Read Kissi Masaa kialaa n'yamaa 20 Bible Online

Masaa kialaa n'yamaa 20 - Kissi bible

Masaa kialaa n'yamaa 20

¹Mí Israɛlla kpow a cɛlan, mí sɛ́lɔ́ɔ́ fula nɛɛ-nɛɛ ka, kandɔɔ Dan a ba luaŋ-ndo, kɔlan tiiyaa háá Bɛɛr-Seba a ba too, keiyo a tàndá Kalaad-o a ba paalen le can-ndo, má cuungian Mɛlɛka o hɔl Mispa maa vana pilɛ kpé.

²Bolii lapangɛi Israɛlla kpow va o cuungian vanaa Hala-a kan: vanaa cɔvaa kpeekpeyaa ndáà caa mɔɔn cɔwvon hiŋndo-a va faw-faw vaalan kɛmɛ lehiɔɔlu.

³Mí vanaa fula o polale Bɛnyamɛn-nden nin-nda tuɛi maa Israɛlaa tɔ̀a va a cuungiannda Mispa. Mí Israɛlla ɲuna aa: «Vɛ̀ɛ̀ kpeekpei dɛnɛ kpundɔɔ ho tosan yɛ?»

⁴Mí langbanɔ leviinɔ balufaa ndɔ vi-o muli aa: «Yáà tiiyaa naa balufaa nuu Kibea ciee, o tàndá Bɛnyamɛn-ndo nin le lɔan,

⁵mí vannda Kibea hun le ya delɔɔ coo icɔllo, má balu cɛi ya va nin-ndo sɔ́. Ndáà yeema le ya diyɔɔ, kɛ má hini a balufaa nuu, má hiaw ba a ndu háá mó vu.

⁶Lelan ya cua dialun ndɔn ni, mí kilikili mun bungan, mí piɔw mun polama yɛ́-yɛ́ma Israɛlla kpow tɛɛn. Kani bɛɛtambɛiyo a mààla vɔɔnndan pila nda luei Israɛl nuaa ni.

⁷Lelan, mɛɛ niaa Israɛlla co nɛɛ pilɛ nuaa kpede yɛ, la tùndú mì la tosa mɛɛ o bɛnda yɛ.»

⁸O kon, mí Israɛlla kpow a can o lepilɔɔ, má dimi aa: «Naa kpede, vana-vana co lɛhau muungu o cɛi-kola-toandaa ndɔɔ nin, te kon te o ndu lo cɛinin te.

⁹O naa n co Kibea tosal-lo co hoo ni: n co siondei malɔɔ,

¹⁰mì n hɛli n'van tɔ́ o n'van kɛmɛ oo n'van kɛmɛ coo, n'van kɛmɛ o n'van vàá pilɛ oo n'van vàá pilɛ coo, n'van vàá pilɛ o vaalan tɔ́ coo o polama yɛ́-yɛ́ma Israɛlla tɛɛn. Vanaa kan vanin vanaa cɔvaa delnin Kibea coo-a ɲɛdiaa yoo ni. Kani mɛɛ mi n tuisi kobi kalaa dɛnɛ palaa coo le mààla nda luei lan Israɛl-tan.»

¹¹O kon, mí Israɛlla kpow a cɛlan le Kibea kɔlan delɔɔ coo a cɔwvo.

¹²Mí polama yɛ́-yɛ́ma man má viam kiilaa o tàndá Bɛnyamɛn-ndo nin kpow, le nda ɲunaa le kɔlɔ nda tosa kpundɛ lamàà bɛndu vaa lende-o

¹³Má dimi aa: «La mal naa niko vanaa tosa dɛnɛ kon-nda o ba, vanaa kɔlta vesɛyaa fondoa co kan Kibea nanu-a pɛɛn, mì n diw nda. O kon, mí n soli mààla lan Israɛlla tɛɛn.» Kɛ polale Bɛnyamɛn-nden le cɛl sɔɛi puapilɛa ndaa le, Israɛlla pɛɛn.

¹⁴Má veelan fulaa o cieon ndan yɛ́-yɛ́ɔn nin, má bɔɔŋian Kibea le Israɛlla ciŋilanndo a cɔwvo.

¹⁵Má cua ɲinkon vanaa cɔwva vaalan bidiin a laŋɔmpum fulaa o cieon ndan yɛ́-yɛ́ɔn nin, handɔɔ o vanaa cɔvaa kɛndɛ-kɛndɛa kɛmɛ leŋɔmmɛvaa ndáà cua Kibea ciee-a coo.

¹⁶O kunda vanaa cɔvaa kan tɛɛn, vanaa n'mɛlla va kɛmɛ leŋɔmmɛw. Cɔlɔbaa pila ndáà caa ni, tenndaa pila ndáà tennda ni. O kɛ́-kɛ̀ ndóò tiwba powvo vuuo a fáàndaa mì ndóò vɛ yiinnden, ndóò bindu len te.

¹⁷Faŋanndo o polale Bensamɛn-nden coo, mí polama tɔ̀an ma hɛli vanaa cɔvaa kɛndɛ-kɛndɛa vaalan kɛmɛ lehiɔɔlu.

¹⁸O kon mí Israɛlla kɔa Betɛl, má ɲuna Hala le vanaa tasea va lakɔ o polama ndan tɛɛn le vanaa fula o polale Bɛnyamɛn-nden nin-nda delɔɔ coo a cɔwvo-a sinaa. Mí Mɛlɛka hɛli polale Yuda len.

¹⁹Diimandɔɔ púŋ, mí Israɛlla bii nɛiyo, má kɔ kila dɔ́ɔ́ngɔ́ ndaa Kibea ciee-lekɔɔ.

²⁰O kon kɔɔli, má bɛɛndian, má kɔa polale Bɛnyamɛn-nden cɔlɔbaa, má kɔ tiila nda Kibea.

²¹Mí vanaa fula kan o polale Bɛnyamɛn-nden nin-nda fulal nda fɛlɛmɛndɛn a cɔwvo, má diw ɲinkon Israɛlla vaalan bidiin a latiɔn.

²²Mí Israɛlla kɔ lo caŋndo Mɛlɛka o hɔl háá icɔllo. Má ɲuna ndu le sinaa te ndóò bɛnda pɛ mi ndáà kuel vɛlɛ puapilɛa ndaa fula o polale Bɛnyamɛn-nden nin-nda a cɔwvo. Mí Mɛlɛka cɛl.

²³O kon, mí vanaa cɔwva Israɛl sɔla vɛlɛ yoomuma sɛnɛi, má bɛɛndian, má kɔ ciŋilan nda nɛɛ ndáà ciŋilan nda o tasendɔ-a.

²⁴Má del vɛlɛ vanaa fula o polale Bɛnyamɛn-nden nin-nda coo a cɔwvo. Paale diinndɔle len bɛɛ, mí polale Bɛnyamɛn-nden le can Kibea, mí le kuel nda, mí le diw vanaa cɔvaa Israɛlaa ndáà caa cɔwvo ɲɛkɛndɛi-ya vaalan tɔ́ a laŋɔmaa.

²⁵

²⁶Mí Israɛlla kpow a kɔ cal Mɛlɛka o hɔl Betɛl, má caŋ. Má niinu ɲinkon kpɛŋ o sumndo nin. Má solul Mɛlɛka sálàla loamaalan a sálàla kɔlɲululan.

²⁷Tuma kon yɛ, kesu kpema Hala-o va Betɛl, Pineas po Eleasar-o, po imama Aarɔn-ndo va baalaa tosaa a kesu kpema kon o palɛi ken nin ni. Mí Israɛlla ɲuna vɛlɛ Mɛlɛka le sinaa te ndóò bɛnda mì ndáà kuel vɛlɛ puapilɛa ndaa fula o polale Bɛnyamɛn-nden nin-nda a cɔwvo.

²⁸Mí Mɛlɛka mulul nda aa: «Oi, la kɔ, i malnin nda niaa o ba siɔdii.»

²⁹Mí Israɛlla balu vanaa cɔwva vinio Kibea sɔ́.

³⁰O paale yàándɔlen, má bɛɛndian vɛlɛ maa o tasendɔ, má kɔa Kibea, má kɔ del polale Bɛnyamɛn-nden coo a cɔwvo.

³¹Mí vanaa fula o polale Bɛnyamɛn-nden nin-nda mal cieo, má toal Israɛlla kɔɔli, má lo kɔlan háá má mɛi cieo lándán. Má diw n'van beleyaa yondoo nin o nɛi cɛn Kibea mó kɔa Betɛl-lo coo.

³²Má yiyan maa a cii Israɛlla nɔla maa paandu. Kɛ nduyɛ, Israɛlla va dimio aa: «N ɲaanun, mì n nɛlanɛlan nda cieo levil lándán, mì n kɔɛnnun a nda o nɛilan coo.»

³³Mí vanaa cɔvaa Israɛlaa va a viniannda-a fula, má kɔ sim Baal-Tamar. Mi a va a viannannda Maare-Keba-a koma fula a makɔɔ.

³⁴Mí vanaa caa cɔwvo ɲɛkɛndɛ-kɛndɛ-a vaalan tɔ́ o Israɛlla tɛɛn a toal Kibea ciee. Mí cɔw tuw-tuwvo tosan, kɛ a kon kpede, vanaa fula o polale Bɛnyamɛn-nden nin-nda ve bɛɛ dɛnɛ palaa va nda cumndo-o sina le.

³⁵Mí Mɛlɛka mala Israɛlla, má koaŋ vanaa fula kan o polale Bɛnyamɛn-nden nin-nda koŋɔɔ pila. Paale len, mí Israɛlla diw nda vaalan bidiin a laŋuɛɛnu a n'van kɛmɛ (25 100).

³⁶O kon, mí vanaa fula kan o polale Bɛnyamɛn-nden nin-nda ca maa a bumba cɔwvo. Mí Israɛlla mel nda fondaa, kani ndáà nɔ tiindanndo vanaa cɔvaa ndáà vini Kibea ciee-lekɔɔ-a coo.

³⁷Mí vanaa va kan a viannannda-a fula, má luɛi o kobio nin a kiltan, má bii kobi kalaa, má diw vanaa va lon-nda.

³⁸Nduyɛ, ndáà cii nin mɛilan o tɔɔmaseloo pum coo nda Israɛlaa tɔ̀a, ndáà bɛnda mì ndáà heelu kumnde o kobio coo.

³⁹Telen Israɛlla kandu kiltan nda laci mí vanaa fula o polale Bɛnyamɛn-nden nin-nda diw n'van beleyaa nda tɛɛn-ndo, má yiyan dɔ́ɔ́ maa a cii nda lɛhau nɔla maa o tasendɔ.

⁴⁰Kɛ o telen kon kpafii kumii tɔɔmasele nda mɛi-yo i kandu helɔɔ Kibea ciee ni. Vanaa fula o polale Bɛnyamɛn-nden nin-nda tofanndo kɔɔli, má ca kumnde a yelenyelenndo helɔɔ o kobi ndaa kpow coo.

⁴¹Mí Israɛlla mulin niko, má kuel nda. Mi siòònde bii vanaa kan taw le dɛnɛ palaa va nda hinullo-o.

⁴²Má ɲaanun Israɛlla le kɔlan o lɛŋnde veselɛilen nin. Kɛ má luɛi nda tɛɛn, mí Israɛlaa va cɔnɔnndo ciee-a biw nda, má diw nda.

⁴³Mí Israɛlla tiila nda. Má toaw nda, má va nda keiyo diwvo o nɛi. A tosal nda lamamɔɔ le. Má toaw nda háá Kibea a ba paalen le can-ndo.

⁴⁴O kon, mí vanaa cɔvaa fula o polale Bɛnyamɛn-nden nin-nda vu vaalan tɔ́ a laŋɔmaa. Nda kpow vanpiaandua mayoomua nda va ni.

⁴⁵Mí vanaa tɔ̀a ɲaanun o lɛŋnde veselɛilen nin, a kpengii pow kpovaa Rimɔn. O nda tɛɛn mí Israɛlla kei n'van vàála ŋuɛɛnu diw nɛi-tɛɛn, má toaw a tɔ̀a háá Kideɔm, má diw vɛlɛ n'van vàála tiɔn.

⁴⁶Mí vanaa cɔvaa vi paale len o polale Bɛnyamɛn-nden nin-nda bɛnda faw-faw vaalan bidiin a laŋuɛɛnu (25 000). Nda kpow vanpiaandua mayoomua nda va ni.

⁴⁷Kɛ o vanaa cɔvaa ɲaanun kan-nda tɛɛn, mí n'van kɛmɛ leŋɔmpum a hialun, má tiiya o pow kpovaa Rimɔn, má lo lon háá paangon mún hiɔɔlu.

⁴⁸O kon kɔɔli, mí Israɛlla mulin, má kuel vanaa tɔ̀a lo o tàndá Bɛnyamɛn-ndo nin-nda, má va keiyo cieon kpow lumio, má va vɛlɛ vanndacieea a cɔlua kpow diwvo.