila tiɔnnda lan o pilɛ nin.»

¹⁴Má bii nɛiyo, má hiaw. Tuma nda tiiya Kibea ciee-lekɔɔ o tàndá Bɛnyamɛn-ndo nin-ndo, mí paalen le del.

¹⁵Le hee, má mulin a ba Kibea-o le kɔlan lɔan ndon. Ndáà tiiyaa ciee, má kɔ cal o luŋ, kɛ vana-vana yiya nda cɛinin te.

¹⁶Icɔl pilɛ kon, fal yuuvɛiyo pum va fulaa o ciɛi ndɔɛi nin nɛɛ o va baalaa-a, mó va muungoo ciee. O tàndá n'pembu Efraim-ndo nin ndóò fula ni, kɛ mó va icali Kibea ciee, o tàndá Bɛnyamɛn-ndo nin.

¹⁷Mó tofa, mó ca langbanɔ va kon o kela kon nin-ndo o falii kobi kon, mó ɲuna ndu aa: «Kuɛɛ n cɛn yɛ? Kuɛɛ n co yɛ kɔlan?»

¹⁸Mí langbanɔɔ mulul ndu aa: «Bɛtlɛhɛm o tàndá Yuda-o nin naa n co fulaa ni, mì n va kɔlan o tàndá n'pembu Efraim-ndo mɛɛlulan. Lon ya co icali ni, o ya lo lon ya co muungoo ni, Bɛtlɛhɛm yáà kɔɛ kelaa ni. O co macoaa i sɔla vɔ yiya le.

¹⁹Kɛ nduyɛ puiyo a foeende co naa o ba le sofɛlɛa naa. N nɔ vɛlɛ ɲɛdiaa a mɔiyan le ya pila, le balufaa nuu a le buɛi nuu. Ɲɛ-ɲɛ co naa lepɛŋ te.»

²⁰O kon, mí fal yuuvɛi kon dimul ndu aa: «A caa hunɔɔ. Ɲɛ-ɲɛ bii nɔm pɛ pɛŋnden i nuwvialnin nɔm kon, kɛ a bɛnda ma lɔl o bɛ́ɛ̀ le.»

²¹Mó luei nda o ndu lo, mó ke sofɛlɛa billo. Mí vanaa kelaa kan pulu pelon, má dia ɲɛdiaa, má kol.

²²A lo ɲɛdiaa dioo, mí vanaa fondoa pum o kobi kon nin a hun sɛ́lɔ́ɔ́ fili-fili, má balu cɛiyo sɔ́, má va dioo lɔɔ. Má dimul vana cɛiyo aa: «Solul naa langbanɔ n yiya o nɔm ndo-o. N yeema mì n va a ndu[20].»

²³Mí fallo fula mó dimul nda aa: «Puapilɛa niaa, i tɛɛlun niaa, la tosa dɛnɛ vɔɔn súú vaa nuaa le, la tosa dɛnɛ lamàà súú vaa nuaa le, kani sumialii nii langbanɔɔ ho co ni.

²⁴La mɛi-yɔ mì cuu niaa cua ni laandu sina vɔ dɛnɛ vanapɔnɔ loo, langbanɔɔ ho nɔ vɛlɛ balufaa ndɔ nanu, i co nda niaa solul, mì la tosa hɛnan niaa a nda. Kɛ la tosa dɛnɛ lamàà súú vaa nuaa a langbanɔɔ ho le.»

²⁵Ndáà yeema le lani yaŋɔɔ le. O kon, mí langbanɔ levinɔɔ yoo nda balufaa ndɔ o bɛ́ɛ̀. Má lɔl hinilan a ndu icɔl kon pii háá telen paale siaalen.

²⁶Paalen kandɔɔ siɔu, mí cuaa hun del o fallo lo dio, nɛɛ pɔnɔ ndɔ va o yiya-a. Mó lo lon háá mí ɲɔɔ tenga.

²⁷Ɲɔɔ tengaa, mí pɔnɔ ndɔ kumbi dioo le kɔnndan. Kɛ mó ca balufaa ndɔ ihini o dioo bɛngu, bala ndɔlan la va lahandaa o kèédei coo,

²⁸mó dimul ndu aa: «Cɔn n kɔ.» Kɛ o muli le[21]. Mí pɔnɔ ndɔ heelu ndu o sofɛlɛ ndɔɔ coo, mó hiaw o ndu lo.

²⁹Ndóò tiiyaa o ndu lo, mó cua mɔɛi, mó kilikili balufaa ndɔ vílɛ́i kon bungan tɔ́ a miun. Mó piɔw mun polama Israɛlla tɛɛn.

³⁰Mí vanaa ce dɛnɛ kon-nda kpow a va dimio aa: «Kabi Israɛlla fula Esipte, n ci vɔ dɛnɛ súú vaa nuaa le, dɛnɛ vaa nuaa yɔŋnun-ndɔ le few. Lelan la yiyan a dɛnɔɔ ho o kɔɔ, la kennan kɔlkaloo lecoo, o kon mì la tosa mɛɛ o bɛnda yɛ.»