Read Kissi Masaa kialaa n'yamaa 5 Bible Online

Masaa kialaa n'yamaa 5 - Kissi bible

Masaa kialaa n'yamaa 5

¹Paale len, mí Debora soli condei nda Barak po Abinoam-ndo aa:

²«O lɛŋnde Israɛl-ten nin, vana-vana co o bɛɛndianndo le cɔwvo[6], vannda yɔngun fasɛi le cɔlɔbaa, lelaln la mel Mɛlɛka balika.

³Niaa masaa, la yaŋ nilan. Niaa vanaa bɛndua, la tuei-yɔ. I solinin condei, a toɲa, i co Mɛlɛka condei solul, Mɛlɛka Hala Israɛlla pɛɛn, ndu ya co condei solul ni.

⁴Àá Mɛlɛka! Telen n va cɔnɔnndo Seir-o, lɔ́ɔ́ n va faŋanndo o lɛŋnde Edɔm-nden nin-ndo, mí lɛŋnden le ɲiiya, mí halataala pɔya, mí yumbuyumboo tenga mó tuisi mɛnndan.

⁵Pembon va ɲiiyaa Mɛlɛka o hɔl, Hala Sinai-yo, Mɛlɛka Hala Israɛlla pɛɛn.

⁶O paale Samkar, po Anat-o len, o paale Yaɛl-ten, vannda ve kei o nɛila bɛndulan coo le, o nɛila kangadi-kangadilan coo vanaa kelaa va keiyo ni.

⁷Mí vannda faŋan o cieon nɔ kpaki loon, má faŋan o cieon mun o lɛŋnde Israɛl-ten nin[7]. Ɲɔɔ lo lende háá mí can, ya Debora, mí can maa kalacua o lɛŋnde Israɛl-ten nin.

⁸Vannda ndáà cii nin halaa sɛnɛiya hɛli, le hee mí cɔwlan la kandun, kɛ hali bállo pilɛ bɛɛ, kɔ̀ɔ̀ cɔwvo o pilɛ bɛɛ ve le vanaa cɔwva vaalan belehiɔɔlu le.

⁹Kɔllo co ya simlacia Israɛlla a vanaa yɔngun nda pila le cɔwvo-a coo. La mel Mɛlɛka balika.

¹⁰Niaa co icali o sofɛlɛa laandua humbua coo-a, niaa co icali o valalan coo-a, a niaa co kɔlan o nɛi-ya, la keela kɔllo.

¹¹La tuei-yɔ mɛɛ vanaa piɔw mɛnndan nɛɛ nda koesi cɔlua-a-a co condei yɛ. A co Mɛlɛka sangalaa le ɲɛ o tosa le dɛnɛ sandaa-o, ɲɛ o tosa le dɛnɛ sanda Israɛlla laci-o. O kon, mí vanaa Mɛlɛka-a va tolɔɔ o diola luɛyaala kobilan.

¹²Tiondu, tiondu sei, Debora! Mbɔ̀ tiondu, ma soli condii cɔwve. Nɔm Barak po Abinoam-ndo, cɔn ma kɔɛ a vanaa nɔmaa n bii o cɔwvo-a.

¹³Vanaa hɛlun-nda tuusu nɛɛ langbaa kalla co-a, vanaa Mɛlɛka-a cuungian má tuusu le kuubaa cɔwva bɔŋaa[8].

¹⁴O polale Efraim-nden nin vanaa nɔla Amalɛkea-a fula ni, mí polale Bɛnyamɛn-nden le del polale Efraim-nden kɔɔli, má kɔ luɛi vanaa cɔwva tɛɛn le cɔwvo. O yungu Makir-o nin simlacia fula ni. O polale Sabulɔn-nden nin kuubaa fula ni.

¹⁵Simlacia fula o polale Isakar len nin-nda sɔɔnguu Debora mayoomu. Mɛɛ vanaa fula o polale Isakar len coo-a co vanaa lo o lediom coo a Barak-a yɛ, má kɔ sɔɔnguu ndu mayoomu cɔ́-cɔ́ o dɛɛlaa nin. Kɛ mí vanaa fula o polale Rubɛn-nden nin-nda nda luɛi-yɔ sɛɛngiaa, sɛɛngiàà láà sɛɛngiàà.

¹⁶Le yɛɛ nɛ niaa lonnun yɛ o vɔ̀lɛ́lan tɛɛn le vanaa mandaa n'cɔlua tueyɔɔ cɔlua veeloo? A toɲa, o yungula fula Rubɛn o ipululan tɛɛn, sɛɛngiaa kposon co ni.

¹⁷Polale Kalaad len le lo o peo Yurdɛn leeloo. Le kɔlɔ yɛɛ nɛ polale Dan-nden le cal-lɛ o dɛ̀ndɛ̀la ndalan ikɛi? Le sabu yɛɛ nɛ polale Asɛr len le cal-lɛ o mɛmma ihɛllan kɔngɔ, mí le kungulan o fondala tɛɛngaalan?

¹⁸Vanaa fula o polale Sabulɔn-nden nin-nda yɛ, siòòŋii bii nda a piɔ́mndo le, má kɔa o cɔwvo. Lende koni polale Nɛftali len bɛɛ le tosa ni, má kei o pembon coo yondolan nin.

¹⁹O kon mí masaa hun, má hun cɔlɔba, a toɲa, mi masaa Kanannda cɔlɔba, Taanak o mɛnndan Mekido ikɛi nda cɔlɔba ni. A sɔla tɔnɔ oo tɔnɔ o cɔw kon nin te, voliei pilɛ bɛɛ a sɔla le.

²⁰Hali loeon co o halataala-on, mi n sɔɔnguu le cɔwvo. N lo coocoo pɔɔli, mi n cɔlɔba Sisera.

²¹Pee pɔmbɔɔ sindɛ hiow a yaamɔɔa kpede, pee pɔmbɔɔ Kison pɛɛn. Òó kɔl nuu, nɛw nda fɔ-fɔ!

²²Buukula soa la co sɔɛi kpeekpei, soa co kiltan a labɛɛla taw-taw.

²³Mí mɛlɛkanɔ Hala-o dimi aa: ‹La dɔw kobio Merɔs danga, La dɔw vanaa co icali lon-nda danga. Kani a cɛl le vanaa Mɛlɛka-a malaa le, a cɛl le kuubaa Mɛlɛka-a sɔɔnguuo ikɛi le cɔwvo le.

²⁴Duaa co le Yaɛl lanɔɔ Hebɛr Keniinɔ. Duaa co le ndu hiovɔɔ vanlaandua tɔ̀a co o cɛila-kolala-toandaalan bɛngu-a coo.

²⁵Kani mɛɛ Sisera piɛi ndu mɛnndan, mó ke ndu nɔnɔan, mó ke ndu cuɛima nɔnɔan o taala kólaa sɔvɛ-sɔvɛɔ nin.

²⁶Mó bii pikiei o ba pilɛ, mó bii kunduva bɛndoo o baa pilɔɔ, mó kɔ baŋ pikii ken Sisera o ikpaŋ, mó buli ndu bollen hobon.

²⁷Mó lawlaw, mó pimbulu, mó mulumulun ndu o pelon bɛngu, Ndu o pelon bɛngu, mó lawlaw, mó pimbulu, nɛɛ o lawlaw-va, lon o pimbulu ni, mó malnun kɔl.

²⁸Kalaa Sisera va mɛɛndanndo o dio-pɔmbɔɔ, o lo tofaa o tɛɛngon, mó koŋul aa: Ko le yɛɛ nɛ ɲɛ ɲaanan ndɔ soa nan-ndo co yɛ hau tamalaa le hunɔɔ? Ko le yɛɛ nɛ vana tui ndu hau diom o hunɔɔ le?

²⁹Mí caaŋaa ndɔa laandua hiow taasio nɔ-a mulul ndu, mí ndu pila va muli kon miinguuo aa:

³⁰Vana ce pɛ aa ɲɔɔn nda sɔla o cɔwvo nin taw ni. Bɔɔle ɲɛm mun nda co piɔwvo ni. Kuubanɔ oo kuubanɔ co cua laandoo o pilɛ, te kon te a ŋiɔn sɔla. Sisera kɛɛ dɔ́ɔ́ kolala yinaala kɛndɛ-kɛndɛlan sɔla le. Mì ndóò sɔla vɛlɛ dɔ́ɔ́ domala kɛndɛ-kɛndɛla vana ke kuubanɔ nɔla yaamɔɔa o cɔwvo lan-ndan kɛí dɛ!›

³¹Àá Mɛlɛka, màá yaamɔaa nɔmnda cuu lende muɛɛn! Màá vanaa kaola nɔm-nda diondu mɛɛ ɲɔɔ tenga a paalen kalale ŋama-ŋama len nuaa yɛ.» Mì kɔlɲuloo muungu o lɛŋnden nin háá le vɔsilan belehiɔɔlu!