Read Kissi Masaa kialaa n'yamaa 2 Bible Online

Masaa kialaa n'yamaa 2 - Kissi bible

Masaa kialaa n'yamaa 2

¹Mɛɛ mɛlɛkanɔ Hala-o fula Kilkal, mó kɔa Bokim. Mó kɔ dimul Israɛlla aa: «I soli niaa Esipte mí kɔa a niaa o lɛŋnde ya mɛnalan sindɛ fuɲaa niaa mamaa le nda keo len nin. Mí dimul niaa maa i mangalanin kpema ya yiilu niaa-o lɔ́ɔ́-lɔ́ɔ̀ le.

²Mí dimul niaa maa o bɛnda mì la cɛlan o ɲɛ-ɲɛ coo niaa vanaa co o lɛŋnden nden nin-nda le, maa la puusiaa máánnda ndalan, kɛ la tui ya diom te. Le kɔlɔ yɛɛ nɛ niaa tosa yɛ lende?

³Lelan bɛɛ ya tosa ni mí la bumba nda, la co lo icali latulu niaa ndaa mì halaa ndaa siŋnun pow boŋaa le niaa.»

⁴Lɔ́ɔ́ mɛlɛkanɔ Hala-o cii Israɛlla kpow sɔɔn mun dimul-lo, mí vannda kpow soli diomndan, má caŋ.

⁵Má ke fonda kon diolan aa Bokim (kon co dimio ni aa «Vanaa co caŋndo-a»). Má solul Mɛlɛka sálàlan o fonda kon.

⁶Mí Yosue dimul vannda le muungoo o la nda lo. Mí Israɛlla muungu o calta ndala yɛ́-yɛ́lan, má bii lɛŋnden kpow.

⁷Mí vannda tosal Mɛlɛka baalaa háá mí Yosue vu, háá mí kaasoŋaa ce paale Yosue len a dɛnnda kaamaala Mɛlɛka tosal Israɛlla nda o hɔl-tan-nda bɛɛ cuu vu.

⁸Yosue ndóò nɔ vɔsilan kɛmɛ a tɔ́, mó sɔla piɔ́mndo.

⁹Má kumbu ndu o lɛŋnde ndóò sɔla len coo, Timnat-Herɛs pɛɛn, o pembun va o tàndá Efraim-ndo nin-ndon tɛɛn, o pembei Kaas a maluaŋ.

¹⁰Mí vanaa nda va lambi pilɔɔ-a kpow diam fuɲaa ndaa ciee-piɔ́m, mí lambi celen koma can nda kɔɔli, ndáà sina Mɛlɛka le, ndáà sina vɛlɛ ɲɛ Mɛlɛka tosal Israɛlla-o le.

¹¹Mí cuavaa Israɛlla tosa ɲɛ hɛnan Mɛlɛka loo, má sooluu Baalla.

¹²Má mulul Mɛlɛka Hala fuɲaa ndaa kɔɔ, o soli nda Esipte-o pɛɛn. Má mulin o halaa celennda lo, a vanaa balu nda o lɛŋnde len nin-nda va sooloo-a, má va nda sooloo. Má tɛɛmbuu Mɛlɛka kɔllo.

¹³Má mulul Mɛlɛka kɔɔ, má va Baal a Astartee sooloo.

¹⁴Mí Mɛlɛka tuulu kɔl a Israɛlla, mó mal nda vanaa del vannda coo-a o ba, má del nda coo, má poondiaa ɲɛm ndan, má pisi nda yaamɔaa ndaa balu nda-a o ba, a nɔla nda simullo le.

¹⁵Nɛɛ-nɛɛ ndáà kɔɛ pɛ, ba Mɛlɛka-o va nda simullo le nda dɛnɛ palaa tuisio coo. Mí dɛnɛ palaa bɛndoo toal nda coo mɛɛ Mɛlɛka ndóò dimi, mí ndóò mɛnalan nda yɛ.

¹⁶Mí Mɛlɛka suili masaa kialaa n'yamaa le nda baŋaa vanaa va nda saangiaa a nda ɲɛm ndan poondiaa o laba-a o ba.

¹⁷Kɛ a ve bɛɛ masaa kialaa n'yamaa kan lani yaŋɔɔ le, halaa celennda tuŋ nda va sooloo ni. Ma baŋ vulan nda o labɛngunin. Ma mulul dɔ́ɔ́ nɛila fuɲaa ndaa va kelaa coo lan kɔɔ, a bii tɔŋnda Mɛlɛka lan mɛɛ fuɲaa ndaa va tosaa yɛ le.

¹⁸Masa kialaa n'yama oo masa kialaa n'yama Mɛlɛka ndóò simi pɛ nda laci, háá mí masa kialaa n'yama kon ndóò vi, Mɛlɛka va ndu ikɛi le nda baŋaa yaamɔaa ndaa o ba. Kani ɲííye va Mɛlɛka a nda le koŋul nda va o bɛpɛla yaamɔaa ndaa va nda tuisio coo-o bɛngu-o.

¹⁹Kɛ te masa kialaa n'yama kon ndóò vi dɔ́ɔ́ pɛ, ndáà cɔɔlu muungu o laasianndo nin a halaa celennda sooloo a nda vulan baŋɔɔ o labɛngunin. A ve ɲɛ-ɲɛ faŋa lecoo o dɛnnda ndala vɔɔnndan nin a o kela nda lanila kaloo nin te.

²⁰Mí Mɛlɛka tuulu kɔl a cuavaa Israɛlla, mó dimi aa: «Le tùú vannda ha cii kpema ni yáà yiilu fuɲaa ndaa mamaa-o tɛɛmbuu, má kɛɛ le sɔɛi nii biyɔɔ few-vo,

²¹i tuw lɛnin vanaa-mangalaa-isɔaa Yosue mɛi nda tɛɛn mó vu-a nda laci le few.

²²A nda ya co Israɛlla tɔɔndan ni, le sinaa taa lonin o nɛi nuu coo mɛɛ fuɲaa ndaa lo lecoo yɛ.»

²³O kon mí Mɛlɛka kɛsi vanaa-mangalaa-isɔaa o mel kan Yosue o ba le-a nda tɛɛn, o yala nda tovɔɔ le.