Read Kissi Masaa kialaa n'yamaa 3 Bible Online

Masaa kialaa n'yamaa 3 - Kissi bible

Masaa kialaa n'yamaa 3

¹Vanaa-mangalaa-isɔaa Mɛlɛka ndóò manda le Israɛlla tɔɔndanndo-a yɔŋnun haa ni, Israɛlaa kan pɛɛn, a kɛ́-kɛ̀ ndáà sina dɛnɛ cɔwvo telen nda va Kanannda tovɔɔ-o le-a.

²Ndóò yeema mì Israɛlaa felengia va cɔnɔnndo sɛnɛi-ya, áà sina vɔ dɛnɛ cɔwvo le-a ndáà pɛɛku cɔwvo.

³Vanaa-mangalaa-isɔaa kan va haa ni: simlacia ŋuɛɛnua Filistia, Kanannda kpow, Sidɔnnda a Heviaa va o tàndá n'pemboo Liban nin-nda, cɔnɔnndo o pembei Baal-Hɛrmɔn kɔlan tiiyaa háá le luɛyɔɔ Hamat[4].

⁴A vannda ha Israɛlla sɔla tɔɔndanndo ni, haliko mi Mɛlɛka ndóò sina te ndáà biinin tɔŋnda ndóò kei Moise o ba le fuɲaa ndaa mamaa tɛɛngullo lan.

⁵Mí cuavaa Israɛlla cal Kanannda, Hitiia, Amoriia, Perisiia, Hiviia a Yebusiia tɛɛn.

⁶Má cua cuavaa ndaa laandua o nɔ̀lan, má kɛsi cuavaa ndaa laandua nda pila velu-a o nɔ̀lan poaa vanaa kan o ba, má sooluu halaa ndaa.

⁷Mí Israɛlla tosa ɲɛ hɛnan Mɛlɛka Hala ndaa loo, má pɔɛɛnun ndu, ma mulin Baal a Asera sooloo.

⁸Mí Mɛlɛka tuulu kɔl a Israɛlla, mó mal nda Kusan-Riseataim masaa Mesopotamii o ba. Vɔsilan tan ŋɔmaa a va ndu o ba o cɛlen nin.

⁹Mí Israɛlla koŋul Mɛlɛka o lani, mí Mɛlɛka yɔngu nda vana baŋaa, Otniɛl po Kenas-o pɛɛn, pɔmbɔɔ Kalɛb Kenas kon va ni. Mí Otniɛl baŋa nda.

¹⁰Mí Kɔl Mɛlɛka-o toal ndu coo, mó siŋnun masa kialaa n'yama Israɛlla. Mó kɔa o cɔwvo, mí Mɛlɛka mal Kusan-Riseataim ndu o ba.

¹¹Mí kɔlɲuloo luɛi o lɛŋnden nin háá le vɔsilan belehiɔɔlu. O kon kɔɔli, mí Otniɛl po Kenas-o vu.

¹²Mí Israɛlla tosa vɛlɛ ɲɛ hɛnan Mɛlɛka loo. O kon, mí Mɛlɛka ke Ɛklɔn masa Moabua yoomuan, mó hinul Israɛlla le tùú ndáà tosa dɛnɛ hɛnan Hala loo-o.

¹³Mí Ɛklɔn mɔɔsiaa Amɔnnda a Amalɛkea, má kuel Israɛlla. Má koaŋ nda, má bii kobi mavawvo, Yeriko pɛɛn.

¹⁴Háá vɔsilan tɔ́ a laŋɔmaa, Israɛlla va Ɛklɔn masa Moabua o ba bɛngu.

¹⁵Mí Israɛlla koŋul Mɛlɛka o lani, mí Mɛlɛka yɔngu nda vana baŋaa, Ehud po Kera fula o polale Bensamɛn-nden nin-ndo. Vana imɛllo Ehud kon va ni. Mí Israɛlla dimul ndu le cuungiaala ndáà bii lan Ɛklɔn masa Moabua yoo.

¹⁶Mí Ehud toosiaa mɔɛi sondola tiɔnde, ì va bandei dunndo lepilɛ. Mó baanun ndi o caŋ, o volɔɔla va ndu lekɔɔ lan bɛngu, o ba kɛndɔɔ coo.

¹⁷Mó yoo Ɛklɔn masa Moabua cuungiaala lan. Ɛklɔn yɛ, celullo pila ndóò celul ni.

¹⁸Ndóò ciiyo ndu ɲɛm mun yɔngoo, mó dimul vanaa hin a mun-nda le muungoo.

¹⁹Mɛɛ nda tiiya o piɔmaa lapovaa co Kilkal ciee-lekɔɔ-a, mí Ehud muungu pila o masaa lo, mó kɔ dimul ndu aa: «Fallo, i nɔ congɔn nɔmndo, kɛ fɔ mì n sim naa ŋiɔn kpé.» Mí masaa dimul vanaa ndɔa baalaa le ndu fondaa mello. O kon, mí nda kpow a fula.

²⁰Mí Ehud sɔɔnguu ndu ikɛi nɛɛ o va icali tongoo nin le hangullo-a, mó dimul ndu aa: «Hala sɔɔ sɔɛi pum ya o sondo le nɔm dimullo.» Mí Ɛklɔn can ɲaali o kpɛŋɛ o va icali nin-ndo nin.

²¹O kon, mí Ehud cɔɔlu sɔɔnguu ndu ikɛi, mó nan mɔɛi a ba mɛllo ndu o ba kɛndɔɔ coo, mó cɔaŋ ndu ndi o dembe fɔŋ.

²²Hali piaw imɔɔ, mó luɛi ndu nin kpede, mí cuɛiyan ma kindan a makɔɔ, kani Ehud soli lɛ bɛɛ mɔɛi kalɛi le.

²³Mí Ehud kiindiaa diolan kpow, mó sɔaa sɔkɔlen o dio bɛndoo.

²⁴Ndóò fulaa, mí vanaa ndɔa baalaa hun tofa, kɛ má komal sɔkɔlen lesɔaalen o dio, má dimi aa: «Bɔɔle sɔndanndo[5] o co ni.»

²⁵Má viaw cumndo o dio tei, kpɛkɛlɛ bɛɛ a tui le, má cua kii dio bɛndoo, má kumbi, má ca dɔ́ɔ́ vana nda bɛndoo ihini lɛŋ o vílɛ́iyo dengelekeɲee.

²⁶A lo tofaa lon, mí Ehud ɲaanun, mó kɔ hiaw piɔmaa lapowva, mó kɔannun Seira.

²⁷Ndóò tiiyaa dɔ́ɔ́, mó kɔ hɔŋ buloo o pembun co o tàndá Efraim-ndo nin-ndon coo, mí Israɛlla kpow a toal o pembei coo, mó sim nda laci.

²⁸Mó dimul nda aa: «La hun ya kɔɔli, kani Mɛlɛka mal yaamɔaa niaa niaa o ba, Moabua pɛɛn.» Mí nda kpow a kɔa ndu kɔɔli, má kɔ sim o fondala vana nɔla taŋɔɔ o peo leeloo o lɛŋnde Moab len nin-ndan, a mel Moabua vana-vana taŋɔɔ le.

²⁹O foofo kon, má diw vanpiaandua Moabua vaalan tɔ́. Mɛɛ nda va kpede, ndáà celul, ndáà nɔ yoomuan, kɛ vanndo pilɛ bɛɛ helun te.

³⁰Paale len, mí Israɛlla kɛsin Moabua o ba bɛngu. Mí kɔlɲuloo muungu o lɛŋnden nin háá le vɔsilan belaŋɔmaa.

³¹O Ehud kɔɔli, mí Samkar po Anat-o siŋnun masaa kialaa n'yamaa, mó diw Filistia piaandua kɛmɛ leŋɔmpum a ciŋɔle n'nawlen, ndu bɛɛ vana baŋaa lekɛ́ndɛi o yɔŋnun le Israɛlla ni.